1 Yezu da bah niŋa ka keŋ Geudiya so’olum ti gaat Geɔdan mɔɣir la. Ka nirikooŋ da le gilig U ka U pa’an ba a aa Ɔŋ n poŋin ni it se’em la.

2 Farasiinam baseba da tana bɔɔt yi ba mak U beh, ka bɔ’ɔh U yii, <<La tar sɔr yi buraa lebih u pɔɣa?>> 3 Ka U lebih ba yii, <<Moozis da te nɔɔr yi ya iŋ yeledee la yela?>> 4 Ka ba yel yii, <<Moozis da te nɔɔr yi buraa tɔ’ɔn golih gbauŋ zaɣah bompɔk ka kar u.>> 5 Ka Yezu yel ba yii, <<ya sũya la n kpɛ’ɛm la zugu ka u yel yi ya golih yela. 6 Ka teŋ pĩ’ĩlug ni na, 'Na’ayen da maal ba la bompɔk ni buraa.’ 7 'Ŋwala zugu, buraa nan bah u ba’ ni u ma’ ka naa ni u pɔɣɔ, 8 ka ba bayi la pana nan a ningbiŋ kakɔ̃.’ 9 Yela zugu niriseba ka Na’ayen zaŋ laɣum la so so da yelig baa.>>

10 Ba n da leb yirin la U nya’andolib la da le bɔ’ɔh U yeledee wa mi. 11 Ka U lebih ba yii, <<Burase’e n lebih u pɔɣɔ ka tɛɛ di kakɔ̃ tom la kamboh, 12 ka bompɔɣɔse’e mi n zaɣah u ser ka leb ɛl, tom la kamboh.>>

13 Nirib da tar bibibih ken Yezu sa’ani na yi U zaŋ U nu’ug paɣɛl ba zut; ka U nya’andolib la da sa’ahit ba. 14 Ka Yezu N da nyɛ yela la, U poor da pu pɛɛge, ka U yel ba yii, <<Bah mi ka bibibih la tã N sa’ani na, ka da gu’urin baa; ka Na’ayen tensoŋ so’olum la a la bam den. 15 Yelemɛŋir ka N yet ya wa, so n pu dɛ’ɛ Na’ayen so’olum la a aa bibibih ha kun maalin kpɛ̃ ka nii.>> 16 U pana da ŋwɔ̃ɣɔ ba U nu’uhin, ka kã maal ba.

17 Yezu N da dɛ’ɛgit sɔr yi U keŋ la, buraa se’e da zo na dɔ̃bel U tɔɔn ka bɔ’ɔh U yii, <<Pa’an pa’al Soŋaa, n nan iŋa yela ka paa vonse’eb n ka ba’ahug la?>> 18 Yezu lebih u yii, <<Yela ka i bɔɔn Mam yi Pa’an pa’al soŋa? Nir pu be a sommaa, lan ka Na’ayen ma’a. 19 I mi Na’ayen nɔdiŋa la: 'Da ko’ nira; Da tom kamboh tooma; Da zuu; Da maɣara; Da fã so’o; na’ahum i ba’ ni i ma.> >> 20 Ka u leb yel U yii, <<Pa’alaa, mam it laa woo mi m biilimi na.>> 21 Yezu da wol u ki’i ni nɔŋir ka yel u yii, <<Bon nkɔ̃ ka i pu tara; kema, ni i ti kɔɔh se’el woo ka i tar, zaŋ ligiri la te tarenam, ka i nan tar laɣat tensoŋ yir; ka pana tana dol Mam.>> 22 Un da wom ŋwala la, la da sãɣum u sũũr mi ka u keŋ kul, den zugo, u da a la bontat.

23 Yezu da pana beh kaa kaa ka yel U nya’andolib la yii, <<La nan a kpɛ’ɛmiri tet bontatib yi ba kpɛ̃ Na’ayen Tensoŋ Na’am Yir la!>> 24 Ka U nya’andolib la da ya’ nɔya won taaba yit yelese’a ka ba wom ma. Ka Yezu da le yel ba yii, <<Biihaa, Na’ayen tensoŋ na’am yir la kpɛ̃’ɛ̃ kpɛ’ɛm mi! 25 La nan a naana tet wɔɣun* yi u kpɛ̃ fupiim vɔ̃ɔ̃r, ni gaat bontat yi u kpɛ̃ Na’ayen tensoŋ na’am yir la.>> 26 La da iŋ ba la pakir ka ba ya’ nɔya ka yet taaba yii, <<Ŋwala wa, ka ɔn n pana nan nyɛ fããgire?>> 27 Yezu da ŋmɛrig wol ba ka yel yii, <<Di tɔ tet la saalib ka Na’ayen sa’ani la, a la pu tɔɔ.>> 28 Ka Pita da yel Yezu yii, <<Behima, tam bah se’el woo mi ka dol nyɛ.>> 29 Yezu da yel yii, <<Yelemɛŋir ka N yet ya wa, so pu bah u yir, bee bɛɛnam, bee yebih, bee tɔ̃ɔ̃h, bee ma’ bee ba’ bee biih bee samana Mam zugu ni Na’ayen yelesomir la zugu, 30 ka kun nyɛ wɔ̃ɔ̃t dɔɣɔl paa kɔbig zina beoga, ka yɛ’, bɛɛnam ni yebih, tɔ̃ɔ̃h, manam ni biih, samana zaŋ namihug nan paa seba n ɛɛt vom n kumba’ah beog ha laa. 31 Ka seba berigu n gaat tɔɔn la nan ti leb nya’aŋ ka seba n be nya’aŋ la gaat tɔɔn.>>

32 Ba da be la sɔr la zugu, doot Geruzalɛm, ka Yezu da ken gaat ba tɔɔn ha; la da iŋa pakir te ba, ka dabɛɛm da sãã seba n dol la. U da le tar ba piiga ni bayi la leb nkpeŋ ti pĩ’ĩl yet ba se’el n nan iŋ U, 33 yet yii, <<beh mi nii, ti yɛ’ doora Geruzalɛm ka ba nan zaŋ Asaal Dawɔɔ te malemadem kpɛ’ɛnam ni wara pa’alib la ka ba nan di U sariya ka zaŋ U te yi ba ko’; ba nan zaŋ U te Nivozaalih la; 34 ba nan kɛɛr U, ka tobih nantɔ̃ɔ̃t ma U, ka ŋmɛ U, ka ko’ U; ka dabiha atã daar U nan vo’o ya’ah.>>

35 Gemis ni Geon n a Zebedii dawɔɔh la, da gaat na yel U yii, <<Pa’ala, ti bɔɔt yi I iŋ se’el woo ka ti bɔ’ɔh I sa’ani te ti.>> 36 Ka U da yel ba yii, <<La a la nan ka ya bɔɔt yi N iŋ te ya?>> 37 Ka ba yel U yii, <<Bahum ka ti zi’in, nkɔ̃ I dituŋ nu’ug, nkɔ̃ I gɔbig nu’ug, I Na’am la poŋi.>> 38 Ka Yezu yel ba yii, <<Ya pu mi yan bɔ’ɔhit se’el laa. Ya nan ŋwũ ŋmanse’er ka Mam ŋwũraa, bee dɛ’ɛ sose’eb taab ka ba so Mam maa?>> 39 Ka ba lebih yii, <<Ti nan nyaŋ.>> Ka Yezu yel ba yii, <<Ŋmanse’er ka Mam ŋwũũt la ya nan tɔ’ɔn ŋwũ, ni sose’eb ka ba so Mam la ba nan tɔ’ɔn so yam mi; 40 amaa ya zi’in n dituŋ nu’ug bee n gɔbig nu’ug la, lan ka Maan nan te yaa, ka la a la seba zugu ka ba poɣin deŋ maahum diŋ la.>>

41 Ba nya’andolib pii la n da ti wom ŋwala la, ba da iŋa sũũr ni Gemis ni Geon. 42 Ka Yezu da bɔɔl ba yel yii, <<Ya mi yi Nivozaaliha tinsok seba ka ba mi yi ba a la ba tɔɔngatib la pu beh nyɛt tarenam laa, kpɛ’ɛnam la mɛlihit tarenam la mi. 43 Ka la pu nar yi la a yela yam tinsoko, ka so woo n bɔɔt kpe’eoŋ yam tinsok nan lebig ya ntomit, 44 ka so woo n bɔɔt yi u a ya tɔɔngat nan lebig ya zã’ã da’abir. 45 Asaal Dawɔɔ la pu tana yi ba tom te U wa, ka Ɔŋ tom te nirib, ka zaŋ U vom kããb te saalib berigu.>>

46 Ba da tã Geriko na. Ka Ɔŋ ni U nya’andolib la ni nirikooŋ n da bahit Geriko la, Batimaus n a fɔɔ ka a soh-soh ka mi a Timaus dawɔɔ la, da zĩ la sɔrin. 47 Un da wom yi la a la Yezu n yi Nazarɛt na la, u da pĩ’ĩl ãrigit nkɔr yet yii, <<Yezu, Devit dawɔɔga, zom nimbɔ̃’ɔ̃g!>> 48 Nirib berigu n da tãhit u yi u gɔ’ɔ u vuut la, ka u da malegun ãrig gaat yela, <<Devit Dawɔɔga, zom nimbɔ̃’ɔ̃g!>> 49 Ka Yezu tɛk zɛ’ɛl ki’i ka yel ba yii, <<Bɔɔl mi ni u ka u tana.>> Ka ba da bɔɔl fɔɔ la ka yel u yii, <<Dĩ’ĩhum sũũr, dɔɔ ma ka U yi i tana.>> 50 Ka u da lob u fugɔbig bah ka vadɔɔ kalam tã Yezu sa’ani na. 51 Ka Yezu yel u yii, <<I bɔɔt yi N iŋa lan te i?>> Ka Batimaus yel U yii, <<M Pa’ala, ke ka n nini wa wo’o ka n leb nyɛt.>> 52 Yezu da yel u yii, <<Kema, ka i sera sakir la te i tebuk.>> Nila nila ka u leb nyɛt ka laɣan dol U ken.