1 Kaha omo Yesu na vandongisi vendi vahetele kuyehi na Yelusalema, vayile ku Mbetefanje ku munkinda ua Oliveta, ambahoni Yesu uatumine vandongisi vavali, 2 uahandekele kuli vakevo nguendi, "Yeni ku limbo lije lia litala neni, kaha hajevene mukauana cimulu vanamukutu na munendi, kaha vazituleni munjinehelevo. 3 Nga muntu umo akahandeka cimo kuli yeni, mukahandeke ngueni, ‘Muene ali nakuvatonda, kaha akavahiluisa mu vuasi vuasi.’"

4 Evi vialingiuile linga vilishulisise vije viahandekele kananguizi nguendi,

5 "Leka muana ua mpuevo ua Siyone nguove,

Tala, muene yove ali nakuija kuli yove

Uje uakulikehesa kaha nalondo ha cimulu,

na hali muna cimulu."

6 Kaha vandongisi vayile nakukalinga muje muava shikililemo Yesu, 7 ambahoni vanehele uje cimulu na munendi, kaha vajalele tuzaku tuavo ha miongo ya vimulu, kaha Yesu uatumameneho. 8 Vuingi vua vivunga vajalele tuzaku tuavo mu ngila, kaha vakuavo naua vatetele mintango ya miti vajalele mu ngila. 9 Kaha vije vivunga viayile halutue luendi na vaje vamukavangeyele vatambekele cikuma nguavo, "Hosana kuli Muna Ndaviti! Uakukuisula uje eja mu lizina lia Muene! Lemeseni Njambi!"

10 Kaha omo uakovelele mu Yelusalema, nganda yoshe ya lijajelelele vahandekele nguavo, "Iya ou?"

11 Kaha vivunga via vantu vahandekele nguavo, "Ou ikeye kananguizi Yesu uaku Nazaleta mu Ngalileya."

12 Kaha Yesu uakovelele mu mbalanda ya njivo ya Njambi nakusheka voshe vaje vakele nakulandesa na vaje vakele nakulanda mu njivo ya Njambi, kaha uafulumikile vimesa via vaje vakele nakulandulula vimbongo na vitumamo via vaje vakele nakulandesa mavembe. 13 Kaha uahandekele kuli vakevo nguendi, "Vacisoneka nguavo, njivo yange vakaitumbula njivo ya malombelo, vuno honi yeni muaipuisa cihela ca vezi."

14 Kaha tupuputua na vilema vezile kuli ikeye mu vimbalanda via njivo ya Njambi, kaha uavakanguisile. 15 Vuno honi omo vakuluntu va vasasendote na valongisi va mezi omo vamuene viuma viacili vije vialingile, na vanike vavandende vatambekele mu njivo ya Njambi nguavo, "Hosana Muna Ndaviti," Nankuma vanienguele cikuma, 16 kaha vahandekele kuli ikeye nguavo, "Uli nakuvua evi vivali nakuhandeka ava ndi?" Kaha Yesu uahandekele kuli vakevo nguendi,

"Eyo, nkuma kumuatandele nguavo, ‘Mu tunua tua vanike na vaje vali nakujamua mukemo mukahumu kushangala ca vusunga ndi?’"

17 Kaha Yesu uavasezele, uahumine mu nganda nakuya ku Mbetaniya kukeko kuakakosele.

18 Cimene mene omo Yesu uakele nakuhiluka ku nganda ya Yelusalema, uevuile njala. 19 Kaha omo uamuene muti ua mukuyu ku mukulo ua ngila, uayileko kaha uauaneneko nacimo cahi kuvanga maputa lika. Kaha uahandekele kuli ukeuo nguendi, "Keti ukeme vushuka naua!" Kaha hajevene uje muti ua mukuyu uomine.

20 Omo vandongisi vacimuene valikomokelele cikuma, kaha vahandekele nguavo, "Nkuma vati honi ahavene ou muti ua mukuyu unomu?"

21 Kaha Yesu uavakumbuluile nguendi, "Muavusunga njimileka nguange, nga muli na lutsilielo nakuhona kulikanouela, kumukalingi lika evi vinalingiua ku muti ua mukuyu, vuno honi cipue nga mukahandeka kuli ou munkinda ngueni, ‘Katuka linga ukaliumbile mu cisali, kaha cikalingiua.’ 22 Nga muli na lutsilielo, vioshe vimukalomba muli lombelo mukavitambula."

23 Kaha omo Yesu uakovelele mu mbalanda ya njivo ya Njambi, tele acili nakulongesa, vakuluntu va vasasendote na vakuluntu vezile kuli ikeye nakuhandeka nguavo, "Nzili muka yakama ulinakulinga nayo viuma evi, iya uakuhanene eyi nzili yakama?"

24 Kaha Yesu uavakumbuluile nguendi, "Nange naua njimihula cihula kaha nga munjikumbulula, kaha nange naua njikamileka nzili yakama injikalingi nayo evi viuma. 25 Nkuma kumbuitika ca Yiuano cahumine kuli? Cahumine muilu indi cahumine ku vantu?"

Vakele navimpata hali umo na mukuavo nguavo, "Nga tuhandeka nguetu cahumine muilu, kaha akahandeka kuli yetu nguendi, ‘Nkuma vika honi kumua mutsilielelele?’ 26 Vuno honi nga tuhandeka nguetu, ‘Cahumine ku vantu,’ kaha tuteua civunga ca vantu, omo voshe vatsilielele nguavo Yiuano uapuile kananguizi." 27 Kaha vakumbuluile Yesu nguavo, "Kutuzivuka."

Kaha uahandekele kuli vakevo nguendi, "Nange naua kunjimilekesa kuje kunjikahumisa eyi nzili yakama injili nakulinga nayo viuma evi."

28 "Nkuma yeni vika muyongolaho? Kuakele yala uje uakele na vana vavali va vamala, kaha uayile kuli uakulivanga nakuhandeka kuli ikeye nguendi, ‘Munange, lelo ya ukapange mu lihia lia viniu.’ 29 Kaha uamukumbuluile nguendi, ‘Kunjiyiko’ vuno honi muka ntsimbu lika uatengulukile nakuya. 30 Kaha uayile kuli uamucivali nakukahandeka viakulifua, kaha uamukumbuluile nguendi ‘Njiya tate,’ vuno honi kaile. 31 Nkuma hali ava vavali iya ualingile cizango ca ishe?" Vamukumbuluile nguavo,

"Uakulivanga."

Kaha Yesu uahandekele kuli vakevo nguendi, muavusunga njihandeka kuli yeni nguange, vaka kutambula lisimu na vikoyi vakovela mu Vumuene vua Njambi yeni kanda. 32 Muomu Yiuano uezile kuli yeni mu ngila ya vusunga, kaha kumua mutsilielele, vuno honi vaka kutambula lisimu na vikoyi vamutsilielele, vuno cipue vene yeni muacimuene, vuno kumuatengulukile nakumutsiliela.

33 Kaha Yesu uahandekele naua nguendi, "Ivuilileni cisimo cikuavo, Kuakele liavenia njivo uje uakunine lihia lia vushuka vua viniu, kaha uazenguisileko cipatanga, kaha uahindile cina ca kukamuinamo viniu, kaha uatungile kaposhi nakusezelako vaka kupanga, kaha uayile ku cifuti ceka. 34 Omo ntsimbu ya kuteja vushuka yakele muyehi, uatumine vangamba vendi kuli vaka kupanga, linga vakambate vushuka vuendi, 35 kaha vaje vaka kupanga vakuatele vangamba vendi kaha vapupileho umo, nakutsihaho umo, kaha nakuashaho umo mavue. 36 Kaha naua uatumine vangamba veka, kupulakana vakulivanga, kaha navakevo vene vavalingile cifua cimo. 37 Kuhuma haje uatumine munendi kuli vakevo nguendi, ‘Vaka musingimika munange.’ 38 Vuno honi vaje vaka kupanga omo vamuene uje muana, valihandekesele umo na mukuavo nguavo, ‘Ou ikeye muna uje vavenia lihia, tuyeni tumutsihe kaha tukasuana lihia liendi.’ 39 Kaha vamukuatele nakumumbila hambanza ya lihia, nakumutsiha.

40 "Nankuma omo liavenia lihia akeja, nkuma akalinga vika kuli vaje vaka kupanga?"

41 Vahandekele kuli ikeye nguavo, "Akatsiha vaje vantu va vapi kaha vakatsa mua mupi, kaha akahana lije lihia lia viniu kuvaka kupanga veka vaje vakamuhana vushuka mu ntsimbu yavuo."

42 Yesu uahandekele kuli vakevo nguendi, "Nkuma kumuatandele mu visoneka nguavio,

‘Livue lije vene vaka kutunga vavianene,

likelio linapu cisimi ca mu mbango.

Eci cikeco calingile Muene,

kaha cinapu cakukomouesa kuli yetu!’

43 Nankuma njimileka nguange, "Vumuene vua Njambi vaka miniekavuo nakuvuhana ku vantu vaje vema vushuka." 44 [Kaha muntu uoshe uje auila ha livue eli likamutetanga vipindi pindi, vuno honi nga uoshe uje likauila, likamutsena.]

45 Omo vakuluntu va vasasendote na Vafaliseho vovuile visimo viendi, vazivukile nguavo ali nakuhandeka vakevo. 46 Vuno honi omo vesekele kumukuta, vateuele civunga ca vantu, muomu vazivukile nguavo ikeye kananguizi.