Lucas 8

Mwa mwali ɔ Yailo ko mwali ona ɔbinga esendja ɛ Yesu

40 Ta ihule la Yesu ta ngambo ekina ɛ ibeke, aosɔmɔ na bato bike, tina ɛ boo bamoombaka. 41 Ta ehole ena, moomi omɔti ɔ komb’ɛ Yailo aimea. Adaka kumu ɔ ndako ɛ miongɔɔnɔ ɛ Bayuda. Akwa magunda ta mako ma Yesu ko amongɔɔnɔ bo akɛɛ ta ndako ɛ nde, 42 tina ɛ boo adaka na mwa mwali oko omɔti, ɔ mbua mbuti na doomi na babae, adaka mbuti na ogwa. Ehole ɛdaka Yesu akɛɛ oho, bato bike bamombambamedjaka mɔngɔ masusu. 43 Mwali omɔti adaka ena na epeko ɛ itanga la makia mbua doomi na babae. Abungedja odiheli ba nde bosusu odii minganga, endolo moto omɔti aihɔnɔ omoheledja. 44 Asabatea na Yesu osangɔngɔ ko abinga sɔngɔ ɛ esendja ɛ nde. Oko ena ambuku, makia makina otanga. 45 Yesu ahɔdja boo: «Obingini nda?» Bato basusu baingana ko Piɛlɛ abala boo: «Molehi, bato bike baohiki ko baombambamedjai mɔngɔ masusu.» 46 Endolo Yesu asɔmbɛdja boo: «Moto omɔti abingini, tina ɛ boo naoki ngulu ɛ Ndjambe eimani odii mbai.» 47 Mwali aenɛ boo bamotɔngɔli. Na bea akɛɛ na mongongoma mosusu, akwa magunda boso ba Yesu. Amodjebedja boso ba bato basusu tina ɛ mobinga na nde ko moda mahela na nde ambuku. 48 Yesu abala na nde boo: «Mwa mbai mwali, edhimeli ɛ wɛ eoheledjai. Kɛɛ na ogoo.»

49 Oko Yesu apeli abala, moto omɔti adonga ta ndako ɛ kumu ɔ ndako ɛ miongɔɔnɔ ɛ Bayuda ko abala na Yailo boo: «Mwa wɛ o mwali agwi. Pɛpɛ otungea molehi.» 50 Endolo Yesu amooka ko abala na Yailo boo: «Pɛpɛ obanga, dhima oko odhima, mwa wɛ mwali ahelalea.» 51 Ehole eimea yo ta ndako, aidhima boo moto omɔti aingee engbanga na nde, dongedja oko Piɛlɛ, Yoani, Djake, ko na sango na nɛngɛ mwana. 52 Bato basusu bayeaka ko basayeanaka ta tina ɛ mwana. Bea Yesu abala na bu boo: «Pɛpɛ oyeani. Agwiti, ahwɛli hiɔ.» 53 Bamosɛkɛ, tina ɛ boo badjeba boo mwana agwi. 54 Endolo, Yesu apea mwana ta ebɔ ko abala na moholi mopipo boo: «Mwa mbai mwali, emaa!» 55 Asɔmbɔ ta mohelo ko aema ambuku. Yesu abala na bu boo bamopɛ mia ma oyaka. 56 Baboti ba nde baluma na okamoa, endolo Yesu abala na bu boo batadjebedja moto omɔti modjɔ muu mosakɔɔmɔ.