1 Mandânə, mə wû ə̈bə̈ agia ə̂në tshə âfɔ lə ə̂ngû əngbrʉ nə ə sə̂ kə o gashu, ə̂në aədɨ ye sə̂ morofo â akrɔ ye sə̂ mindû amanə bishi kɔ. Pâ aədɨ ye nə, akpɔtɔ ngerə morofo sə̂ je, â pâ akrɔ ye nə, aəɨrɨ ə̂në ə gu Ndjapä kɔ sə̂ je. 2 Agia nə ə̂në mə wû ətshə kɔ, tshə kô muru â aə̈nü ye sə̂ mata aənə̂ agia ə̂në əndje ê ətshə ə pa ursə kɔ, â ama ye sə̂ mata ənə̂ bamara. Əmbrʉ agia nə zâ awlra nə̂ ye də mbata ngerə nə̂ ye gâ ndə ə̈bə̈ äwä kə mbrə âgbɔ̂ ngerə kə ətshə. 3 Ə̈bə̈ korɔ ye nə bale sə̂ də əku gbadja tə̂ nə, bale əku gbadja səkɔ yû gâ ye! Bale, ərə nə fʉ̂ tə̂ azü tshepashɔ nɔ̂ â əndje tê mandâ agia nə. 4 Azü nə vrɔ̂ əmbrʉ agia nə, mbrə ə̂në tshə zâ äwä kə mbrə ngerə kə agia nə kɔ. Əndje vrɔ̂ ndje agia nə ə pa: «Əde kə lï də agia səye? Əde kə lï ndə kə pa əne tɔ kowɔ də ətshə?»

5 Əndje zâ äwä kə ətshə ndə kə pa tshə pa aəpʉ gbâma ə gu Ndjapä. Əndje zâ awlra kə mbrə ərə səkɔ lə yipʉ zazü bishi amanə bishi kə ətshə. 6 Tshə â ama ye ndə kə pa tshə gu aə̂gû tə̂ Ndjapä nə ə dja əɨrɨ ye də ə̂sə̂ əlo ye ə gu əndje ə̂në əndje sə də ə̂sə̂ əlo əndje mâ lafɔ kɔ. 7 Əndje zâ äwä kə ətshə ndə kə pa tshə tɔ kowɔ tə̂ azü nə̂ Ndjapä ə ro pâ əndje də awlra. Əndje zâ awlra kə ətshə ndə kə pa tshə sə gâ pâ amarä nɔ̂ də azü aəgɔ nɔ̂ də azü aama aəgɔ nɔ̂ də ashɔ aəgɔ nɔ̂. 8 Azü tshepashɔ nɔ̂, əndje ə̂në əndje tâ əɨrɨ əndje tâ gâ lə fraka sorô nə̂ Aya Ndalimi nə ə̂në azü wô ətshə gâ ye kɔ, ə vɔ̂tə̂ nə kerə ə̂në Ndjapä mbrə̂ tshepashɔ kɔ ne, əndje sə kə vrɔ agia nə.

9 Əzü ə̂në tshə sə də ətu, tshə djï əpʉ səye!

10 Kədə ə̈bə̈ əzü kə lï ndə kə pa əndje za ətshə ə ro də ətshə tə əyïkânga,

tshə sə kə ro tə əyïkânga nə;

kədə ə̈bə̈ əzü kə lï ndə kə pa əndje wo ətshə də ə̈ngrʉ̈ kamba,

əndje sə kə wo ətshə də ə̈ngrʉ̈ kamba nə.*

Alɔ ndə kə pa azü nə̂ Ndjapä ru ə ru lə aərə ə sə tə̂ äwä əpʉ lɔsu kɔ kə səye.

11 Mandânə, mə wû ə̈bə̈ ata agia nə ə̂në tshə âfɔ lə ashɔ ə wûtu kɔ. Aədɨ ye sə̂ tə̂ nə bishi mata aənə̂ aya ndalimi â tshə sə̂ kə pa əpʉ mata əmbrʉ agia nə. 12 Tshə sə̂ də ngerə nə̂ angbʉlî agia nə nɔ̂ â sə̂ kə mbrə ərə də nə ətshi angbʉlî agia nə. Tshə mbrə̂ â ashɔ də azü tshepashɔ nə sə̂ kə vrɔ angbʉlî agia nə ə̂në əku mbadja nə̂ ye nə yû gâ ye kɔ. 13 Tshə mbrə̂ aâgbɔ̂ aərə ə̈lü, ʉrrr ə mbrə̂ â əwo tô mâ lafɔ ə jêrə gâ pâ ashɔ də ala azü nɔ̂. 14 Tshə sə̂ kə djingli äwä tə̂ azü tshepashɔ nə tə̂ äwä aâgbɔ̂ aərə ə̈lü nə ə̂në əndje zâ äwä nə kə ətshə ndə kə pa tshə mbrə ətshi angbʉlî agia nə kɔ. Tshə pâ kə azü tshepashɔ nə ə pa əndje mbrə ə̈bə̈ ərə ə̂në ə ko agia nə ə̂në əndje mbrə̂ əku nə tə̂ ye də ə̈ngrʉ̈ kamba nə gâ ye â tshə dâka pə tə sorô kɔ. 15 Əndje zâ äwä kə ətshə ndə kə pa tshə za əwu gâ lə ərə nə ə̂në ə ko agia nə kɔ, ndə kə pa ərə nə ə̂në ə ko agia nə kɔ, ə pa əpʉ ə wo azü nɔ̂ ə̂në əndje yi yində kə vrɔ ətshə ne kɔ. 16 Tshə kô azü nɔ̂ də awlra, aəngʉ azü də aâgbɔ̂ azü, alayïrishi də alayïəyo, aamba azü də akanga, ndə kə pa əndje ta ə̈bə̈ ərə gâ pâ ndəkɔ əndje wala gâ tə̂ matshi əndje 17 â ə̈bə̈ əzü bale lï lï ndə kə pa tshə yɔ ərə wala tshə ka ərə, kədə tshə sə sə də ərə sə̂ ə̂në əndje tâ kɔ wala də əɨrɨ agia nə wala atshɔ əɨrɨ agia nə tə̂ ye ne.

18 Kotəye də̂ əzü lï ndə kə pa tshə wusə̂ âdâ ərə. Əzü ə̂në tshə wusə̂ ərə, tshə lï ndə kə dji tshelə âdâ atshɔ agia nə. Mbrə ə̂në ə sə tə atshɔ nə̂ əzü. Atshɔ nə də̂ ngbangbo mindû amanə bale də zazü vəta amanə mindû-a-bale (666)*.