Lucas 8

27 Ta ehole ɛduboa Yesu o ngondo, moto omɔti ɔ ibonga, ɔdaka na miembo mibe, adoa asaka na nde. Ehole eyai ailwaka bisendja ko aidaka ta ndako noko emɔti, endolo ta makila. 28 Ɔenɛ yo Yesu, agama, akwa magunda boso ba nde ko abala na ngulu boo: «Ma mbai nɔsɔ wɛ nda, Yesu, Mwana ɔ Ndjambe Oonɔi Diko? Naongɔnɔkɔ, pɛpɛ otungeani oko!» 29 Yesu abala na kpati odii mwembo mobe boo maimwane odii yo. Mwembo mua mobe mamokondjaka mbala djike; banangaka mabɔ na mako na minyɔɔlɔ tina ɛ omobanea, endolo adaka seko omikanyola ko mwembo madaka mamokola oko ta bisobe. 30 Yesu amohɔdja boo: «Kombe ɛ wɛ nda?» – «Kombe ɛ mbai edii "Bike"», asɔmbɛdja bea. Tina ɛ boo, miembo mibe mike maingeaka odii yo. 31 Ko miembo mia mibe maongɔɔnɔ Yesu boo atamiloma ta mombɔndɔ ma mbɛngɛ.

32 Bea, ena mbuti, bwela ba ngulu bonɛnɛ badaka bahombe mia ma oyaka diko la ngomba. Miembo mibe maongɔɔnɔ Yesu boo abapɛ enɔli ɛ oingea ta bwela bua ba ngulu. Yesu abapa enɔli. 33 Miembo mibe maimana odii moto ona ko maingea odii ngulu. Bwela bua ba ngulu badonga diko la ngomba bahilingoana ko badinda ta ibeke. 34 Babanei ba ngulu ɔɛnɛ bo modjɔ mua imanɔɔ, batia ko bananganedja gala ta ibonga na ta ngando ikɛkɛkɛ. 35 Bato baimana tina ɛ oɛnɛ moda imanɔɔ modjɔ mua. Baimea mbuti na Yesu ko batanea moto oimusedjama miembo mibe: adii ta mako ma Yesu, alwali bisendja, ko yongi ɛ nde ɛɛsɔmbɔ. Ko badaka na bɔɔ.