Chakatondejelwa 7

Imhande yabashingi baMwali

1 Mushule mwezwi ndakabona ingilozi ina, jilimile kumatibi mana enyika, jitabilija mipepo mina yopenyika, kuti pesibe ibhepo lichapunga penyika, mugungwa kana nokumiti. 2 Pakalepo ndakabona imwe ingilozi iva kubhazu lokubuve izhuba, nemhande yaMwali umpenyu, akale ikashomeja newhi lyopezhulu kungilozi ina jakapiwa isimba lyokuchinya inyika negungwa, 3 iti, "Musichinye inyika kana igungwa nemiti, kuswikila tabiga imhande pehuma jabashingi baMwali." 4 Ndakachiwha chilabo chabakabigwa imhande, izana lozwiulu namakumi mana anazwiulu zwina, beva muluji lwose lwabana banhulumyana baIzilayeli, 5 boluji lwaJuda bakabeli igumi lyozwiulu nozwiulu zwibili bakabigwa imhande, boluji lwaRubheni igumi lyozwiulu nozwiulu zwibili, boluji lwaGadi igumi lyozwiulu nozwiulu zwibili, 6 boluji lwaAsha, igumi lyozwiulu nozwiulu zwibili, boluji lwaNafutali igumi lyozwiulu nozwiulu zwibili, igumi lyozwiulu nozwiulu zwibili boluji lwaManase, 7 igumi lyozwiulu nozwiulu zwibili boluji lwaSimioni, igumi lyozwiulu nozwiulu zwibili boluji lwaLevi, igumi lyozwiulu nozwiulu zwibili boluji lwaIsaka, 8 boluji lwaZebhuloni igumi lyozwiulu nozwiulu zwibili, boluji lwaJosefa igumi lyozwiulu nozwiulu zwibili, boluji lwaBhenjamini igumi lyozwiulu nozwiulu zwibili.