1 Hanima ya matangua atanu na limo Yesu uambatele Petulu na Yakomba na munaina Yiuano, kaha vayile hamo ku munkinda ualaha kua likaliavo lika. 2 Kaha Yesu ualihimpuile ha mesho avo, kaha na cihanga cendi caviakumine ngue litangua kaha na vuzalo vuendi vuatokele too ngue ceke. 3 Kaha taleni, ambahoni kuasholokele Mosesa na Eliya vaje vakele na kuhandeka nendi. 4 Kaha Petulu uahandekele kuli Yesu nguendi, "Muene, cacili yetu kukala kuno, nga utonda njikatunga vintsingi vitatu kuno, imo yove kaha ikuavo ya Mosesa na ikuavo ya Eliya."

5 Tele acili nakuhandeka, kaha hajevene lishelua liaku viakuma liavafuikile, kaha muje mulishelua muahumine lizi ngualio, "Ou ikeye munange injazanga, uje muli ikeye njivuahelela, muivuilileni."

6 Omo vandongisi vevuile evi, vavulumanene ha mavu, kaha vovuile liova cikuma. 7 Vuno honi Yesu uezile nakuvakuata kaha uahandekele nguendi, "Katukeni keti muteue." 8 Kaha omo vemukile mesho avo, kuvamuene ueka vuno honi Yesu lika.

9 Kaha omo vasikumukile kuhuma ha munkinda, Yesu uavashikile nguendi, "Keti valekeko muntu uoshe cije cimona, kuvanga noho Muna Muntu vanamusangula ku vatsi."

10 Vandongisi vamuihuile nguavo, "Nkuma vika valongisi va lishiko vahandeka nguavo Eliya ikeye eje tahi?"

11 Yesu uavakumbuluile nguendi, "Eliya akeja, kaha akahiluisa naua viuma vioshe, 12 vuno honi njimileka nguange Eliya neja laja, kaha kuvamuzivukile, vuno honi vamulingile muoshe muje muvatondelelemo, omu mukemo vene na Muna Muntu vakamuyandesela."

13 Ambahoni vandongisi vevuisisile nguavo alina kuhandeka kuli vakevo via Yiuano muka kumbuitika.

14 Kaha omo vezile ku civunga, yala umo uezile kuli Yesu nakutsikama nakuhandeka nguendi, 15 "Muene ivuila cikeketima munange, muomu ali na mushongo uakushinia kaha ukamuyandesa cikuma, muomu ha vintsimbu viavingi akauila mu tuhia na mu mema. 16 Kaha njamunehele kuli vandongisi vove, vuno honi kuvasele kumukanguisa."

17 Kaha Yesu uamukumbuluile nguendi, "Yeni vantu va ntsimbu ino vakuhona lutsilielo na vupi, njikakala neni lungahi? Njikamileka lungahi? Muneheni kuno kuli yange." 18 Kaha Yesu uatenukilile lije lihamba, kaha lije lihamba liahumine muli uje muanike, kaha hajevene uakangukile.

19 Ambahoni vandongisi vezile kuli Yesu muvushueke nakuhandeka nguavo, "Vika honi yetu kutuasele kuhumisa lije lihamba?"

20 Kaha Yesu uahandekele kuli vakevo nguendi, "Muomu ya lutsilielo lueni lualundende. Muavusunga njimileka nguange nga muli na lutsilielo ngue nona ya mbuto ya musalata, ngue muasa kuhandeka ku munkinda ou ngueni, ‘Huma hano ya kuje kaha ukaya, kaha na cimo cahi cimukahonoua.’" 21 Vuno honi lihamba liangacije kuliekuhuma ngoco kuvanga na lilombelo na kuliumina kulia.

22 Omo valikunguluile hamo mu Ngalileya, Yesu uahandekele kuli vakevo nguendi, "Muna Muntu vanapande kumuhana ku mavoko a vantu, 23 vaka mutsihia, kaha vakamusangula hanima ya matangua atatu."

Kaha vandongisi vevuile vusiua cikuma.

24 Omo Yesu na vandongisi vendi vezile ku Kapenauma, kaha vaka kutambula lisimu lia mu njivo ya Njambi vayile kuli Petulu nakuhandeka nguavo, "Nkuma mulongisi ueni kekufueta lisimu ndi?"

25 Kaha Petulu uavakumbuluile nguendi, "Eyo."

Kaha omo Petulu uakovelele mu njivo, Yesu uahandekele kuli ikeye ha kulivanga nguendi, "Simoni vika usinganieka? Nkuma kuli veya vimiene va hano ha mavu vakatambula lisimu? Kuli vana vavo indi kuveka?"

26 Kaha omo Petulu uakumbuluile nguendi, "Kuveka," kaha Yesu uahandekele kuli ikeye nguendi, "Nankuma vana kuvakafuete. 27 Nankuma keti tuvapihisile, ya lika ku cisali ukalovele, kaha ukambate intsi uje uamaputukilo kaha omo ukafukula mu kanua kendi ukauanamo mbongo ya muuaya uaya, kaha yakayambate nakuvahanayo, linga ikapue lisimu liange nove."