Mateus 20

Bahingi Muminda Yemahhambi

1 "Bumambo gwekudzimu gonga mweni weminda wakabindukila mangwanana enohaka banhu bangawun’hingila muminda iye yemahhambi. 2 Hule kwebvumilana nabo kuti unowhobapa dinari hapa bahinga hhuba lose, wakabayendesa kuminda yemahhambi. 3 Wakati ebhuda eyenda zwe ne awa yebutatu kubvisila bhuda kwehhuba, akabona bamwe balimile panotengesegwa besina tjabanothama. 4 Wakati kubali, ‘Yendani bo kuminda yemahhambi, ndowhomupa kwandinobona kwakalizanila.’ Ndizo bakayenda. 5 Wakapamha akabhuda kakale mu awa yebutanhatu neyebuhhanalume kubvisila bhuda kwehhuba, akayeta sayikoko zwako. 6 Mu awa yegumi lina kun’ompela kubvisila bhuda kwehhuba, akawana bamwe balimile basina tjabanothama, akati kubali, ‘Mumilileni ipapa hhuba lose musina tjamunothama?’ 7 Bakati kuwunli, ‘Kungentha yekuti akuna watipa n’hingo.’ Iye eba eti kubali, ‘Namwi bo yendani kuminda yemahhambi.’ "

8 "Abamadekwana mweni weminda yemahhambi wakati kuna unolinga minda nebahingi, ‘Dana bahingi bose ubape mibhayilo yabo, utange nebapedzisila, upedzisile nebatanga.’ 9 Baka batangisa n’hingo mu awa yegumi lina kun’ompela kubvisila bhuda kwehhuba, bakati beswika umwe newumwe akawamutjidziwa dinari. 10 Kwakati ibabaya batanga, beswika, bakakumbula kuti banowhopiwa njinji; koga umwe newumwe wakawamutjidziwa dinari. 11 Bakati bewamutjila mbhayilo wabo bakan’un’urika kumweni weminda, 12 beti, ‘Ibaba baswika kubupelo bahinga awa in’ompela, koga mabalizanya naswi tahwa tihinga hhuba lose ngeno hhuba litipisa.’ 13 Koga wakahandula umwe wabo eti, ‘Nkwinya andizokutjinyila tjimwe; atizobvumilana dinari lin’ompela? 14 Tola kuko uyende, ludo gwangu kuti ndipe wapedzisila ngina mun’hingo kwakalizana nekwandakupa. 15 Anditobvumigwa yeta sekwandinoda netjinoba tjili tjangu? Kene nogwadziligwa kuti ndina moyo wakanaka?’ "

16 Yesu wakafidza neti, "Ndizo bekupedzisila banowhoba bekutanga, bekutanga banowhoba bekupedzisila."