Lucas 8

27 Ko ta ehole eduboaka iyo ta ibongu, asonganaka na moto omɔti o ngando enɛnɛ emina iyo adaaka na membo mibe; masu mayai aidaka alwa bisendja ko aidaaka awɛɛ ta ndako, endelo adaaka awɛɛ oko ta makila. 28 Aɛnɛ iyo Yesu, agama na ngulu, akwa na magbunda ta mako ma nde ko abanga bobala na moholi modiko bo: «Opalakadea okɔe na mbi bo, Yesu, Mwana o Ndjakomba Onɔi Diko? Nasɛngɛi ta dii wɛ, pɛpɛ bokɔɔni oko bobe!» 29 Modjɔ mo Yesu atɔndɔkɔ mwembo mo pita bɛngi moimane ta dii moto omina. Mwembo momina momokondjaka mbala na mbala; bamonangaka mbɔti ta mabɔ ko bamoisaka mosɔngɔ ta mako bɛngi bamoosee, endelo adaaka oko adjitswakaka ko mwembo mobe modaaka moamotomba seko ta etengelenge. 30 Yesu amowadjaka bo: «Kombe e wɛ nda?» Yo amosɔmbedja bo: «Ebole.» Modjɔ mo membo mibe minɛnɛ mikweya na nde. 31 Ko membo mibe mimina miangɔnɔ Yesu bo adae pɛpɛ bomiloma ta mombɔndɔ mo pɛpɛ suka*8, 31 Mombɔndɔ mo pɛpɛ suka: edii esika ekadikame ngulu dji membo mibe ta bɔlɔkɔ boindja ta mokanda mo Ndje 9.1;11.7.

32 Bwela bonɛnɛ bo ngulu bodaaka boayaka ta ngomba. Membo mibe miangɔnɔ Yesu amipɛ ndjea ebokwea adii ibo. Aso amipa ndjea. 33 Iboa membo mibe mimana adii moto omina ko mikwea adii ngulu. Na mbala emɔti bwela bo ngulu bodonga diko di ngomba ko bosadumba ta ibeke ko badinda basusu. 34 Ndelo eɛnɛ babanei ba ngulu modjɔ momina, baso batia ko bakɛɛ atɔndɔ modjɔ momina ta ngando enɛnɛ ko ta miako. 35 Bato badoaka bɛngi bo baɛnɛ modjɔ momina. Baimea mbuti na Yesu ko batanea moto yo odaaka na membo mibe, ta dii na mobondo ta mako ma Yesu: moto omina, adaaka alwali bisendja ko aimeaka na iyɔngi mɛnɛ, ko bato basusu baso baluma na bɔɔ.