1 Honi omo Yesu uamanusuile kuhandeka evi, uahumine mu Ngalileya uayile ku cihela ca Yundeya musinia lia ndonga ya Yundau. 2 Kaha civunga cakama ca mukavele, kaha ua vakanguisile kuje.

3 Vafaliseho vamo vezile kuli ikeye nakumueseka, mukumuihula nguavo, "Nkuma capua lishiko yala kukondola mpueyendi ha mulonga uoshe indi?"

4 Nankuma Yesu uavakumbuluile nguendi, "Kumuatandele nguavo uje uavatangele ku maputukilo ua vatangele yala na mpuevo." 5 Uahandekele nguendi, "Muomu hacifua eci yala akaseza vaishe na vaina na kulipandakana hamo na mpueyendi, kaha vavali va kapua muvila umo lika." 6 Kaha kuvapu vavali vuno honi vapua muvila umo lika. Kaha cije Njambi napandakana hamo naumo muntu uahi napande kucihangununa.

7 Kaha Vafaliseho vahandekele kuli ikeye nguavo, "Nkuma vikahoni Mosesa uashikile umo yala kuhana mukanda uakukondola kuli mpueyendi nakumusheka?"

8 Kaha Yesu uahandekele kuli vakevo nguendi, "Muomu yakukaluua ca mitima yeni Mosesa uamitavesele linga mukondole vampuevo veni, vuno honi hambangelo kucapuile ngoco. 9 Kaha njihandeka kuli yeni nguange, uoshe akondola mpueyendi, kuakuhona kulinga vupangala, nakuambata mpuevo ueka, kaha alinga vupangala."

10 Vandongisi vahandekele kuli ikeye nguavo, "Nga mukemo ngoco hali yala na mpueyendi, nkuma cacili kuhona kuambata."

11 Vuno honi uahandekele kuli vakevo nguendi, "Keti muntu uoshe atambula evi vihandeka, kuvanga lika kuli vaje vava navihana. 12 Muomu kuli vamo vaje kuvasa kuambata muomu vasemukile muje vene, kaha kuvali vamo vaje kuvasa kuambata muomu vantu vanavalingimo, kaha naua kuvali vamo vaje kuvambata muomu vanalingi vakevo vavenia ngoco vene muomu ya Vumuene vua muilu. Kaha uoshe uje atambula evi, avitambule."

13 Ambahoni vanehele vanike vavandende kuli Yesu linga avasaleke mavoko endi nakuvalombelela. Vuno honi vandongisi vatenukilile vaje vantu vavanehele. 14 Vuno honi Yesu uahandekele nguendi, "Eceleni vanike vavandende veje kuli yange, keti muvavindike, muomu Vumuene vua muilu vunapu vuavo."

15 Kaha uavasalekele mavoko endi kaha uayile.

16 Kaha taleni, umo muntu uezile kuli Yesu nakumuihula nguendi, "Mulongisi, cuma muka cacili njapande kulinga, linga njikakale na muono uayaye?"

17 Yesu uahandekele kuli ikeye nguendi, "Vika unjihuila vije viacili?" Kuli lika umo ikeye uacili. Vuno honi nga utonda kukovela mu vuyoye, niunga mashiko.

18 Uje muntu uamuhuile nguendi, "Vika?"

Kaha Yesu uamukumbuluile nguendi, "Keti ukatsihe, keti ukalinge vupangala, keti ukeve, keti ukahane vukaleho vua makuli, 19 singimika isho na noko, kaha zanga mukueni ngue muje mu ualizangela yove vavenia."

20 Kaha uje mukuenje uamuhuile nguendi, "Vioshe evi njaviniungu." Vika naua vikuavo vinjasa kulinga?

21 Kaha Yesu uahandekele kuli ikeye nguendi, "Nga utonda kupua uakusungama, ya linga ukalandese viuli navio kaha uvihane ku vihutu, kaha ukakala na vufuko muilu, kaha ija, njikave."

22 Omo uje mukuenje uevuile evi uayile navusiua, muomu uakele na vufuko vua vuingi cikuma.

23 Kaha Yesu uahandekele kuli vandongisi vendi nguendi, "Muavusunga njihandeka kuli yeni nguange, cikapua ca cikalu kuli muka kufuka kukovela mu Vumuene vua muilu. 24 Njimileka naua nguange, ca casi kamelu kuhita mu lisho lia nguya, kupulakana muka kufuka kukovela mu Vumuene vua Njambi."

25 Omo vandongisi vovuile eci, valikomokelele cikuma, nakuhandeka nguavo, "Kaha iya honi akovoka?"

26 Vuno honi Yesu uavatalele nakuhandeka kuli vakevo nguendi, "Eci cacikalu ku vantu vuno honi kuli Njambi vioshe viapua viaviasi."

27 Ambahoni Petulu uahandekele nguendi, "Tala, tuaseze vioshe nakukukava. Vika honi tukakala navio?"

28 Yesu uavakumbuluile nguendi, "Muavusunga njimileka nguange, mu mavu a maha, omo Muna Muntu akatumama ha litanda liendi lia vumpau, yeni vaje muanjikavele neni naua mukatumama ha matanda makumi na avali, mukusompa miyati likumi na ivali ya Isaleli. 29 Uoshe uje naseza vinjivo viendi, cipue vamunaina vavamala, cipue vamunaina va vampuevo, cipue vaishe, cipue vaina, cipue vana vendi cipue mehia, muomu ya lizina liange, akatambula cihita ku vioshe nakusuana muono uayaye. 30 Vuno honi vavengi vaje vakulivanga vakapua vakumanusuila, kaha vakumanusuila vakapua vakulivanga."