Lucas 1

Bontomwa ahwebya mbotwa eeki Yesu

26 Nde sandja ɛnɛ e botoba, Ndjakomba atindaki bontomwa Ngabilɛ nde ehe ɛmɔɔ e Ngalilaya, lina iiki ehe ɛkɔ Nazalɛti, 27 eka eboha e buunto epa tɛkɛndi la beele, ayali nko ihɔkɛ iiki eboha e loondo lina Yosepu, nde bokundi booki Dawidi; lina iiki eboha e buunto ɛkɔ Balia. 28 Bontomwa booki Ndjakomba aɔtwɛlɛ eboha e buunto mpe abobelɛ: «Yala la bohalangano, Balia! Wɛ obatɛ bokako eka Ndjakomba. Nkolo ayali la wɛ.» 29 Anɛ yokaki Balia bobekolo buuko, aotungyama, aoyaubola itina iiki bobekolo bo ngauko. 30 Bontomwa aobobela: «Tookake bɔɔmɔ, Balia, itina Ndjakomba akɔtɔmɛyɛ bokako. 31 Lenda, ɔngɔpɔhwa lyemi, ongobota bona o loondo, ongobopa lina Yesu. 32 Angooyala bonto o bɔnɛnɛ mpe bangooweta Bona ooki Ndjakomba ɛnɛ e lobola. Nkolo Ndjakomba angoobopa bokopo bɔnɛ we Dawidi nkɔkɔ-nyango ekinde, 33 Angɔɔlɛ bokopo booki Isalaɛlɛ botako. Bokopo bokinde tabongohila la buuna bɔmɔɔ.» 34 Balia ayuubola bontomwa booki Nkolo: «Yaa lobo lɔkɔ longokelama ngamo, aiko epa emi la boome?» 35 Bontomwa aobobela: «Bolimo bo Bɔyɛngwa bongoyala la wɛ, nguya eeki Ndjakomba e lobola engokwapema. Ekɔiko enga baetakɛ bona uuko ongobotwa bɔyɛngwa mpe Bona ooki Ndjakomba. 36 Lendaka Elisabɛti, bohibotonga okyɛ, ayali la nde la lyemi, nde bonto ohokita engambi; lyemi yokita sandja botoba, nde ɔnwe ibɔ bahangake ayali ekomba. 37 Elimbola wambɔ teyali la la lobo lɔmɔɔ lopa Ndjakomba tangɔhɔ yokela.» 38 Anɛ yokaki Balia ngauko, aohanga: «Emi nde ɔnɛ, ndjali bosali booki Nkolo; inkuma inkelamele nko nga omba wɛ ohange.» Aiko, bontomwa booki Nkolo aɔkɛndɛ.