Lucas 8

27 Ehole eduboaka Yesu o ngondo, momi omɔti o ibonga imina aduaka asakana na nde. Momi omina adaka na miembo mibe donga ehele, ailwaka bisendja aidaka ta ndako, endolo ahelamaka ta makila. 28 Ehole enɛkɛ yo Yesu, asadumbaka ta mako ma nde ko alɛbɛkɛ na moholi mopipo: «Eka apalaka wɛ na mbi nda, Yesu, Mwana o Ndjakomba onɔi odiko li losusu? Nongɔni, pɛ botungeani!» 29 Tengasa Yesu abalaka na mwembo mobe moime adi yo. Mwembo momina modaka momodumba mbala na mbala; bamonangaka mɔmɔ na mako na sɛni tine bomobanea, endolo adjilenakaka ko mwembo mobe momolomaka ta bisika bi etengelenge. 30 Yesu amohɔdjɔkɔ: «Kombe e wɛ nda?» Amosɔmbedjaka: «Kombe e mbi Banɛnɛ.» Tengasa miembo mibe minɛnɛ mikweaka na nde. 31 Ko miembo mibe mimina miongɔnɔkɔ Yesu boo adae pɛ bomiloma ta mombhɔndɔ mo modidi mombɛngɛ mo mopɛ suka.

32 Bwela bonɛnɛ bo ngulu bodaka ena bayaka ta ikoli. Miembo mibe miongɔnɔkɔ Yesu amipɛ ndjea mikwe ta bwela bo ngulu. Ibea Yesu abapaka enɔi. 33 Miembo mibe mimaka adi moto omina ko mikweaka ta bwela bo ngulu. Ibea bwela bo ngulu bomina bodjilimoanaka donga ta ikoli odiko ko bodindaka ta madiba ma ibeke.

34 Ehole enɛkɛ babanei ba ngulu modjɔ momina, ko bapotaka ko bakɛkɛ atɔndɔ midjɔ mimina ta ibonga i Gelesaleta ko ta mabonga makɛkɛkɛ. 35 Bato baduaka tine bokokoledja modjɔ imu mosakɔmɔkɔ. Ehole eimeakabo mbuti na Yesu ko bataneaka moto yona ohela na miembo mibe adi na mobondo ta mako ma Yesu; alwaka bisendja ko asɔmbɔ bopele, bato basusu babangaka.