1 Agilipa olieel Pool bubu: «Awi yɛ nkuul yi aliaal buu li yɛ.» Pool ayendɛɛl kuɔɔl, olieel buu li ndɛ bubu: 2 «Ɔ̃kwɛn Agilipa, nonɔ̃ mɛ̃ ndi y’esɛ ki eliaal buu li mɛ̃ ke nkwel a yɛ me mbueel m’efɛn Ayuda mɛ̃. 3 Ke ngwel wɛ, yɛ yɛɛ bam ngesɛ onkɔɔ b’Ayuda y’ãndɔɔ m’ebetsuun bɔ me mɔ̃. Obobɔ, mɛ̃ mbuɛɛn yɛ, meyoo mɛ̃ y’osɛ-mwiĩ bueel.

4 Ayuda bueel ayɛɛ emfa ki ékekal mɛ̃ fa obwee o mɛ̃, onse yam e mɛ̃ ke Yelusalem. 5 Mɛ̃ éli ngɔmɔ̃ onse nkel a Afalisaye, nkel a onziã o bee, yi enduru k’etal ãndɔɔ ngesɛ-ngesɛ. Okɛɛn bɔ adzii, bɔ akoo m’otsweel wɛn taa-taa. Ke ngwel wɛ, etel-nziil bɔ ayɛɛ mɛ̃. 6 Meba, abvi mɛ̃ mbal me ndɔɔ yɛn mɛ̃ ebeta kaã me lɔɔ li éwi Nziã ankiɔɔn a bee. 7 Lɔɔ lɛn ãyam ã bee kuun ye mbuaal, m’ãbebuɛɛn Nziã y’ɔ̃tɛɛ̃ tsia mwiĩ, ãbeta kaã ndiri Nziã àsa kwɛn lɔɔ ekoo. Ee ɔ̃kwɛn, kaã olɔ li esi kwɛn Ayuda afɛn mɛ̃! 8 Otsɛn omã b’ebetsam byɛ, byɛ b’Ayuda, wɛn Nziã k’akoo k’aseel b’ákwi-ákwi wɛ? 9 Myam hɛ̃ tsɔɔn ŋ’ɛ̃kwel éketsam wɛn mɛ̃ olɔ nsi mbueel me ndɔɔ yi eluo baal nkuũ a Yeso okiool. 10 Oyɔ ndɔɔ yi ési mɛ̃ ke Yelusalem. M’omfam b’ékewa amfam b’angaa-a-Nziã mɛ̃, mɛ̃ ndɔ akiool bibi bwal. Ŋ’ákewɛɛ wɛn ebvaan bɔ àbɔɔ etumbu ki epfu, mɛ̃ éketsweel wɛn asa obobɔ. 11 Mɛ̃ ékebwel onse ãnzɔ m’ãbuɛɛn mbueel me ndɔɔ yi ewa baal etumbu, bvool ékeywɛɛn bɔ k’asiaan nkuũ a Yeso. Onge bɛn mpuru a mɛ̃ ye bɔ énduru ɔ̃ndel, mɛ̃ éketuaal bɔ mpal tiil k’ãbviil m’ãnzii.»

12 «M’emfa okyɛ, tsoo ngelemɔ̃, mɛ̃ ékeyi Damas. Amfam b’angaa-a-Nziã átam mɛ̃ okɔ y’omfam b’esiin akiool. 13 Ɔ̃kwɛn, mɛ̃ éli me nkuul, sua tal dzu, mɛ̃ mwɛn mbaa efi ywel, enduru tal m’onyɛɛn, edzii mɛ̃ ye b’áli ye mɛ̃. 14 Bee bueel ebvi me nsie, bvool mɛ̃ ngyoo nkii ngamɔ̃ eyɛɛn mɛ̃ m’ɔ̃nywã wu Ebele ndiri: "Sol, Sol, ki ebetuaal yɛ mɛ̃ mpal emã? Yɛ abetɛn nzuru yam onge ngwɛmbɛ wu abedzwaan y’ɔ̃mpaã a mfam a ndɛ." 15 Mɛ̃ mveel wɛn: "Yɛ nã li, Mfam?" Mfam obveel ndiri: "Mɛ̃ ndyam ndi Yeso wɛn yɛ ndyam abetuaal mpal. 16 Oŋɔ̃ siool, bvool tɛɛn dzu. Otsɛn be mpal mɛ̃ ola yɛ, bɔ ba: Mɛ̃ èsuul yɛ ɔ̃sal a mɛ̃. Yɛ àkal ntam a mɛ̃, me ndɔɔ yi ayɛɛn emfa ki emwɛn yɛ mɛ̃ nonɔ̃, yɛ hɛ̃ àliaal m’ekieel esuo mɛ̃ yɛ ke nkwel. 17 Mɛ̃ ekieel ebvuul yɛ me mviɔɔl mi Ayuda, ye mi baal bɛn k’Ayuda wɛ, b’ètam mɛ̃ yɛ ola bɔ. 18 Mɛ̃ ètam yɛ m’odzweel o bɔ mviil, kwɛn bɔ apal onse lempeel aya ke mbaa, bvool kwɛn bɔ apal onse waan e Satana, aya ola Nziã. Bɔ akiool mɛ̃, bɔ àbɔɔ odzeel b’ãbi, bvool akab ɛ̃swal ɛ̃ ba ngel."»

19 «Obobɔ, ɔ̃kwɛn Agilipa, mɛ̃ ke nkwɛɛn k’elweel m’émwɛn mɛ̃, m’ã́fi ola Nziã wɛ. 20 Ŋ’ɛ̃kwel, mɛ̃ ntee baal a Damas, ke mbee oŋɔ̃ ntee ba Yelusalem, ntee ke Yude wueel ye baal bɛn k’Ayuda wɛ. Mɛ̃ ngyɛɛn wɛn ebvaan bɔ akaal ɛ̃kwal, bvool akɔɔl ola Nziã, asa ãndɔɔ m’ãsuo kwɛn bɔ akaal ɛ̃kwal. 21 Obɔ otsɛn b’esiin Ayuda mɛ̃ onse Nzɔ a Nziã, bvool abii k’abam mɛ̃. 22 Kɛn onge bɛn Nziã abekiaal mɛ̃, mɛ̃ kɛn ndi mwiĩ, bvool ebeyɛɛn kɛn oyɛɛn me ndɔɔ a Yeso ke nkwel akiɔɔl y’akuul. M’ebeliaal mɛ̃, m’élieel Moyize y’aliaal-ɛ̃kiɛɛn a Nziã bakyɛ. 23 Bɔ álieel ndiri Mãsia akieel amwɛn fool. Bɔ hɛ̃ álieel ndiri ndɛ akieel akal mbuul wu ɛ̃kwel wu àsiool onse b’ákwi-ákwi, bvool àtee Nsia yɛn onge mwiĩ wu asa kwɛn Ayuda ye bɛn k’Ayuda wɛ abɔɔ obvuul.»

24 Ŋ’ékeliaal Pool buu li ndɛ, Fesitus olieel kokɔ ndiri: «Pool, yɛ ye laa li? Yɛ ɛ̃nkaan ɛ̃nduru, bu eti yɛ laa!» 25 Pool obveel ndiri: «Mfam Fesitus, mɛ̃ ke ndi ye laa wɛ. Ke yam, ãyɛɛn m’eyɛɛn mɛ̃ ãli mã taa-taa, bvool ãli mã y’otsɛn. 26 Ɔ̃kwɛn Agilipa oyɛɛ ãndɔɔ mã mbueel, obɔ otsɛn bɛn mɛ̃ eyɛɛn ye ndɛ k’ebveel kuul mbee wɛ. Mɛ̃ nkiool wɛn ndɛ yi adzɛɛn pyɛ, ke ngwel wɛ ãndɔɔ omɔ̃ mbueel k’ãbwel m’edziɔɔn wɛ. 27 Ɔ̃kwɛn Agilipa, yɛ abekiool m’élieel aliaal-ɛ̃kiɛɛn a Nziã? Mɛ̃ ngyɛɛ wɛn yɛ abekiool mɔ̃!» 28 Agilipa olieel Pool ndiri: «Yɛ ŋ’atsam wɛn yɛ olɔ si kwɛn mɛ̃ nkal ɔ̃kiool me lio etsi-tsiri bubu?» 29 Pool bu abveel ndiri: «Ekal alili ŋã, ekal ke mbee ãlio bibi, mɛ̃ nzii kwɛn, me mpɛn a Nziã, yɛ ye b’abeyoo mɛ̃ nonɔ̃, ekal onge mɛ̃, kɛn a byɛ k’ekal mã mpaa bubu wɛ!»

30 Obobɔ, ɔ̃kwɛn Agilipa ye mfam Fesitus, ye Belenise, ye bueel b’áli me nsɛn ye bɔ, atɛɛn. 31 Ŋ’eyii eyi bɔ, bɔ abvi oyɛɛn bam-a-bam ndiri: «Mbuul wu yi asi pyɛ yɛn ebvaan ndɛ akwa wuo asam bwal.» 32 Me b’otal Agilipa, ndɛ olieel Fesitus bubu: «Al’okɛɛn mbuul wu k’asɔɔ kwɛn Sedzaal atsiil ndɔɔ a ndɛ wɛ, kɛn ekeepaal ndɛ.»