1 Ha ntsimbu ije vandongisi vezile kuli Yesu nakuhandeka nguavo, "Nkuma iya uakama cikuma mu Vumuene vua muilu?"

2 Kaha Yesu uasanene muanike nakumuhaka hakati kavo, 3 kaha uahandekele nguendi, "Muavusunga njihandeka kuli yeni nguange, kuvanga mutenguluke kupua ngue vanike, keti ngoconi kumukakovela mu vumuene vua muilu. 4 Uoshe uje alikehesa ikeye vavenia ngue ou muanike, ikeye napu uakama mu Vumuene vua muilu. 5 Uoshe uje atambula muanike ou mu lizina liange na tambula yange.

6 "Vuno honi uoshe uje alingisa ava vanike vavandende vaje vatsiliela muli yange kulinga vupi, cacili kuli ikeye kumukutilila livue liakulolela vunga mu ntsingo yendi kaha nakumukokela ha seta ya cisali. 7 Cisingo ha mavu muomu ya vieseko vije vituala ku vupi! Muomu cilivene vieseko evi vija, vuno honi cisingo kuli muntu uje aneha evi vieseko!

8 "Kaha nga livoko liove cipue mukono uove vikulingisa linga ulinge vupi, vitete nakuviumbila kuti, cacili kuli yove kukovela mu muono oku ucisualonda cipue cilema kupulakana na mavoko avali cipue mikono ivali nakukumbila mu tuhia tuayaye. 9 Kaha nga lisho liove likulingisa linga ulinge vupi, licokovolemo nakuliumbila kuti, cacili kuli yove kukovela mu muono na lisho limo kupulakana na mesho avali aje akanehesa linga vakakumbile mu ngehena ya tuhia.

10 "Taleni keti musembulule ava vanike vavandende, muomu njimileka nguange muilu muli tungelo vaje ntsimbu yoshe vakamono cihanga ca Tate uje ali muilu. 11 [Muomu Muna Muntu uezile nakuovola vaje vanazimbala.]

12 "Vika musinganieka? Nga yala ali na vampanga cihita, kaha umo uavo nazimbala, nkuma kaseze vaje makumi atanu na auana na vatanu na vauana (99) ha munkinda nakuya mukutonda uje nazimbala ndi? 13 Kaha nga amu uana, muavusunga njimileka nguange akavuahelela cikuma muomu yendi kupulakana vaje makumi atanu na auana na vatanu na vauana (99) vaje kuvazimbalele. 14 Mucifua cimo vene Tate ua muilu katondo ngeci umo uava vanike vavandende vanonge.

15 "Nga mukueni na kupihisila, ya uye ukamuleke vije via nakupihisila, muvuvali vueni lika. Nga akuivuilila kaha uamuovola. 16 Vuno honi nga ka kuivuilila, kaha ambatako umo cipue vavali linga mezi oshe akapue navukaleho vua vantu vavali cipue vatatu. 17 Nga aviana kuvevuilila, kaha lekesako cikungulukilo, kaha nga naua aviana kuivuilila cipue ku cikungulukilo, mupuise ngue vaje keti Vayunda na vaka kutambula lisimu.

18 "Muavusunga njimileka nguange, coshe cije civakavindika hano ha mavu na muilu naua vakacivindika, kaha coshe cije civakatavesa hano ha mavu na muilu naua vakacitavesa.

19 "Kaha naua njimileka nguange, nga muvuvali vueni mulitavasana hano ha mavu ha cuma mukalomba, vaka milingilaco kuli Tate ua muilu. 20 Muomu kuje kunakungulukila vavali cipue vatatu mu lizina liange, kuje vene nange naua njili hakati kavo."

21 Ambahoni Petulu uezile kuli Yesu nakuhandeka nguendi, "Muene, nkuma lungahi njasa kukonekela muanetu nga na njipihisila? Nkuma lualuingi vintsimbu vitanu na vivali ndi?"

22 Yesu uamukumbuluile nguendi, "Njikulekesa nguange keti luakupua vintsimbu vitanu na vivali, vuno honi luakupua makumi atanu na avali na vintsimbu vitanu na vivali." 23 Nankuma Vumuene vua muilu tuvusetekesa na muene uje uatondele kufueta vangamba vendi. 24 Omo uaputukile linga avafuete, kaha vamunehelele yala uje uakele na mukuli kuli ikeye ua vimbazuvuila via ngolinde viakupua makulukazi likumi (10 0 0 0) 25 Kaha omo uje yala uahonouele kumufueta, uje muene uendi uashikile linga vamulandese hamo na mpueyendi, na vana vendi na vioshe vije viakele navio linga afuete. 26 "Kaha uje ngamba uatsikamene nakumulomba nguendi, ‘Muene acinjivandameneko tahi, kaha njikakufueta vioshe!’ 27 Kaha uje muene uevuililile ngozi uje ngamba kaha uamuecelele nakumukonekela mukuli uendi.

28 "Vuno honi uje vene ngamba omo uayile ualiuanene na umo uavakuavo vangamba uje uakele na mukuli uendi uakupua cihita ca vimbongo via muuaya uaya. Kaha uamukuatele ha milivu nakuhandeka nguendi, ‘Njifuete mukuli uange.’ 29 Kaha uje mukuavo ngamba uauililile ha mavu nakumulambelela nguendi, ‘Acinjivandameneko tahi, kaha njikakufueta.’ 30 Vuno honi uavianene kaha uamutualele mu kamenga noho hakafuetela uje mukuli uendi. 31 Omo vakuavo vangamba vamuene vije vialingiuile, kuvevuile muacili, kaha vayile nakuambulula kuli muene uavo vije vioshe vialingiuile. 32 Ambahoni uje muene uendi uamusanene nakuhandeka kuli ikeye nguendi, ‘Yove ngamba uamupi! Njakukonekelele uje mukuli uoshe muomu uanjilambelelele, 33 kaha vika honi yove ku uamuvuilileko cikeketima mukueni ngamba, ngue muje munjakuivuililile cikeketima yange?’ 34 Kaha na vutenu uje muene uendi uamutualele ku vaka kamenga linga vamuzangamese kuvanga noho akafueta mukuli uoshe uje uakele nauo."

35 "Omu mukemo vene na Tate ua muilu akalinga yeni voshe, nga kumukakonekela vamuanoko kuhuminina ku mitima yeni."