1 Me lio li ékeyɛɛn Piɛɛl ye Dzaã kɛn y’embuul, angaa-a-Nziã ye mfam a ankiaal a Nzɔ a Nziã y’Asaduseyɛ̃, apal ola bɔ. 2 Bɔ ayii mpuru bibi me ndɔɔ yi emwɛn bɔ antam ange-buaal abeyiool baal bvool abetsal bɔ nsia ndiri, onge bɛn Yeso osiool onse b’ákwi-ákwi, b’ákwi-ákwi hɛ̃ akieel asiool. 3 Bɔ asiin bɔ, bu alɔ bwal tiil k’etsi bviil, ke ngwel wɛ tal al’emeeyel. 4 Ŋ’esa oŋɔ̃, baal bibi onse b’ayoo ãtee ã bɔ akiool Yeso. M’emfa okyɛ, ɔ̃bvɛn wu akiool otɔ nku-a-nku amiil ataan (5.000).

5 Ŋ’etsi bviil, amfam b’Ayuda, y’akuul-kuul b’ola, y’ayiool b’ãngel abvɔɔn ke Yelusalem. 6 Ãnã wu ngaa-a-Nziã wu ɔ̃nɛn, ye Kayife, ye Dzaã, y’Alekesandele bvool ye baal bam bueel ba yam li ngaa-a-Nziã, áli oŋɔ̃. 7 Bɔ asuul Piɛɛl ye Dzaã kal-a-kal a bɔ, bu abvi bɔ ɛ̃mfuul ofuul ndiri: «Me mpɛn a nã yi eboo byɛ mbuul wu? Me nkuũ a nã yi esi byɛ obobɔ?»

8 Obobɔ, Piɛɛl wu oluul m’Ɔ̃fel wu Ɔ̃nsensal, obveel bɔ bubu: «Amfam b’ola y’akuul-akuul, 9 nonɔ̃, abvi bee ɛ̃mfuul ofuul me ndɔɔ obvɛ b’esi bee mbuul nga-elyam, bvool me ndɔɔ emfa ki ebvuul ndɛ. 10 Ngesɛ! Ebvaan kwɛn byɛ bam bueel ye yam li Isalayel eyɛɛ ngesɛ wɛn, eli me mpɛn a nkuũ a Yeso Mãsia wa Nadzalet, yɛn mbuul wu otɛɛn ŋã ke nkwel a byɛ nzuru kɛɛ-kɛɛ. Yeso ondɛ, wu ébɛɛl byɛ m’enkulusu, bvool wu éseel Nziã. 11 Ndɛ wu Yeso oli mbuul wu eyɛɛn Ɔ̃nkaan a Nziã ndiri:

"Nkɔɔn yɛn, byɛ b’atuu ebee,

yɔ eyii nkɔɔn yi nkiin a nzɔ✝4.11 Ãnz 118.22."

12 Obvuul abɔɔ kɛn a me ndɛ. Nzal-a-ŋɛn, k’eli ye nkuũ nkyam yi éwi Nziã baal, yɛn bia-byɛ ol’ebvuul me yɔ wɛ.»

13 Ŋ’emwɛn baal a mbal yi nɛn ãŋã m’éli a Piɛɛl ye Dzaã, esi bɔ ɛ̃kam bibi, ke ngwel wɛ bɔ amwɛn kwɛn bɔ áli baal ba ngwel-a-ngwel, bɛn k’ási ekɔɔl wɛ. Bɔ bu ayeyɛɛ kwɛn Piɛɛl ye Dzaã b’áli ye Yeso. 14 Kɛn onge bɛn bɔ amwɛn mbuul wu ábvuul ondɛ tɛ tsotsoo antam ange-buaal, bɔ k’abebɔɔ ndɔɔ yi abveel wɛ. 15 Obobɔ, bɔ atam antam ndiri apal onse mbal yi nɛn. Bɔ abvi otsuun bam-a-bam ndiri: 16 «Bia-byɛ baal ba bwɛn esa bɔ? Ke ngwel wɛ, baal bam bueel b’akal ke Yelusalem ayɛɛ bam taa-taa ndiri bɔ baal b’asi emvieel ki, bia-byɛ olɔ k’ebee ndɔɔ oyɔ wɛ. 17 Oŋɔ̃, me ndɔɔ yɛn nsia yi ebee onse baal bam bueel okɔɔn, bia-byɛ edzuru bɔ ãtswi wɛn bɔ mbuul si ngɔmɔ̃ me nkuũ a Yeso obeyɛɛn wɛ.»

18 Obobɔ, ati Piɛɛl ye Dzaã mbel, bu awi bɔ ãnkunkwa bam ndiri abee bvool obeyɛɛn, wuo obeyiool me nkuũ a Yeso. 19 Kɛn a Piɛɛl ye Dzaã abveel bɔ bubu: «Emeetal bam me byam: Eli ngesɛ ke nkwel a Nziã kwɛn bee eyoo ndyam wu Nziã wuo eyoo byɛ? 20 Me b’otal bee, bee k’ekoo m’okal pi m’ãndɔɔ m’emwɛn bee ye m’eyoo bee wɛ.» 21 Ke mbee oŋɔ̃, baal a mbal adzuru bɔ k’ãtswi bvool, bu ayɔɔl bɔ. Ke ngwel wɛ, bɔ k’abɔɔ elyal ki awa bɔ etumbu wɛ, me ndɔɔ yɛn baal bueel ákelweel Nziã m’ãndɔɔ m’ã́bwel. 22 Mbuul wu ábvuul m’emvieel okyɛ áli me mvel ãku-ãnã (40) y’esiɔ.

23 Ke mbee a ŋ’ayɔɔl Piɛɛl ye Dzaã, bɔ ayɛn ol’andoo a bɔ, bu alieel bɔ mam bueel m’éyɛɛn angaa-a-Nziã b’anɛn y’akuul-kuul bɔ. 24 Ŋ’eyoo bɔ ãndɔɔ omɔ̃, bɔ bam bueel ãtsam ngãmɔ̃ abuɛɛn Nziã bubu: «Mfam, yɛ mbuul wu ábuo ywel, ye nsie, y’ãdza ye bvieel bvi eli onse eluɔ obvɛ. 25 Yɛ mbuul wɛn me nkuul yi Ɔ̃fel wu Ɔ̃nsensal, áyɛɛn m’ɔ̃nywã a nkiɔɔn a bee David wu ɔ̃sal a yɛ ndiri:

"Ndɔɔ mã yi eli ɛ̃kiri onse kɔɔ-kɔɔ,

bvool yɛn ãyam ãbekuru ãmfoo mɛn otsɛn pyɛ?

26 Akwɛn a nsie awel ɔ̃yɛɛl me ndɔɔ a mvel,

bvool amfam abvool mfoo,

m’obee o Mfam Nziã ye Mãsia a ndɛ."✝4.26 Ãnz 2.1-2

27 Ke ngwel wɛ, eli bam taa-taa kwɛn Elode ye Ponse Pilate ál’abvool mfoo onse bviil li y’anzii, bvool ye baal b’Isalayel. Éli m’obee b’ɔ̃sal a yɛ wu ɔ̃nsensal, Yeso, wu ésuul yɛ Mãsia. 28 Obobɔ, bɔ asi ãndɔɔ mam mbueel m’édzii yɛ, ye m’ékuru yɛ ye waan lueel. 29 Me lio li, Mfam, tal emfa ki eŋaan bɔ bee, oŋɔ̃ sa kwɛn asal a yɛ atsal Nsia a yɛ y’ãŋã bibi. 30 Ndɛɛl kuɔɔl e yɛ, kwɛn oŋɔ̃ baal abɔɔ obvuul, bvool kwɛn eliĩ y’emvieel emɔɔn me nkuũ a Yeso wu ɔ̃sal a yɛ wu Ɔ̃nsensal.»

31 Ŋ’eman bɔ obuɛɛn, nsie ebvi nzuru onziool ke mboo yi éli bɔ, bɔ bam bueel aluul m’Ɔ̃fel wu Ɔ̃nsensal, bu atsal Nsia a Nziã y’ãŋã mbueel.

32 Akiool bam bueel ákekal m’ɔ̃dzi, ɔ̃kwal ngɔmɔ̃, ãtsam ngãmɔ̃. Mbuul wu ákeyɛɛn ndiri eluɔ e ndɛ bvi ndyam k’áli wɛ, kɛn eluɔ bvieel éli bvi bvoo. 33 Ye waan li nɛn lueel, antam ákesuo kwɛn Yeso Mãsia ásiool onse b’ákwi-ákwi, nyiĩ a Nziã yi nɛn éli ye bɔ bueel. 34 Mbuul si ekal ngɔmɔ̃ onse bɔ wu ákekaan m’eluɔ k’áli wɛ, ke ngwel wɛ bueel b’áli y’ãnguun wuo ãnzɔ áketiɔ mɔ̃, ákeya ye nzi oyɔ, 35 ákewa yɔ ol’antam. Bɔ ákekab yɔ, mbuul bwɛn a mbuul ákebɔɔ boo li ekoo me kɔɔ e ndɛ. 36 Obobɔ Dzedzef, wu éloo antam me Balanabas, ŋ’ayɛɛn ndiri «mbuul wu awa baal mpɛn», wu áli mbuul wa yam li Lebvi wu ola bo Swipele, 37 otiɔ nguun a ndɛ, bu ayewa nzi ol’antam.