1 Omo cimene cahetele vakuluntu va vasasendote voshe na vakuluntu va vantu vatumbile vutumbe vuakuluisa Yesu ngeci vamutsihe. 2 Kaha vamukutile nakumutuala kuli Pilato uje uapuile nguvulu.

3 Omo Yundasa uje uamuendele vungungu uamuene nguendi Yesu vanamuhisa linga vamutsihe, uatengulukile nakuhiluisa vije vimbongo via muuaya uaya via siliva makumi atatu ku vakuluntu va vasasendote na vakuluntu, 4 uahandekele nguendi, "Njinalingi vupi hakuenda vungungu maninga akuhona mulonga." Kaha vamukumbuluile nguavo,

"Vikahoni ovio kuli yetu? Ouo mulonga uove."

5 Kaha Yundasa uombilile vije vimbongo via muuaya uaya via siliva mu njivo ya Njambi, kaha uayile nakukalishukika.

6 Vuno honi vakuluntu va vasasendote omo vambatele vije vimbongo via muuaya uaya via siliva, vahandekele nguavo, "Kuya ku lishiko kucapandele kuvihaka mu mbango, muomu vinapu vimbongo via maninga." 7 Nankuma valitavasanene linga vavilande lihia lia uje muka kushonga vindeho, ngeci lipue lia kutsindila vangenzi. 8 Nankuma, nakuheta nalelo lino lije lihia valisana nguavo Lihia lia Maninga.

9 Ambahoni vialishulisile vije viahandekele kananguizi Njelemiya nguendi, "Kaha vambatele vimbongo via muuaya uaya via siliva makumi atatu, a ndando yendi ije ndando ivayonguele vamo vana Vaisaleli, 10 kaha vije vimbongo vavilandele lihia lia muka kushonga vindeho, ngue muje muanji shikililemo Muene."

11 Honi Yesu uemanene ku mesho a nguvulu ua Valoma, kaha nguvulu uamuhuile nguendi, "Yove Muene ua Vayunda ndi?" Yesu uamukumbuluile nguendi,

"Omu munahandeka mukemo vene." 12 Vuno honi omo vamuvangeyele ku vakuluntu va vasasendote na vakuluntu, kavakumbuluile.

13 Ambahoni Pilato uahandekele kuli ikeye nguendi, "Nkuma kuuesi nakuvua viuma evi vivali nakuhana vukaleho hali yove indi?"

14 Vuno honi kamukumbuluile cipue lizi limo, Kaha honi nguvulu ualikomokelele cikuma.

15 Honi ku ciuano uje nguvulu kuya ku lishiko liavo, uapandele kuhumisila civunga umo ua vinzinda uje ivatondele. 16 Kaha ha ntsimbu ije kuakele cinzinda uje uakuhona kuvua, ivatumbuile nguavo Mbalambasa. 17 Omo valikunguluile hamo Pilato uahandekele kuli vakevo nguendi, "Iya mutonda linga njimihumisile, Mbalambasa indi Yesu uje ivatumbula nguavo Kilistu?" 18 Muomu Pilato uazivukile nguendi omo ya cipululu cavo mukemo vamuneheleleye Yesu.

19 Oku tele Pilato natumama ha cituamo cakusompela, mpueyendi uatumine lizi kuli ikeye nguendi, "Keti ulinge cimo kuli ou yala ua vusunga, muomu njinayanda cikuma kumulota."

20 Honi vakuluntu va vasasendote na vakuluntu visindiyile vantu linga valombe Mbalambasa kaha Yesu vamutsihe. 21 Vuno honi nguvulu uavehuile naua nguendi, "Kuli ava vantu vavali iya mutonda linga njimihumisile?" Vahandekele nguavo,

"Mbalambasa."

22 Pilato uahandekele kuli vakevo nguendi, "Amba vika honi njikalinga nou Yesu ivatumbula Kilistu?" Kaha voshe vahandekele nguavo,

"Mushukike." 23 Kaha uahandekele nguendi, "Vupi muka vuanalingi?" Vuno honi voshe vatambekele cikuma nguavo, "Vamushukike." 24 Nankuma omo Pilato uamuene nguendi nacimo cauanaho cahi, vuno honi mpindangano ikaputuka, uambatele mema na kutana ku mavoko endi ha mesho acivunga, nakuhandeka nguendi, "Yange kunjesi namulonga ha maninga ou yala, limueneni yeni vavenia." 25 Kaha vantu voshe vamukumbuluile nguavo, "Maninga endi akale hali yetu na vana vetu!" 26 Ambahoni uavahanene Mbalambasa, kaha kumanusula kupupa Yesu, uavahaneneye linga vamushukike.

27 Ambahoni masualale va nguvulu vambatele Yesu nakumutuala mulipela, kaha vakunguluile civunga coshe ca masualale kuli ikeye. 28 Vamushuluile, nakumuzika kazaku ka kuvenga. 29 Kaha vavindile cilongo ca mambimbo vacihakele ku mutue uendi, kaha vamuhakele lihongo mu livoko liendi lia cilio. Vatsikamene ku mesho endi na kumushendumuna nguavo, "Uahinduka, Muene ua Vayunda!" 30 Kaha vamujekuilile, kaha vambatele lihongo vamupupile ku mutue. 31 Hanima ya kumushendumuna, vamushuluile kazaku, nakumuzika vuzalo vuendi nakumutuala mukumushukika.

32 Omo vakele nakuya, valiuanene na yala uaku Silene, lizina liendi Simoni, ou yala vamusindiyiye kuambata cilindakano ca Yesu. 33 Kaha omo vahetele ha cihela civasana nguavo Ngolongota (cije cilumbununa nguaco cihela ca Cikola), 34 vamuhanene viniu linga anue, va vishingasanene na niangua, vuno honi omo uamakeleleko, kavinuine. 35 Kaha omo vamanusuile ku mushukika, valipangezelele vuzalo vuendi hakati kavo mukuta nkela, 36 ambahoni vatumamene ha mavu oku vali nakumutalela. 37 Kaha helu lia mutue uendi vahakeleho cimueso cavije vamuhisile navio nguavio, "Ou ikeye Yesu, Muene ua Vayunda." 38 Honi vamushukikile na mihuza vavali, umo kucilio mukuavo kucimoshue. 39 Kaha vaje vakele nakuhita vamushauile, nakuningangesa mitue yavo. 40 Kaha vahandekele nguavo, "Yove uatondele kusiula njivo ya Njambi nakuitunga mu matangua atatu, liovole yove vavenia! Nga u Muna Njambi, huma ha cilindakano." 41 Nankuma naua vakuluntu va vasasendote nava valongisi va lishiko na vakuluntu vamushendumuine nguavo, 42 "Uovuele vakuavo, vuno honi kasa kuliovola ikeye vavenia. Ikeye Muene ua Isaleli, ashuluke ha cilindakano, kaha tumutsiliela. 43 Uatsiliela muli Njambi, eceni Njambi amuohiele hano vene, nga amuzanga, muomu uahandekele nguendi, Yange Muna Njambi!" 44 Kaha na mihuza vaje vavamushukikile hamo nendi vamutukile navo naua.

45 Honi omo litangua liakele hakati ka mutue kutuala ha ntsimbu ya mucitatu ya mutania uacinguezi kuakele milima ha mavu hoshe. 46 Kaha ha ntsimbu ya mucitatu ya mutania uacinguezi Yesu ualilile nakutambakana nguendi, "Eloi, Eloi, lama sambakatani?" Kulumbununa nguavo, "Njambi yange, Njambi yange, nkuma vika uanjisezela?"

47 Kaha vamo vantu vaje vemanene kuje omo vovuile eci, vahandekele nguavo, "Ou yala alinakusana Eliya." 48 Hajevene umo uavo uashatukile nakukambata mupelo, kaha ua umbuitikile mu viniu via kushasha naku ukutilila ku lihongo kaha uamuhanene linga anue.

49 Vuno honi vamo vahandekele nguavo, "Vandameneni, tuyeni tumone indi Eliya eja nakumuovola."

50 Kaha Yesu ualilile nakutambakana naua, kaha uecelele cimbembesi cendi.

51 Kaha taleni, ntanga ya mu njivo ya Njambi yatavukile hakati, kuhuma kuilu nakuheta ha mavu. Kaha mavu aningangele, na mavue atavukile, 52 na vihilo naua navio viashokolokele, kaha mivila yaingi ya vaje vaka kulela vaje vatsile yasangukile. 53 Kaha omo vahumine mu vihilo hanima yakusanguka ca Yesu, vayile mu nganda ya kulela nakukalisholola ku vantu vavengi.

54 Omo uje mukuluntu ua masualale na vaje vakele navo vaje vakele nakuniunga Yesu, vamuene mandunduma na vije vialingiuile, kaha vovuile liova cikuma nakuhandeka nguavo, "Muavusunga vene ou uapuile Muna Njambi!"

55 Kujevene kuakele naua na vampuevo vavengi, vaje vakele nakutalela halahako, vaje vakavele Yesu kuhuma ku Ngalileya oku tele vali nakumupangela. 56 Vamo vavo vapuile Maliya Mangandalena, na Maliya vaina ya Yakomba na Yosefa, na vaina ya vana va Zembendeo.

57 Omo cinguezi cahetele, kuezile yala umo ua kufuka uaku Alamatiya, lizina liendi Yosefa, uje na ikeye naua uapuile ndongisi ua Yesu. 58 Uayile kuli Pilato nakulomba muvila ua Yesu. Ambahoni Pilato uashikile nguendi linga vamuhaneuo. 59 Kaha Yosefa uambatele muvila ua Yesu naku uzengela ha ntanga ya iha ya liniu, 60 kaha ua ulangekele mu cihilo caciha cendi vavenia, cije cacokuele mu livue, kaha uakokelele livue liakama ku cikolo ca cihilo, kaha uayile. 61 Maliya Mangandalena na Maliya mukuavo vatumamene kuje oku vanatalesa ha cihilo.

62 Liamukuavo, hanima ya litangua liakulivuahesela lije likelio litangua lia Sapalalo, vakuluntu va vasasendote na Vafaliseho valikunguluilile kuli Pilato, 63 kaha vahandekele nguavo, "Muene, tuvuluka muje uje muka kukuisa uahandekele tele aciyoya nguendi, ‘Hanima ya matangua atatu njikasanguka naua.’ 64 Nankuma shika vaje tuniungi linga vaniunge muacili cihilo noho ha litangua lia mucitatu. Keti ngoconi hamo vandongisi vendi vakeja nakuiva muvila uendi, kaha vakaleka vantu nguavo, ‘Nasanguka kuvatsi,’ kaha aua makuli akukotokela akapua amapi cikuma kupulakana aje akulivanga."

65 Pilato uahandekele kuli vakevo nguendi, "Muli namuka kuniunga ua masualale, yeni mukaniunge muacili cihilo kuya muje mumuaselamo."

66 Nankuma vayile nakuniunga cije cihilo, kaha vaciniungile mukuhakako kasateso ku livue nakuhakako muka kuniunga.