1 Kaha Yesu uasanene vandongisi vendi likumi na vavali, kaha uavahanene nzili yakama ha vimbembesi via vipi, nakuvihumisa, nakukanguisa mishongo yoshe na vaka kuvavala. 2 Mazina a tunganda likumi na vavali aua, uakulivanga Simoni uje ivatumbula nguavo Petulu, na munaina Anduleo, na Yakomba muna Zembendeo, na munaina Yiuano. 3 Filipu na Mbatolomeo, Tomasi na Mateu muka kutambula lisimu, na Yakomba muna Alufeya, na Tandeo, 4 Simoni uaku Kanana, na Yunda Sakaliote uje uendele Yesu vungungu.

5 Kaha Yesu uatumine likumi na vavali, uavashikile nguendi, "Keti muye kuli vaje keti Vayunda, kaha keti mukovele mu nganda ya Samaliya. 6 Vuno honi yeni ku vampanga vaje vazimbala va mu njivo ya Isaleli. 7 Kaha oku muli nakuya ambululeni ngueni, ‘Vumuene vua muilu vuli muyehi.’ 8 Kanguiseni vaka kuvavala, hinduleni vaka kutsa, kanguiseni vaka mbumba, muhumise mahamba. Muatambuile kuakuhona kufueta, kaha haneni kuakuhona kufuetesa. 9 Keti muambate Ngolinde cipue Siliva cipue vunengu mu vinkombe vieni, 10 keti muambate cola ha vungezi vueni cipue vikovelo vivali cipue vinkaku, cipue mbueti, omo muka kupanga napande kutambula vije viatonda.

11 "Kaha nganda cipue limbo lioshe mukovela, tondeni muntu iya uje napande ku mitambula muacili, kaha tumameni nendi noho mukahumamo. 12 Omo mukovela mu njivo, menekeni vaje muuanamo. 13 Kaha nga muje mu njivo vanamitambula muacili, ciyulo ceni cikale navo, vuno honi nga kuvamitambuile muacili, kaha ciyulo ceni cimihilukile. 14 Kaha nga kuli umo uje kamitambula cipue kuvuilila ku mezi eni, kaha totomoneni likungu ku viliato vieni, omo muhuma muje mu njivo cipue muje mu nganda. 15 Muavusunga njimileka nguange, ha litangua lia kusompa Njambi akahana kashitiko cikuma ku cihela cije kupulakana Sondoma na Ngomola.

16 "Taleni, njimituma ngue vampanga hakati ka tungunga, kaha zangameni ngue manoka kaha ononokeni ngue mavembe. 17 Zangameni ku vantu, muomu vakamituala ku vinzango, na kumipupanga mu vinjivo viavo via malombelo. 18 Kaha vakamituala ku vanguvulu na kuli vimiene muomu yange, linga cikapue vukaleho kuli vakevo na kuli vaje keti Vayunda. 19 Omo vamituala, keti mulishoshomuene mumuka handekela cipue vimukahandeka, muomu vije vimukahandeka vakamihanavio ha ntsimbu ije. 20 Muomu keti yeni mukahandeka, vuno honi Cimbembesi ca Ishueni cikahandeka muli yeni.

21 "Muntu akatuala munaina mukutsa, kaha ishe akatuala munendi, kaha vana vakaluisa visemi vavo na kuvatsihisa. 22 Kaha vakamizinda voshe muomu ya lizina liange. Vuno honi uje akakateya na kumamanusuilo akovoka. 23 Omo vamiyandesa mu nganda imo, teueleni mukuavo, muavusunga njimileka nguange kumukendangana mu vinganda vioshe via Isaleli ntsimbu kanda Muna Muntu eje.

24 "Ndongisi kasa kupulakana mulongisi uendi, cipue ngamba kupulakana muene uendi. 25 Capande ngeci ndongisi kupua ngue mulongisi uendi, na ngamba kupua ngue muene uendi. Nga vanatumbula muene ua njivo nguavo Mbelezembulu, kaha cikapua vati ku vaka njivo yendi.

26 "Nankuma keti mukale na liova navo, muomu kukuesi civanafuiki civakahona kufukula, cipue cakushueka civakahona kuzivuka. 27 Vinjimileka mu milima mu vihandeke mu ceke, kaha vije vimuvua vayeveta vihandekeleni helu lia njivo. 28 Kaha keti muivuile liova vaje vatsiha lika muvila vuno honi kuvasa kutsiha muono, vuno honi ivuileni liova uje asa kunongesa muono na muvila mu ngehena. 29 Nkuma keti tumpiasa vavali vakavalandesa ha muuaya uaya umo ndi? Vuno honi naumo uavo uahi akau ha mavu kuakuhona cizango ca Ishueni. 30 Vuno honi yeni cipue vinkambu via ku mitue yeni vanavitanda. 31 Keti muvue liova, nankuma yeni muli naseho yakama kupulakana tumpiasa vavengi.

32 "Uoshe uje anjitava hakati ka vantu, nange naua njikamutava kuli Tate uje ali muilu, 33 vuno honi uoshe uje akanjiviana ku mesho a vantu, nange naua njikamuviana ku mesho a Tate uje ali muilu.

34 "Keti musinganieke ngueni njinanehe ciyulo ha mavu, kunjezile nakuneha ciyulo, vuno honi nzita. 35 Njineja nakulinga muana aluise ishe, kaha muana uampuevo aluisa vaina, vainamueno aluise vanayemueno, 36 Kaha vitozi va muntu vakapua vavushoko vendi.

37 "Uoshe uje azanga ishe cipue ina cikuma kupulakana yange kaha kanjipandele, kaha uoshe uje azanga munendi ua yala cipue uampuevo cikuma kupulakana yange kaha kanjipandele, 38 kaha uoshe uje kambata cilindakano cendi nakuhona kunjikava kaha kanjipandele. 39 Kaha uoshe uje atonda muono uendi akauzimbalesa, kaha na uoshe uje a zimbalesa muono uendi muomu yange akau uana.

40 "Uoshe uje amitambula natambula yange, kaha uoshe uje anjitambula natambula uje uanjitumine. 41 Kaha uoshe uje akatambula kananguizi muomu napu kananguizi akatambula vuana vua kananguizi, kaha uoshe uje akatambula yala ua vusunga muomu ikeye napu yala ua vusunga akatambula vuana vua yala ua vusunga. 42 Kaha uoshe uje ahana kuli umo uava vanike vavandende cipue lika nganja ya mema akutontola muomu napu ndongisi, muavusunga njimileka nguange kakazimbalesaho vuana vuendi."