1 "Keti musompe vakueni, linga neni keti vamisompe. 2 Muomu kusompa cije musompa naco vakueni, cikeco civakamisompa naco, kaha seteko ije museteka nayo vakueni, ikeyo ivaka miseteka nayo. 3 Nkuma vika umuena cishoni cili ha lisho lia muanoko, vuno honi ku umono mukambo uje uli mu lisho liove? 4 Cipue vika uhandeka kuli muanoko nguove, ‘Teua njikuhumise cishoni cili mu lisho liove,’ vuno honi yove ulina mukambo mu lisho liove? 5 Yove muka civembulu! Ha kulivanga humisa tahi mukambo uje uli mu lisho liove, ambahoni umone muacili hakuhumisa cishoni cije cili mu lisho lia muanoko.

6 "Keti muhane vije via kulela ku tutali, muomu vaka mitengulukila nakumiluisa. Keti mumbile vusanga vueni vuaseho kulutue lia vangulu, muomu vaka vuliatangela na viliato viavo.

7 "Lomba, kaha uka tambula, tonda, kaha ukauana, tota kaha vaka kushokoluela cikolo. 8 Muomu uoshe uje alomba atambula, kaha uoshe uje atonda auana, na uoshe uje atota vaka mushokoluela cikolo. 9 Nkuma iya hakati keni nga munendi amulomba mbolo, kaha ikeye amuhana livue? 10 Cipue nga amulomba intsi, kaha ikeye amuhana linoka? 11 Kaha nga yeni vaka vupi, muzivuka kuhana mavuana acili kuli vana veni, kaha cikafua vati honi kuli Ishueni uje ali muilu uje akahana viuma viacili kuli vaje vamulomba!

12 "Kaha vioshe vije mutonda ngueni vakueni vamilingilevio, neni naua valingilenivio, muomu eli likelio Lishiko lia Mosesa na vilongesa via tunanguizi.

13 "Koveleni mu cikolo ca cindende, muomu cikolo cakama na ngila yaco yapua yayasi ije ituala kukunonga, kaha na vaje vakovelamo vapua vavengi. 14 Vuno honi cikolo ca cindende na ngila yaco yapua ya ikalu, ije ituala ku muono, kaha na vaje vaiuana vapua vavandende.

15 "Zangameni na tunanguizi va makuli, vaje veja kuli yeni mu vuzalo ngue vampanga, vuno honi mukati kavo vanapu tungunga vamu musenge. 16 Muka vazivukila ku vushuka vuavo. Nkuma vushuka vua viniu vaka vutomona ku muti ua mungonga, cipue vushuka vua mukuyu ku shaku ije ili na mingonga ndi? 17 Mucifua cimo vene muti uoshe uacili ukemi vushuka vuacili, vuno honi muti ua upi ukemi vushuka vua vupi. 18 Muti uacili kuuasa kuima vushuka vua vupi, kaha naua muti ua upi kuuasa kuima vushuka vuacili. 19 Muti uoshe uje kuuimi vushuka vuacili vaka uteta naku umbila mu tuhia. 20 Nankuma muka vazivukila ku vushuka vuavo.

21 "Keti muntu uoshe uje ahandeka kuli yange nguendi, ‘Muene, Muene,’ akakovela mu Vumuene vua muilu, vuno honi kuvanga lika uje alinga cizango ca Tate uje ali muilu. 22 Ha litangua lije vavengi vakahandeka kuli yange nguavo, ‘Muene, Muene! Nkuma kutuahandekele vunanguizi mu lizina liove, nakuhumisa mahamba mu lizina liove, kaha nkuma kutualingile viuma viavingi viakukomouesa mu lizina liove ndi?’ 23 Ambahoni njikahandeka kuli vakevo nguange, ‘Kunjamizuvukile, humeni kuli yange, yeni vaka kulinga via vipi!’

24 "Kaha muntu uoshe uje evua aua mezi ange naku akavangeya napu ngue uje yala uakuzangama uje uatungile njivo yendi ha mavu a mavue. 25 Kaha kalunga uanokele, na livazi liezile, kaha mpunzi yezile nakuningangesa ije njivo. Vuno honi kuyauile, muomu luvula luayo valutungilile ha mavu a mavue.

26 "Vuno honi uoshe uje evua aua mezi ange, kaha ka akavangeya, napu ngue uje yala ua cilema uje uatungilile njivo yendi ha museke seke, 27 Kaha kalunga uanokele, na livazi liezile, kaha mpunzi yapekumukile nakuningangesa ije njivo, kaha yauile, kaha kuua cayo capuile cacipi cikuma!"

28 Kaha omo Yesu uamanusuile kuhandeka viuma evi, vivunga via vantu vialikomokelele ha kulongesa cendi. 29 Muomu uavalongesele ngue uje alina nzili yakama keti ngue valongisi vavo va mezi a mashiko.