Marcos 6

Jesu unopa kulya zwiulu zwishanu

30 Bapositoli bakabungana kuna Jesu bakonzuwila zwose zwabakata nezwabakalayija. 31 Wakati kwabali, "Izhani tinde kubugalo bulosisika tibe toga, tinyetutukwe pashoma." Banji bakabezha bamwe benda, yezwi zwakabakashayisa unshaji kana wokulya. 32 Bakenda nobwato kubugalo busina banhu, beli boga.

33 Banhu banji bakababona benda, bakonziba bakalabukila kwakale beva mumizi yose, bakabatangila kuswika kwakale. 34 Wakati abhuda, wakabona banhu banji akabawhila ishe, nokuti bakaba beli semhwizi jisina uncheji; wakatanga kubalayija zwinhu zwinji kasa. 35 Unshaji pawakapela, balayijwa babe bakezha kwaali bakati, "Timo mushango lisina banhu akale unshaji wapela, 36 Babujeni bende kumakuta nokumisha, benozwitengela zwokulya."

37 Koga wakashandula akati kwabali, "Imwi bapeni zwokulya."

Bakati kwaali, "Tinde kunotenga zwinkwa zwemali inoshoba mazana mabili amasheleni, tibape belye kani?"

38 Wakati kwabali, "Zwingana zwinkwa zwamuna nazwo? Indani munolinga."

Pabakaziba bakati kwaali, "Zwishanu nehobe imbili."

39 Wakabuja kuti begajike banhu bose pasi mumakapo pobuhwa bunyolo. 40 Bakagala pasi mumakapo abanhu izana, bamwe makumi mashanu. 41 Feno wakatola zwinkwa zwishanu nehobe imbili akalinga kudenga akaboka, akamedula zwinkwa akapa balayijwa babe kuti bebape, nehobe imbili akajikobela bose. 42 Bakalya bose bakaguta. 43 Baka bunganisa zwimedu zwezwinkwa muzwitundu igumi lina zwibili zwakazhajwa nehobe. 44 Bakalya zwinkwa baluba banhulume baluba zwiulu zwishanu.