1 Ha ntsimbu ije Yesu uahitile mu mehia a tiliku ha litangua lia Sapalalo. Vandongisi vendi vatsile njala, kaha vaputukile kutomona mitue ya tiliku nakulia. 2 Vuno honi omo Vafaliseho vacimuene vahandekele kuli Yesu nguavo, "Tala vandongisi vove valinakulinga vije lishiko kulitavesa kulinga ha litangua lia Sapalalo."

3 Kaha Yesu uavakumbuluile nguendi, "Nkuma kumuatandele vije Ndaviti ualingile na vaje vakele navo omo vatsile njala, 4 muje muakovelele mu njivo ya Njambi nakulia mbolo ije ivalambuile kuli Njambi, cije kucapuile lishiko kuli ikeye ku ilia cipue vaje vakele navo, vuno honi kuvanga lika vasasendote ndi? 5 Cipue nkuma kumuatandele mu lishiko vati muje ha litangua lia Sapalalo vasasendote mu Njivo ya Njambi muvapokuele mashiko a ha litangua lia Sapalalo, vuno honi kuvakele na mulonga ndi? 6 Njimileka nguange, cuma cakama kupulakana njivo ya Njambi cino cili hano. 7 Kaha nga muazivuka vika evi vilumbununa, ‘Njatonda cikeketima, keti nkombelo,’ ngue kumuahisile vaje kuvesi na mulonga. 8 Muomu Muna Muntu ikeye Muene ua litangua lia Sapalalo."

9 Yesu uahumine ku cihela cije kaha uayile nakukakovela mu njivo yavo ya malombelo. 10 Kaha taleni, kuje vene kuakele yala uakusekua livoko, kaha vehuile Yesu nguavo, "Nkuma lishiko litavesa kukanguisa ha litangua lia Sapalalo ndi?" Vatondele linga vamuvangeyeleho.

11 Kaha Yesu uahandekele kuli vakevo nguendi, "Nga umo haliyeni ali na mpanga kaha auila mu cina ha litangua lia Sapalalo, nkuma kumuasa kumuhumisamo ndi? 12 Nkuma muntu kapuile uaseho cikuma kupulakana mpanga! Nankuma, cinapande kuya ku lishiko kulinga cacili ha litangua lia Sapalalo." 13 Ambahoni uahandekele kuli uje yala nguendi, "Olola livoko liove." Kaha uje yala uoluele livoko liendi, kaha liolokele kupua hamo nalikuavo.

14 Vuno honi Vafaliseho vatuhukilemo kaha vakatumbile vutumbe muje vati vasa kutsihila Yesu.

15 Vuno honi Yesu uazivukile vutumbe vuavo, kaha uahumineko. Kaha vavengi vamukavele, kaha voshe uavakanguisile. 16 Kaha uavashikile nguendi keti vamutsimanese. 17 Eci capuile linga vilishulisise vije viahandekele kananguizi Isaya nguendi,

18 "Taleni ngamba yange injinahangula,

uje injazanga kaha muli ikeye muono uange uvuahelela.

Njikahaka Cimbembesi cange hali ikeye,

Kaha akahandeka vusunga kuli vaje keti Vayunda.

19 Kakakalaho na vimpata cipue kulila,

kaha na umo uahi akevua lizi liendi mu vitapalo.

20 Kakapokolaho lihongo liakuhenga

Kakazimiho tuhia tuje tucili nakutuhuisa vuisi.

Kuvanga noho nanehe vusunga ku kuhiana."

21 Kaha mu lizina liendi mukemo vakatsiliela vaje keti Vayunda.

22 Ambahoni vantu vamo vanehelele Yesu yala uje ua kapuputua nakuhona kuhandeka uje uakele na lihamba kaha uamukanguisile, kaha uje yala ua kaveveve uaputukile kuhandeka nakumona. 23 Kaha vantu voshe valikomokelele cikuma nakuhandeka nguavo, "Nkuma ou keti ikeye muna Ndaviti ndi?"

24 Vuno honi omo Vafaliseho vaviuvuile vahandekele nguavo, "Kuvanga lika na nzili ya Mbelezembulu muene ua mahamba, ikeyo ou yala yalinakuhumisa nayo mahamba."

25 Yesu ha kuzivuka visinganieka viavo kaha uahandekele kuli vakevo nguendi, "Vumuene vuoshe vuje vukalitepe hakati nakuliluisa vukalipihisa, naimo yahi nganda yakama cipue njivo ije ililuisa ikeyo vavenia ikemana. 26 Kaha nga satana ahumisa mukuavo satana, kaha nalitepe hakati ikeye vavenia, kaha vatihoni vumuene vuendi vukakola? 27 Kaha nga njikahumisa mahamba na nzili ya Mbelezembulu, nkuma na nzili yeya vana veni vaka humisa? Nankuma vakevo vakamisompa. 28 Vuno honi nga njikalikuasesa Cimbembesi ua Njambi mukuhumisa mahamba, kaha Vumuene vua Njambi vuneja hali yeni.

29 "Cipue vatihoni muntu asa kukovela mu njivo ya yala uanzili nakuambata viuma viendi, nkuma keti tahi akuta uje yala uanzili ndi? Ambahoni apukule njivo yendi.

30 "Uje kesi nange anjiluisa, uje kalipandakana nange ashandola. 31 Nankuma njimileka nguange, vupi vuoshe nakushaula coshe ca vantu vakavikonekela, vuno honi kushaula Cimbembesi Uakulela kuvaka cikonekela. 32 Kaha uje uoshe ahandeka lizi lia kuluisa Muna Muntu vakamukonekela, Vuno honi uje uoshe ahandeka viakuluisa Cimbembesi Uakulela kuvaka mukonekela cipue mu miaka ino cipue mu miaka ije ilinakuija.

33 "Kukala na vushuka vuacili kuvanga muti uauo upue uacili, cipue kukala na muti ua upi na vushuka vuauo vupua vua vupi, muomu muti vakauzivukula ku vushuka vuauo. 34 Yeni vana vamanoka, muasa kuhandeka vati viacili omo yeni muapua mu vaka vupi? Muomu vije viashula ku mutima vikevio kanua kakahandeka. 35 Yala uacili akahumisa viuma viacili vije viakatulika mu citulikilo cendi ca cili, kaha yala ua mupi akahumisa viuma via vipi mu citulikilo cendi ca cipi.

36 "Njimileka nguange, ha litangua lia kusompa vantu vaka vasompa kuya ku mezi avo aje avakahandeka akuhona seho, 37 muomu kuya ku mezi ove mukemo muvaka kusompa kaha kuya ku mezi ove akeuo avakakuhisa nauo."

38 Ambahoni vamo valongisi va mezi na Vafaliseho vahandekele kuli Yesu nguavo, "Mulongisi tutonda yove linga utulingileko cimueso."

39 Vuno honi uavakumbuluile nguendi, "Vantu vavupi na vupangala vantsimbu ino vakevo vatonda cimueso, vuno honi nacimo cahi cimueso civakavahana kuvanga lika cimueso ca kananguizi Yona. 40 Muomu Yona uakele muzimo lia intsi ha matangua na matsiki atatu, mucifua cimo vene na Muna Muntu akakala mu vukalo vua vatsi ha matangua na matsiki atatu. 41 Vantu vaku Ninive vakemana ha litangua lia kusompa na vantu vantsimbu ino kaha vaka vahisa, muomu vatengulukile ku vipi viavo ha kuambulula ca Yona, kaha taleni cuma cakama cikuma kupulakana Yona cino cili hano. 42 Lisano uaku Shemba akemana ha litangua lia kusompa na vantu vantsimbu ino nakuvahisa, muomu uahumine kuntsongo ya cifuti kuija nakuvuilila mana a Solomoni, kaha taleni umo uakama kupulakana Solomoni uno ali hano.

43 "Omo cimbembesi cacipi cihuma muli muntu, cikahiti mu vindinda kutonda kuakuhuimina, vuno honi kucekuuana cipue hamo. 44 Ambahoni cihandeka nguaco ‘Njihilukila ku njivo yange kuje njahuminine.’ Kaha omo cihiluka ciuana ije njivo mupulungua, muakukomba nakuivuahesa muje muinapande kukelamo. 45 Ambahoni ciya nakuambata vikuavo vimbembsi vitanu na vivali vije via vipi cikuma kupulakana cikeco, kaha vakovelamo nakukakalamo, kaha cifua ca uje yala ca mamanusuilo cikapua cacipi kupulakana caha kulivanga. Omu mukemo vene mu vakafua na vantu vantsimbu ino."

46 Tele Yesu acili nakuhandeka ku vantu, taleni vaina na vamunaina vemanene hambanza, vatondele linga vahandeka nendi. 47 Kaha umo ua vantu vaje kuje uamulekele nguendi, "Tala, vanoko na vamuanoko vanemana hambanza vatonda kuhandeka nove."

48 Vuno honi Yesu uamukumbuluile nguendi, "Iya vanana, kaha iya naua vamuanetu?" 49 Kaha uoluele livoko liendi kuli vandongisi vendi nakuhandeka nguendi, "Ava vakevo vanana na vamuanetu! 50 Muomu uoshe uje alinga cizango ca Tate ua muilu ikeye napu muanetu ua yala na uampuevo na nana."