1 Yesu uahumine mu njivo ya Njambi kaha uatondele kuya, omo vandongisi vendi vezile kuli ikeye nakumumuesa vinjivo via Njambi. 2 Vuno honi uavakumbuluile nguendi, "Munamono viuma vioshe evi, indi houe? Muavusunga njihandeka kuli yeni nguange, kukuesi cipue livue limo likasala halikuavo, lije kuvakombila ha mavu."

3 Kaha omo Yesu uatumamene ha munkinda ua Oliveta, vandongisi vendi vezile kuli ikeye muvusueke nakuhandeka nguavo, "Tuleke ntsimbu muka eci cikalingiua, kaha cimueso muka cikalingiua hakuija cove na ha ntsimbu ya kuhua ca mavu?" 4 Kaha Yesu uavakumbuluile nguendi, "Zangameni linga keti umo akamikuise. 5 Muomu vavengi vakeja mu lizina liange, nguavo, ‘Yange Kilistu!’ kaha vakakuisa vavengi. 6 Kaha mukevua vinzita nakalua ka vinzita, keti mukakomoke, muomu evi viapande kulingiua, vuno honi eci keti cikeco kukotoka ca mavu. 7 Muomu lifuti likatengulukila lifuti likuavo, vumuene vukatengulukila vumuene vukuavo, ku kakala njala yakama cikuma na mandunduma ku mitambela yakuliseza seza. 8 Evi vinapu ngue kuputuka ca mushongo uakusema.

9 "Ambahoni vakamituala mukuyanda, nakumitsiha, kaha vaka mafuti voshe vaka mizinda muomu ya lizina liange. 10 Kaha ambahoni vavengi lutsilielo luavo lukahua, kaha vakalienda vungungu umo na mukuavo na kulizinda umo na mukuavo. 11 Kaha tunanguizi va makuli vavengi vakeja na kukuisa vavengi. 12 Muomu kulivuezelela ca vupi cinapu cakama, kaha cizango ca vantu vavengi cikatontola. 13 Vuno honi uoshe uje akakateya nakuma manusuilo akovoka. 14 Kaha Muzimbu Uacili ou ua Mumuene vaka uambulula ha mavu oshe, kupua ngue vukaleho ku mafuti oshe, ambahoni mamanusuilo akeja.

15 "Nankuma omo mukamona cimueso ca shuamua cije cahandekele kananguizi Ndaniele cinemana mu cihela ca kulela (Yove uli na kutanda uvuisisa muvinalumbunukila!) 16 Ambahoni eceleni vaje vali mu Yundeya vateuele ku minkinda, 17 uoshe uje hali helu lia njivo keti ashuluke ha mavu, linga ambate vije vili mu njivo yendi, 18 kaha uoshe ali mu lihia keti ahiluke kunima nakuambata cikovelo cendi. 19 Caluvinda kuli vaje vakemita na kuli vaje vakajamuesa mu matangua aje! 20 Lombeleni linga keti cikalingiue mu cisika cipue ha litangua lia Sapalalo. 21 Muomu honi ha matangua aje kukakala tuyando, tuje kutuakeleko hume hambangelo ya mavu kuheta na lelo, houe, kaha kutukakalako naua. 22 Kaha nga aje matangua kuva akehesele ngue na muntu uahi akovoka, vuno honi muomu ya vantu vendi vaje vahanguile, matangua aje vaka akehesa.

23 "Ambahoni nga umo ahandeka kuli yeni nguendi, ‘Taleni Kilistu uno!’ cipue ‘Uje ali kuje!’ keti mucitsiliele." 24 Muomu Vakilistu va makuli na tunanguizi va makuli vakasholoka nakulinga vimueso viakama na vikomoueso, linga vamizimbalese, nga casiua ngeci vakazimbalese cipue vaje vavanahangula. 25 Vuno honi taleni, njamilekela lumo ntsimbu kanda vihete.

26 "Cipue nga vahandeka kuli yeni nguavo, ‘Taleni ali mu mpambo,’ keti muyeko, cipue nga vahandeka nguavo, ‘Taleni, ali mu mulili ua mukati!’ keti mucitsiliele. 27 Muomu ngue muje muhiato ukahumu ku ngangela nakutua ceke kuheta ku kangombe ka yambi, omu mukemo mucikafua nakuija ca Muna Muntu.

28 "Kuoshe kuje kuli civimbi kukeko kukali kunguluila makuvi.

29 "Hanima ya tuyando ha matangua aje litangua likazivala, kaha ngonde kuikatu ceke, na vintanga ntanga vikaua kuhuma muilu, kaha vinzili via melu vikaninganga. 30 Ambahoni kukasholoka cimueso ca Muna Muntu muilu, kaha miyati yoshe ya ha mavu ikalila, kaha vakamona Muna Muntu eja mu mashelua a muilu na nzili na vumpau vuakama. 31 Kaha akatuma tungelo vendi na mutambi ua tolombita, kaha vakakungulula vantu vendi vahanguile kuhuma ku vimbango viuana, kuhuma ku maputukilo a mavu kuheta naku mamanusuilo."

32 "Lilongeseni cilongesa ca muti ua mukuyu, muje mintango yauo ituikilila nakuhaka maputa, kaha muazivuka ngueni ntondue ili muyehi. 33 Kaha omo mumona viuma vioshe evi, kaha muzivuke ngueni ntsimbu ili muyehi. 34 Muavusunga njimileka nguange, vantu va ntsimbu ino kuvakatsi kuvanga viuma vioshe evi vinalingiua. 35 Melu na mavu vioshe vikahita, vuno honi mezi ange kuakahu."

36 "Vuno honi litangua lije cipue ntsimbu, naumo uahi avizivuka, cipue vene tungelo va muilu, cipue Muana, vuno honi kuvanga lika Tate. 37 Ngue mucafuile ku matangua a Noua, mukemo vene mucikafua hakuija ca Muna Muntu. 38 Muomu ngue mu matangua aje tele livazi kanda lije vantu vakele nakulia na kunua, vambatele na kushombuesa, kutuala na ha litangua lije Noua uakovelele mu vuato, 39 kaha kuvazivukile kuvanga noho livazi liezile nakuvanongesa voshe, omu mukemo mu cikafua nahakuija ca Muna Mutu. 40 Kaha vamala vavali vakakala mu lihia, kaha umo vakamuambata mukuavo vakamuseza. 41 Kaha vampuevo vavali vakatua mucini cimo, kaha umo vakamuambata, mukuavo vakamuseza. 42 Zangameni muomu kumukazivuka litangua lije Muene yeni akeja. 43 Vuno honi zivukeni eci, nga liavenia njivo akazivuka ntsimbu muka ya vutsiki muizi akeja, kaha nga akavandamena, nakumona nguendi njivo yendi keti vaituve. 44 Nankuma neni naua munapande kulivuahesela, muomu Muna Muntu akeja ha ntsimbu ije kumuzivuka."

45 "Iya honi ngamba ua kulongua ua mana, uje muene uendi uamuhakele kuendesa vakuavo vangamba nakuvahana viakulia ha ntsimbu ya cili? 46 Uakukuisula uje ngamba omo muene uendi muje ahiluka amuuana alinakulinga mujevene. 47 Muavusunga njimileka nguange, akamupuisa kupua mukuluntu ua vufuko vuendi vuoshe. 48 Vuno honi nga uje ngamba ikeye uamupi kaha akahandeka kuli ikeye vavenia nguendi, ‘Muene uange neshuala kuhiluka,’ 49 kaha aputuka kupupa vangamba vakuavo, na kulia na kunua na vaka kupenda, 50 muene ua uje ngamba akeja ha litangua lije ka muvandamenene na ntsimbu ije kazivukile, 51 kaha akamuhana kashitiko na kumuhaka hamo na vaka civembulu, kuje vantu vakalila na kulishumanga ku mazo."