1 Kaha Vafaliseho na Vasanduki vezile kuli Yesu nakumueseka, vamuihuile linga avamuese cimueso cakuhuminina muilu. 2 Kaha uavakumbuluile nguendi, "Omo nga cinguezi, mukahandeka ngueni, ‘Kukaca vuino, muomu lilu livenga.’ 3 Kaha kucimene muhandeka ngueni, ‘Lelo kukakala mashelua, muomu lilu livenga na kuteuesa.’ Muazivuka kulumbununa cifua ca lilu, vuno honi kumuasa kulumbununa cimueso via vintsimbu. 4 Vantu vantsimbu ino va vupi na vupangala vatonda cimueso, vuno honi kukuesi cimueso civakavahana kuvanga lika cimueso ca Yona." kaha uavasezele nakuya.

5 Omo vandongisi vahetele musinia, vasuvile kuambata mbolo. 6 Kaha Yesu uahandekele kuli vakevo nguendi, "Liniungeni kaha zangameni ku cimbaluila ca Vafaliseho na Vasanduki."

7 Kaha vakele nakuhandeka hakati kavo vavenia nguavo, "Kutuezile na mbolo."

8 Kaha Yesu hakuzivuka eci, uahandekele nguendi, "Yeni valutsilielo lualundende, vika muli nakuhandeka hakati keni vavenia ngueni kumuesi na mbolo? 9 Nkuma kanda muvuisise ndi? Nkuma kumuvuluka mikasha itanu ya vimbolo ije ivalile vantu makulukazi atanu, kaha mitonga ingahi muakunguluile? 10 Cipue mikasha itanu na ivali ya vimbolo ije ivalile vantu makulukazi auana, nkuma mitonga ingahi muakunguluile? 11 Nkuma vika kumuvuisisa ngueni kunjahandekele neni via mbolo? Zangameni ku cimbaluila ca Vafaliseho na Vasanduki."

12 Ambahoni vevuisisile nguavo nkuma kavalekele kuzangama ku cimbaluila cakupangesa mbolo, vuno honi ha vilongesa via Vafaliseho na Vasanduki.

13 Honi omo Yesu uahetele ku nganda ya Sesaliya Filipu, kaha uehuile vandongisi vendi nguendi, "Vantu vahandeka nguavo Muna Muntu ikeye iya?"

14 Vamukumbuluile nguavo, "Vamo nguavo Yiuano muka kumbuitika, vamo nguavo Eliya, vamo nguavo Njelemiya cipue umo ua tunanguizi."

15 Kaha Yesu uahandekele kuli vakevo nguendi, "Vuno honi yeni ngueni Yange iya?"

16 Simoni Petulu uamukumbuluile nguendi, "Yove Kilistu, Muna Njambi uakuyoya."

17 Yesu uamukumbuluile nguendi, "Uakukuisula Simoni muna Yona! Muomu keti vuntu vuasholuele evi kuli yove, vuno honi Tate uje ali muilu. 18 Kaha njikuleka nguange yove vene Petulu, ha livue eli njikatunga cikungulukilo cange, kaha nzili ya kutsa ku ikacihiana*. 19 Njikakuhana masapi a Vumuene vua muilu, kaha coshe cije ci ukavindika hano ha mavu na muilu vakacivindika, kaha naua coshe cije ci ukatavesa hano ha mavu na muilu vakacitavesa."

20 Ambahoni uashikile vandongisi vendi linga keti valekeko muntu umo nguavo ikeye Kilistu.

21 Kuhuma ha ntsimbu ije Yesu uaputukile kulumbunuina vandongisi vendi nguendi, "Njapande kuya ku Yelusalema naku kayanda ha viuma viavingi ku vakuluntu na ku vakuluntu va vasasendote na kuli valongisi va mashiko, kaha vakanjitsiha, vuno honi hanima ya matangua atatu vakanjisangula."

22 Kaha Petulu uamuambatele nakumutuala kuali kaliavo nakuputuka kumutenukila nguendi, "Njambi vindika, Muene! Eci kucikalingiua kuli yove!"

23 Vuno honi Yesu uatengulukile nakuhandeka kuli Petulu nguendi, "Huma kuli yange yove Satana! Yove unapu citsuntsuiso kuli yange, muomu ku ukundama kuli Njambi, vuno honi ku vantu."

24 Ambahoni Yesu ualekele vandongisi vendi nguendi, "Nga uoshe uje atonda kunjikava, napande kuliviana ikeye vavenia nakuambata cilindakano cendi na kunjikava. 25 Muomu uoshe uje atonda kuniunga muono uendi aka uzimbalesa, vuno honi uoshe uje azimbalesa muono uendi omo yange aka uuana. 26 Kaha cikakuasa vika kuli muntu, nga alikunguluila viuma via ha mavu vioshe nakuzimbalesa muono uendi? Cipue vika muntu viakahana linga ahingisemo muono uendi? 27 Muomu Muna Muntu akeja na tungelo vendi mu vumpau vua Ishe, ambahoni akafueta muntu na muntu uoshe kuya ku vilinga viendi. 28 Muavusunga njimileka nguange kuli vamo hano vaje ku vakatsi kuvanga noho vanamono Muna Muntu neja mu Vumuene vuendi."