Luk 2

Baɛniɛ Yesu nde Tɛmpɛlo

22 La lombuha luuko, anɛ ekitaki elaka e mpɛtwa ndenge etinda bobeko booki Mose*2, 22 Lenda nde Lewitiki 12, 2-4., ihe la nyango ibɔ banɛ bayobotombaka nde Tɛmpɛlo e Yelusalɛmɛ kela babolakye eka Nkolo. 23 Lolenge lokomi nde buku e bobeko booki Nkolo: «Nsɔmi enkuma e loondo engobotwe, bangoobokapela Nkolo.» 24 Bapaake mpe mbeka ɛnɛ e ibola bobeko booki Nkolo, «bimpompo bipe laa mpe bimbenga bipe.»

25 Nko nde elaka iiko, eyalaki la bonto ɔmɔɔ nde Yelusalɛmɛ, lina ikinde Simeyo. Ayalaki bonto ɔmɔɔ o semba mpe oyali la imɛmɔ eka Nkolo, aolile la botema bɔmɔɔ bonto ɔnɛ ongobikye Isalaɛlɛ. Bolimo bo Bɔyɛngwa mpe boyalaki la nde. 26 Bolimo bo Bɔyɛngwa bɔwɛniaki tangowa nkwɛnɛ Masiya, bontomwa booki Nkolo. 27 Nko aiko, Bolimo bobotindɛ atu nde Tɛmpɛlo. Elaka eyaki mboti iiki Yesu yokela mbo itinda bobeko itina ikinde, 28 Simeyo akɔhɛ bona nde bɛbɔ bekinde, apɛɛ Nkolo bokako mpe ahangɛ ngɔnɛ:

29 «Nkolo, aiko eha wɛ okokya elaka ekiɛ;

henyaka bosali bokiɛ akɛnde la hɛi.

30 Itina ngwɛnɛ emi kiika la baiho lobiko lokiɛ,

31 lɔnɛ lɔbɔngyɛ wɛ ntondo eeki bekili benkuma:

32 lwɛya lɔnɛ lɔngɔkwɛnia eka bikolo binkuma nde bolongo,

lokumo loki Isalaɛlɛ, botonga bokiɛ.»

Simeyo aebyɛ inɛ yoye

33 Ihe la nyango eeki bona bayuula nkimo anɛ yokaki ibɔ itepela Simeyo itina iiki bona. 34 Nko aiko, Simeyo aobatɔmɛya bokako mpe aohangela Balia, nyango eeki bona: «Lenda, bona ɔnɛ angooyala itina i ɛkwa la itina i elonga eeki banto buuke nde Isalaɛlɛ, angooyala itina i lɔmpɛnyɛ eka banto buuke; 35 ngauko bikanelo binɛ bihamaki nde betema beki banto buuke bingoyola nde bongala. Nga la wɛ, nyango, ongoyoka lyale nga wɛnɛ wɛ bangokobokɛ ikula nde botema.»

Ana, engambi e bainto ntepeli

36 Nko nde elaka iiko, ntepeli ɛmɔɔ e buunto ayɛ la nde nko aiko, lina ikinde Ana, bona ooki Panwɛlɛ, nde bokundi booki Asɛlɛ. Akitɛ nte engambi e bainto. Abalaki nde boboha, mpe baokihi nde la boome nko mbula nsambo, 37 boome abowɛ mpe akityɛ mbula ntuku mwambi la inɛi. Ambooyalake nde Tɛmpɛlo, la waane la botyo aosalele nko Ndjakomba, bohala nko yoyakilya byomba la yɔbɔndɛlɛ. 38 Akitɛ nko nde elaka iiko mpe abangɛ yokumya Ndjakomba. Ahangelɛ nsango eeki bona uuko eka banto bankuma balilaki lobiko loki Yelusalɛmɛ.