Mwanduso 26

Isaka kokala Gelali

1 Maabaho kulawilila nzala muna iisi, nzala iyo haikalile ija ya lusita lwa Bulahimu. Isaka kahita kwa Abimeleki mfalume wa Wafilisiti, uko Gelali. 2 Mndewa Mulungu kamulawilila Isaka na kamulongela, "Sekeuhite Misili, mbali kala muna iisi iyo mbaka vondanikulongele. 3 Kala hano, niye nizakuwa na weye na nizakutemela mate. Nizakwing’ha zisi zino zose kuwa zako na welesi wako. Nizakwika goya chilagano choniilagane na tati yako Bulahimu. 4 Nizakwing’ha welesi mwingi fana nhondo za kuulanga na nizaweng’ha zisi zino zose. Kufosela welesi wako wanhu wa makabila yose wezatemeligwa mate. 5 Nizakutemela mate kwaviya Bulahimu kanitegeleza na kazindilila malagilizo yangu na ndagilizi zangu."

6 Ivo Isaka kakala uko Gelali. 7 Wanhu wa uko viwamuuzile mbuli za muke wake, Isaka kawedika kuwa iyo lumbu jake. Kwaviya kadumba kulonga iyo muke wake mana kadumba wanhu wa uko sekewamkome kwa ichimu cha Lebeka, yakalile lumondo. 8 Isaka viyakalile uko kwa lusita lutali, Abimeleki mfalume wa Wafilisiti kasungulila muna dizonzo na kamuwona Isaka kamuhagatila Lebeka.