1 Honi omo Yesu uasemukile mu Mbetelehema ku Yundeya mu matangua a muene Helonde, taleni vaka mana vahumine ku ngangela vezile ku Yelusalema, 2 vehuile nguavo, "Nkuma ali kuli ou nasemuka muene ua Vayunda? Tunamono ntanga tanga yendi mu ngangela, kaha tuneja nakumulemesa."

3 Omo muene Helonde uevuile eci, ualiniengele cikuma, hamo navoshe vaje vakele nendi mu Yelusalema. 4 Kaha uakunguluile vakuluntu voshe va vasasendote na valongisi va mezi a lishiko, kaha uavehuile kuje Kilistu napande kusemukila.

5 Vamulekele nguavo, "Mu Mbetelehema ku Yundeya," muomu omu mukemo muvavisonekelele kuli kananguizi,

6 ‘Nove Mbetelehema, mu nganda ya Yundeya,

keti usinganieke nguove u uamundende hakati kavaka kuyula vamu Yundeya,

muomu kuli yove kukahuma muka kuyula

uje akatuamenena vantu vange Vaisaleli.’

7 Ambahoni Helonde uasanene vaka mana muvushueke, uavehuisisile ntsimbu muka ije ntanga ntanga yasholokele. 8 Kaha uavatumine ku Mbetelehema uavalekele nguendi, "Yeni mukatondesese cikuma ha muanike ou, kaha omo muamuuana, muije muakunjileke linga nange naua njije nakumulemesa."

9 Omo vevuile vije via handekele muene kaha vayile, kaha taleni, ntanga ntanga ivamuene mu ngangela yakele kulutue luavo noho yezile nakutulila ha cihela cije hakele muana. 10 Omo vamuene ije ntanga ntanga, vavuahelelele cikuma na nzolela yakama. 11 Kaha omo vakovelele mu njivo vamuene muana na vaina Maliya, kaha vatsikamene ha mavuli avo nakumulemesa. Ambahoni vafukuile mu viambatelo viavo via vufuko nakumuhana mavuana a seho a ngolinde na ngongosi ya luengo luacili na miila.

12 Kaha hanima yakuvanangula mu cilota linga keti vahiluke kuli Helonde, vahilukile ku cifuti cavo na ngila yeka.

13 Honi omo vayile, kaha taleni, kangelo ua Muene uasholokele kuli Yosefa mu cilota kaha uahandekele nguendi, "Hinduka ambata muana na vaina, kaha teuela ku Ingito, kaha yakakale kuje noho njikakuleka, muomu Helonde alinakutonda muana linga a mutsihe."

14 Ambahoni uahindukile nakuambata muana na vaina ha vutsiki vuje vene nakuya ku Ingito. 15 Vakele kuje noho Helonde uatsile. Cije capuile kushulisisa vije viahandekele Muene kuhitila muli kananguizi nguendi, "Njasanene munange uje uakele mu Ingito."

16 Ambahoni Helonde omo uamuene ngeci vaka mana vanamukuisa, uanienguele cikuma, kaha uashikile linga vatsihe vanike voshe vava mala mu Mbetelehema na mu vihela viakulihatako, voshe vaje vakele na miaka ivali na vaje vakele muintsi lia miaka ivali yakusemuka, kuya ku ntsimbu ije yalilongesele ku vaka mana.

17 Ambahoni vialishulisile vije viahandekele kananguizi Njelemiya nguendi,

18 "Vovuile Lizi mu Lama

lizi lia kulila na kulinienga cikuma,

Lakele alila muomu ya vana vendi,

katavele kumuzembeleka,

muomu voshe vatsile."

19 Vuno honi omo Helonde uatsile, taleni, kangelo ua Muene uasholokele mu cilota kuli Yosefa mu Ingito, uahandekele nguendi, 20 "Hinduka ambata muana na vaina linga muye ku cihela ca Isaleli, muomu vaje vasinganiekele kutsiha muana vanatsi." 21 Kaha uahindukile nakuambata muana na vaina nakuya ku cihela ca Isaleli.

22 Vuno honi omo uevuile ngeci Alekelau nasuana Yundeya mu cihela ca ishe Helonde, kaha uateuele kuya kuje. Kaha honi hakumunangula mu cilota, kaha uayile ku cihela ca Ngalileya. 23 Kaha uayile nakukala mu nganda ivasana Nazaleta, linga vije vivahandekele tunanguizi vilishulisise nguavio, "Vaka mutumbula Kanazaleta."