Lucas 19

28 Mandânə ə̂në Jezu pâ əpʉ səkɔ, tshə tê gâ ətshi ə̂kpû azü nə ə nâ mâ Jeruzalamə.

Jezu li gâ lə Jeruzalamə

29 Alɔ ə̂në Jezu ndô trö də tshelagɔ Betəfaje də Betani, mâ tə̂ kaga aayɔ ə̂në əndje ê ə pa ɔlivə kɔ, tshə wlâ alabə̈ atrawaya nə̂ ye bishi 30 ə pâ kə əndje ə pa: «E nä mâ lagɔ ə̂në ə sə ətshi e kɔ. Alɔ ə̂në e li gâ lagɔ nə, e sə kə sɔtə̂ ə̈bə̈ aya kunda ə̂në əndje dû ətshə, ə̂në ə̈bə̈ əzü bale te te pa ə o gâ pâ ye ne kɔ, e wöra ətshə ə gü də ətshə mâtəye. 31 Kədə ə̈bə̈ əzü kə yu e ə pa: "E sə kə wora ətshə ndə yekɔ?", e pä kə əzü nə ə pa: "Âgbɔ̂ Əyïngerə yində ye."»

32 Atrawaya nə ə̂në Jezu nə wlâ əndje kɔ rô ə sɔ̂tə̂ aərə nə mata ə̂në tshə pâ ndə nə kə əndje kɔ. 33 Ə̂në əndje sə̂ kə wora aya kunda nə kɔ, alayïnga kunda nə yû əndje ə pa: «E wora ətshə ndə yekɔ?» 34 Əndje kîrə əpʉ ə pa: «Âgbɔ̂ Əyïngerə sə də əgo ye.» 35 Əndje gû də kunda nə kə Jezu nə ə kô aləba nə̂ əndje gâ pâ kunda nə â zâ Jezu nə gâ pâ ye. 36 Alɔ ə̂në tshə sə̂ kə ro nə kɔ, azü nə sâka aləba nə̂ əndje gâ ala äwä nə. 37 Ə̂në Jezu ndô trö də Jeruzalamə ə sə̂ kə jerə tə̂ kaga aayɔ ɔlivə nə kɔ, ə̂kpû atrawaya nɔ̂ sə də âgbɔ̂ ə̂rû tə̂ lɔsu əndje â vɔ̂tə̂ kə mbe Ndjapä tə âgbɔ̂, mbrə aərə ə̈lü ə̂në əndje wû kɔ. 38 Əndje pâ:

«Ndjapä tö ngwarə gâ pâ əyïngerə,

ətshə ə̂në tshə na də əɨrɨ Əyïlingû kɔ.

Tshe sə̈ bla mâ lafɔ,

a mbë Ndjapä ə̂në tshə sə mâ ngâ lafɔ kɔ!»*19.38 Wu Ətsh 118.26.

39 Alabə̈ Afariza ə̂në əndje sə̂ lə ə̂kpû azü nə kɔ pâ kə Jezu nə ə pa: «Awoyisə̂ ərə, ngä kə atrawaya nə̂ zə əndje sə ngboo!» 40 Tshə kîrə əpʉ kə əndje ə pa: «Mə pa kə e, kədə əndje sə ngboo, aəkpʉ sə kə ta râwâ!»