1 Ambahoni Yesu vamutualele kuli Cimbembesi mu mpambo linga vakamueseke kuli Liyavolo. 2 Ualiuminine kulia ha matangua makumi auana vutsiki na mutania, kaha hanima yakuliumina kulia uevuile njala. 3 Kaha muka kumueseka uezile kuli ikeye nakuhandeka nguendi, "Nga u Muna Njambi, shika aua mavue linga ahimpuke mbolo."

4 Vuno honi Yesu uamukumbuluile nguendi, "Vanacisoneka nguavo, ‘Muntu kasa kuyoya na mbolo lika houe, vuno honi na mezi oshe aje Njambi ahandeka.’"

5 Ambahoni Liyavolo uamutualele mu nganda ya kulela, uamuhakele helu lia kashongua ka Njivo ya Njambi. 6 Kaha uahandekele kuli ikeye nguendi, "Nga u Muna Njambi," "liumbile ha mavu. Muomu vanacisoneka nguavo,

"‘Akashika tungelo vendi hali yove,

kaha vakakukavuila na mavoko avo, linga viliato viove keti vikansunsuke ku mavue.’"

7 Yesu uamukumbuluile nguendi, "Vanacisoneka naua nguavo, ‘Keti ueseke Muene Njambi yove.’"

8 Kaha naua Liyavolo uamutualele ha munkinda ualaha cikuma, uamumuesele vumuene vuoshe vua hano ha mavu na vumpau vuavuo. 9 Kaha uahandekele kuli Yesu nguendi, "Vioshe evi njikakuhanavio, nga ukatsikama ha mavu na kunjilemesa."

10 Yesu uamukumbuluile nguendi, "Huma kuli yange Satana! Muomu vanacisoneka nguavo, ‘Ukalemesa Muene Njambi yove na kumupangela ikeye lika!’"

11 Ambahoni Liyavolo uamusezele, kaha tungelo vezile nakumukuasa.

12 Omo Yesu uevuile nguendi Yiuano vanamukutu, kaha uayile ku Ngalileya. 13 Kaha hakuhuma mu Nazaleta uayile nakukakala mu Kapenauma kuyehi na cisali ca Ngalileya, mu nginga ya Zembuloni na Nafetali, 14 linga cije cahandekele kananguizi Isaya cilishulisise nguendi:

15 "Cihela ca Zembuloni na cihela ca Nafetali,

vije viakala mu ngila yakuya ku cisali, kulutue lua Yundau,

Ngalileya, cifuti ca vaje keti Vayunda.

16 Vantu vaje vakala mu milima

vanamono ceke cakama.

Kaha na vaje vakala mu cihela na mu cimbembe ca kutsa,

ceke cinavatuila."

17 Kuhuma ha ntsimbu ije Yesu uaputukile kuambulula nguendi, "Tengulukeni ku vipi vieni, muomu Vumuene vua muilu vuli muyehi."

18 Omo Yesu uakele nakuenda kucikulo ca cisali ca Ngalileya, uamuene muntu na munaina, Simoni uje ivatumbula Petulu na munaina Anduleo, vatele manda avo mu cisali, muomu vapuile vakakuta vantsi. 19 Kaha Yesu uahandekele kuli vakevo nguendi, "Njikaveni, kaha njikamipuisa vakakuta vantu." 20 Kaha hajevene vasezele manda avo nakumukava.

21 Omo uakele nakutualelelaho kuya kaha naua uamuene muntu na munaina, Yakomba muna Zembendeo na munaina Yiuano mu vuato hamo na ishavo Zembendeo vakele nakutungulula manda avo, kaha uavasanene. 22 Kaha hajevene vasezele vuato na ishavo, kaha vamukavele.

23 Yesu uahitanganene mu Ngalileya muoshe, nakulongesa mu vinjivo viavo via malombelo, na kuambulula Muzimbu Uacili ua Vumuene nakukanguisa mishongo yoshe ya vantu yakuliseza seza na vakakuvavala. 24 Kutsimana cendi cevuikile naku Siliya kuoshe, kaha vamunehelele vaka kuvavala voshe, na vaka mishongo yakuli seza seza na kuvua kuvavala, na vaka mahamba, na vaka kushinia, na vaka tulepa, kaha voshe uavakanguisile. 25 Kaha vivunga viakama via vantu viamukavele kuhuminina mu Ngalileya, namu Ndekapolisi * na ku Yelusalema, na ku Yundeya, na musinia lia ndonga ya Yundau.