1 "Ha ntsimbu ije Vumuene vua muilu vaka vusetekesa ngue vambanda likumi vaje vambatele vindeya viavo nakuya linga vakaliuane na liavenia vulo. 2 Vuno honi ava vatanu vapuile vilema, kaha vatanu vapuile vamana. 3 Omo vaje vambanda va vilema vambatele vindeya viavo, kuvambatele na mazi eka naua, 4 vuno honi vaje va mana vambatele mazi mu vintsazi na mu vindeya viavo. 5 Kaha omo uje liavenia vulo uakotokelele kuija, kaha voshe vaje vambanda vanengukile na kuya mutulo."

6 "Vuno honi mukati ka vutsiki vevuile mutambi nguavo, ‘Taleni liavenia vulo uje ali nakuija! Tuhukeni linga muliuane nendi.’ 7 Ambahoni voshe vaje vambanda vahindukile nakushukumisa vindeya viavo. 8 Kaha vaje va vilema vahandekele kuli vaje va mana nguavo, ‘Tuhaneniko amo mazi eni, muomu vindeya vietu vitonda kuzima.’ 9 Vuno honi vaje vambanda vamana vakumbuluile nguavo, ‘Kutupuisamo kulipangelauo yetu neni, yemuye kuli vakakulandesa linga mukalilandele yeni vavenia.’ 10 Kaha tele vanayi mukulanda, liavenia vulo uezile, kaha vaje valivuaheselele vayile nendi ku ciuano ca vulo, kaha vashokele ku cikolo."

11 "Hanima honi vaje vambanda va vilema vezile vahandekele nguavo, ‘Muene, muene, tushokolueleko.’ 12 Vuno honi uavakumbuluile nguendi, ‘Muavusunga njihandeka kuli yeni nguange, kunjimizivuka.’"

13 Nankuma zangameni, muomu kumuzivuka litangua cipue ntsimbu.

14 "Kaha naua Yesu uavalekele nguendi, Vumuene vua muilu vukafua ngue yala omo aya mu vungenzi kaha asana vangamba vendi, nakuvasezela vupite vuendi. 15 Kuli umo uahanene makulukazi atanu a vimbazuvuila via ngolinde, kuli mukuavo makulukazi avali a vimbazuvuila via ngolinde, kuli mukuavo likulukazi limo lia vimbazuvuila via ngolinde, kuya kuvipangi viavo kaha uayile. 16 Kaha uje uatambuile makulukazi atanu a vimbazuvuila via ngolinde uayile hajevene uakavilanduluile, kaha uakapangeleleho naua makulukazi atanu a vimbazuvuila via ngolinde. 17 Kaha naua na uje mukuavo uatambuile makulukazi avali a vimbazuvuila via ngolinde, uapangeleleho naua makulukazi avali a vimbazuvuila via ngolinde. 18 Vuno honi uje ngamba uatambuile likulukazi limo lia vimbazuvuila via ngolinde, uayile nakukahinda cina nakushitikamo vimbongo via muene uendi."

19 "Omo kuahitile matangua amengi muene ua vaje vangamba uehilukile kaha uatandele navo vije vimbazuvuila via ngolinde. 20 Kaha uje uatambuile makulukazi atanu a vimbazuvuila via ngolinde uezile, kaha uaneheleleho naua makulukazi atanu a vimbazuvuila via ngolinde, nakuhandeka nguendi, ‘Muene uanjihanene makulukazi atanu a vimbazuvuila via ngolinde, kaha naua njapangelaho makulukazi atanu a vimbazuvuila via ngolinde eka naua.’ 21 "Muene uendi uahandekele kuli ikeye nguendi, ‘Ualingi muacili, ngamba uacili uakulongua! Unapu uakulonua ha viuma via vindende, njikakupuisa mukuluntu ua viuma viavingi. Kovela mukuvuahelele ca muene uove!’" 22 "Kaha na uje uatambuile makulukazi avali a vimbazuvuila via ngolinde uezile kuli ikeye nguendi, ‘Muene uanjihanene makulukazi avali a vimbazuvuila via ngolinde, hano njapangelaho makulukazi avali a vimbazuvuila via ngolinde eka naua.’" 23 "Muene uendi uahandekele kuli ikeye nguendi, ‘Ualingi muacili, ngamba uacili uakunkokama! Unapu uakunkokama ha viuma via vindende, njikakupuisa mukuluntu uaviuma viavingi. Kovela mukuvuahelele ca muene uove.’" 24 "Kaha na uje uatambuile likulukazi limo lia ngolinde uezile, uahandekele kuli muene uendi nguendi, ‘Muene njikuzivuka nguange uapua u muntu uamukalu cikuma, ukateje vije ku uakuvile, kaha ukakungulula vije ku uashanduile, 25 kaha njevuile liova, kaha njaile nakushitika ngolinde yove mu livu. Viuma viove evi.’" 26 Vuno honi muene uendi uamukumbuluile nguendi, "Yove ngamba uamupi ua cilenda! Uazivukile nguove yange njikateje kuje kunjakuvile, kaha njikakungulula vije kunjashanduile? 27 Ambahoni ngue uasinganiekele kutulikisa vimbongo viange kuli vakakutulika vimbongo, kaha nga hakuija cange ngue njatambuile vije viapuile viange na kakondueso kayo. 28 ‘Mutambuleni vimbongo vije vili kuli ikeye, kaha vihaneni kuli uje ali na makulukazi avimbongo likumi. 29 Muomu uje alinavio vakamuvuezelelako, kaha akakala na viavingi, vuno honi uje kesi navio, cipue vene vije via vindende vialinavio vakamuniekavio. 30 Nakushekela ngamba uje kesi nacimo hambaza ya milima, kuje vantu vakalila na kulishumanga ku mazo’

31 "Omo Muna Muntu akeja mu vumpau vuendi, hamo na tungelo vendi voshe, kaha akatumama halitanda liendi lia vumpau. 32 Kuli ikeye miyati yoshe ya vantu ikalikungulula, kaha akavatepesa umo ku mukuavo ngue kaniungi muakatepesa vampanga ku vampembe, 33 Kaha akahaka vampanga ku livoko liendi lia cilio, vuno honi vampembe ku livoko liendi lia cimoshue. 34 Ambahoni Muene akahandeka kuli vaje vali ku livoko liendi lia cilio nguendi, ‘Ijeni, yeni vavanakuisula kuli Tate suaneni vumuene vuje vuanamivuaheselele kuhuma ha luvula lua mavu. 35 Muomu muje njakele na njala muanjihanene viakulia, kaha omo njakele na mpuila muanjihanene mema akunua, kaha omo njakele njimungezi muanjitambuile, 36 kunjakele na vuzalo kaha muanjizikile, njakele nakuvavala kaha muanjimenekelele, njakele mu kamenga kaha muezile mukunji menekela.’ 37 Ambahoni vaka vusunga vakamukumbulula nguavo, ‘Muene, kuli tuakumuene uli na njala kaha tuakulisile, cipue unevu mpuila kaha tuakuhanene via kunua? 38 Kaha kuli tuakumuene umungezi kaha tuakutambuile cipue cakuhona vuzalo kaha tuakuzikile? 39 Kaha kuli tuakumuene uli nakuvavala cipue uli mu kamenga kaha tuezile nakukumeneka?’ 40 Kaha Muene akavakumbulula nguendi, ‘Muavusunga njimileka nguange omo muacilingile ku vamo ava vamuanetu, muacilingile kuli yange.’ 41 Ambahoni akahandeka kuli voshe vaje vali ku livoko liendi lia cimoshue nguendi, ‘Humeni kuli yange, yeni vakusinga! Yeni mu tuhia tuje kutuekuzima tuje tuvanavuahesela Liyavolo na tungelo vendi. 42 Muomu njakele na njala kumuanji hanene via kulia, njakele na mpuila kumuanji hanene via kunua, 43 njapuile njimungezi kaha kumuanji tambuile, kunjakele na vuzalo kaha kumuanjizikile, njavavalele nakukala mu kamenga kaha kumuanji menekelele.’ 44 Ambahoni navakevo vakakumbulula nguavo, ‘Muene kuli tuakumuene uli na njala, cipue uli na mpuila, cipue umungezi, cipue cakuhona vuzalo, cipue uvavala, cipue mu kamenga, kaha kutuaku kuasele?’ 45 Ambahoni akavakumbulula nguendi, ‘Muavusunga njimileka nguange, ngue muje kumuacilingile kuli umo uava vavandende, kumuacilingile kuli yange’ 46 Kaha vaka vahana kashitiko ka yaye, vuno honi vaka vusunga vaka kovela mu muono uayaye."