1 Omo Yesu uamanusuile kuhandeka viuma vioshe evi, uahandekele kuli vandongisi vendi nguendi, 2 "Muazivuka ngueni omo hanima ya matangua avali Paseka ili na kuija, kaha Muna Muntu vaka muhana linga vakamushukike ha cilindakano."

3 Ambahoni vakuluntu va vasasendote na vakuluntu va vantu valikunguluile mu lipela lia kasasendote uakama, uje ivatumbuile nguavo Kayafase, 4 kaha vatumbile vutumbe hamo linga vakute Yesu mu vushueke nakumutsiha. 5 Vuno honi vahandekele nguavo, "Keti tulinge eci ha ntsimbu ya ciuano, hamo vantu vakaneha mpindangano."

6 Kaha omo Yesu uakele ku Mbetaniya mu njivo ya Simoni yala uje uakele na mbumba, 7 Omo Yesu tele ali nakulia ku mesa, mpuevo umo uezile kuli ikeye na ntsazi ya mazi andando yakama akunika luengo luacili, kaha ua etilile ha mutue ua Yesu. 8 Vuno honi omo vandongisi vacimuene vanienguele cikuma nakuhandeka nguavo, "Nkuma vika apihisila mazi? 9 Muomu mazi aua vapandele ku alandesa na ndando yakama, nakuhana vimbongo ku vihutu."

10 Vuno honi Yesu uazivukule vioshe evi, uahandekele kuli vakevo nguendi, "Nkuma vika muli nakupakesela ou mpuevo? Muomu na lingi cuma ca cili kuli yange. 11 Muomu yeni ntsimbu yoshe muakala na vihutu, vuno honi yeni kumukakala nange ntsimbu yoshe. 12 Ha kunjitila aua mazi ha muvila uange, eci na cilingi mukunji vuahesela kunjitsinda. 13 Muavusunga njimileka nguange, kuoshe kuje ku vakambulula Muzimbu Uacili ha mavu uoshe, evi vianalingi ou mpuevo vakavihandeka mukumuvuluka."

14 Kaha umo ua vaje vandongi likumi na vavali uje ivatumbuile nguavo Yundasa Isakaliote, uayile ku vakuluntu va vasasendote, 15 na kuhandeka nguendi, "Vika mukanjihana nga njiminehelaye?" Kaha vamufuetele makumi atatu a vimbongo via muuaya uaya via siliva. 16 Kaha kuhuma ha ntsimbu ije uatondesesele ngila ya kuendelamo Yesu vungungu.

17 Honi ha litangua lia kulivanga lia mbolo ya kuhona cimbaluila vandongisi vezile kuli Yesu nakuhandeka nguavo, "Nkuma kuli utonda yetu nguove tukuvuahese linga ukalileko Paseka?"

18 Uahandekele nguendi, "Yeni mu nganda kuli yala umo, kaha mukahandeke kuli ikeye ngueni, ‘Mulongisi nahandeka nguendi, ntsimbu yange inahete, njikalinga ciuano ca Paseka mu njivo yove hamo na vandongisi vange.’"

19 Kaha vaje vandongisi valingile ngue muje Yesu uavalekele, kaha vavuahesele ciuano ca Paseka. 20 Omo vahetele ku cinguezi, Yesu uatumamene ku mesa na vandongisi likumi na vavali, 21 kaha omo vakele na kulia, uahandekele nguendi, "Muavusunga, Njihandeka ku liyeni nguange, umo ueni akanjenda vungungu."

22 Kaha vakele na vusiua cikuma, kaha vaputukile kuhandeka kuli ikeye, umo na mukuavo nguavo, "Muene yange ndi?" 23 Yesu uavakumbuluile nguendi, "Uje akatanta hamo nange mu lilonga, ikeye vene akanjenda vungungu. 24 Muomu Muna Muntu akatsa ngue muje vanacisoneka hali ikeye, vuno honi tuyando hali uje yala enda vungungu Muna Muntu! Ngue capuile cacili kuli uje yala nga kasemukile."

25 Yundasa uje uamuendele vungungu uendekele nguendi, "Muene yange ndi?" Yesu uahandekele kuli ikeye nguendi, "Omo vene munahandeka."

26 Kaha honi omo vakele nakulia, Yesu uambatele mbolo, na ku ikuisula, kaha uaipazuile, naku ihana kuli vandongisi vendi, kaha uahandekele nguendi "Ambateni mulie ou ukeuo muvila uange."

27 Kaha uambatele nganja, kaha omo uamanuisuile kutsantsela uavahanene, nguendi "Nuenimo mu vavoshe, 28 muomu aua akeuo maninga ange a litavasano lialiha, aje anamuaniena hali vavengi mukukonekela vipi. 29 Njimileka nguange, kunjikanuho naua vushuka ovu vua viniu kuvanga noho ha litangua lije omo njikanua neni vushuka vua viniu vuavuha mu Vumuene vua Tate,"

30 Kaha omo vamanusuile kuimba muaso, vayile ku munkinda ua Oliveta.

31 Ambahoni Yesu uahandekele kuli vandongisi vendi nguendi, "Muva voshe mukateua muomu yange vutsiki vuno vene, muomu vacisoneka nguavo, ‘Njikapupa kaniungi, kaha vutanga vua vampanga vukalishandoka!’ 32 Vuno honi hanima ya kunjisangula, njikaya kulutue lueni ku Ngalileya."

33 Petulu uahandekele kuli ikeye nguendi, "Cipue vene voshe vakakuteua, yange kunjikakuteue."

34 Yesu uahandekele kuli Petulu nguendi, "Muavusunga njikuleka nguange, vutsiki vuno vene, ntsimbu kanda ndemba atambeke ukanjiviana lutatu." 35 Petulu uahandekele kuli ikeye nguendi, "Cipue vene nga kutsa nove, kunjikakuviana." Kaha na vandongisi vakuavo voshe vahandekele ngoco vene.

36 Ambahoni Yesu uayile navo kumutambela uvatumbuile nguavo Ngetesemani, kaha uahandekele kuli vandongisi vendi nguendi, "Tumameni hano ntsimbu njiciya nakulombela."

37 Kaha uayile na Petulu na vana va Zembendeo vavali, kaha hajevene uaputukile kulivua vusiua na kulinienga. 38 Kaha uahandekele kuli vakevo nguendi, "Muono uange uli muvusiua noho kukutsa, saleni hano, nakutalelela hamo nange."

39 Kaha uayile halahako kavundende, uavulumanene ha mavu nakulombela nguendi, "Tate, nga casiua, ecela eyi nganja injipulakane, keti kulingiue cizango cange, vuno honi kulingiue cizango cove."

40 Kaha uahilukile kuli vandongisi vendi uavauanene vanakosa tulo, kaha uahandekele kuli Petulu nguendi, "Nkuma kumuasa kutalelela nange cipue ntsimbu imo lika indi? 41 Taleleni nakulombela linga keti mukovele mu vieseko, cilivene cimbembesi atonda, vuno honi muvila unazeye."

42 Uayile naua lua mucivali na kulombela nguendi, "Tate, nga kucasiua nganja eyi kunjipulaka kuvanga vene nji inuine, kaha ecela cizango cove cilingiue." 43 Kaha naua uahilukile nakuuana vanakosa tulo, muomu mesho avo alemene.

44 Nankuma, uavasezele naua, uayile nakulombela luamucitatu, uahandekele mezi acifua cimo. 45 Ambahoni uezile kuli vandongisi vendi nakuhandeka nguendi, "Nkuma hanga muacikosa na kuhuima? Taleni, ntsimbu inahete laja, kaha Muna Muntu vanamuende vungungu nakumuhana ku mavoko a vaka vipi. 46 Hindukeni tuyeni, taleni muka kunjenda vungungu uno ali hano."

47 Tele Yesu acili nakuhandeka, Yundasa uezile, uje umo ua vandongisi likumi na vavali, kaha uezile na civunga cakama vaje vezile na mikuale na vimbueti, kuhuminina ku vakuluntu va vasasendote na vakuluntu va vantu. 48 Kaha honi uje muka kumuenda vungungu uavahanene cimueso uahandekele nguendi, "Uje njikatsemba ikeye yala mukakuata."

49 Kaha hajevene uezile kuli Yesu nakuhandeka nguendi, "Uahinduka vati, Mulongisi!" Kaha uamutsembele.

50 Yesu uamukumbuluile nguendi "Yove kavusamba, linga vuasi vije viunezila."

Ambahoni vezile nakumukuata naku mukuta. 51 Kaha taleni, umo ua vaje vakele navo Yesu uahumisile mukuale uendi, nakuluisa ndungo ua kasasendote uakama kaha uamutetele lituitui liendi. 52 Ambahoni Yesu uahandekele kuli ikeye nguendi, "Haka mukuale uove mu cindalo cauo, muomu voshe vaje vakambata mukuale vakatsa ku mukuale. 53 Nkuma musinganieka ngueni kunjasa kulomba kuli Tate, kaha hajevene akanjitumina masualale va tungelo vaje kumuasa kutanda ndi? 54 Vuno kaha vatihoni visoneka vikalishulisisa, ngeci cikafue muje?"

55 Ha ntsimbu ijevene Yesu uahandekele ku vivunga nguendi, "Nkuma muneja ngue muakuluisa muhuza, na mikuale na vimbueti mukukuata yange ndi? Ha litangua na litangua njatumamene mu njivo ya Njambi nakulongesa kaha kumuanjikutile. 56 Vuno honi vioshe evi vinalingiua linga visoneka via tunanguizi vilishulisise."

Ambahoni vandongisi vendi voshe vamusezele nakuteua.

57 Ambahoni vaje vakutile Yesu vamutualele kuli Kayafase kasasendote uakama, kuje kuvali kunguluilile valongisi va lishiko na vakuluntu. 58 Vuno honi Petulu uakele nakumukava halahako, uakele halahako noho vahetele ku cipango ca kasasendote uakama, kaha omo uakovelele mukati uatumamene na vaka kuniunga linga amone vika vikalingiua. 59 Kaha honi vakuluntu va vasasendote na mpunga yoshe vahanene vukaleho vua makuli hali Yesu linga vamutsihileho, 60 vuno honi kuvauaneneho cipue vumo, cipue vene kuakele vakaleho vavengi va makuli. Kaha kumamanusuilo vavali vezile kulutue, 61 nakuhandeka nguavo, "Ou mukuetu uahandekele nguendi, ‘Njasa kusiula eyi njivo ya Njambi nakuitunga naua mu matangua atatu.’"

62 Kaha uje kasasendote uakama uemanene nakuhandeka nguendi, "Nkuma kuuesi nacikumbululo ndi? Nkuma vikahoni ava vamala valinaku kuvangeya?" 63 Vuno honi Yesu uaholokele lika kuluu. Kaha kasasendote uakama uahandekele kuli ikeye nguendi, "Njikusinga mu lizina lia Njambi uakuyoya, tuleke nga yove Kilistu, Muna Njambi."

64 Yesu uahandekele kuli ikeye nguendi, "Omu munahandeka mukemo vene. Vuno honi njimileka nguange, kuhuma ha ntsimbu ino mukamona Muna Muntu natumama ku livoko liacilio lia muka Nzili yoshe, kaha akeja mu mashelua a muilu."

65 Ambahoni uje kasasendote uakama uatavuile kazaku kendi nakuhandeka nguendi, "Nashaula Njambi. Vika naua tutondela vakaleho veka? Munevu honi kushaula cendi. 66 Nkuma musompa ngueni vati?"

Vamukumbuluile nguavo, "Napande kutsa."

67 Ambahoni vamujekuilile ku cihanga cendi nakumupupa, kaha vamo vamupupile vimbanda 68 nakuhandeka nguavo, "Kilistu, handeka vunanguizi kuli yetu! Iya nakupupu?"

69 Honi Petulu uatumamene hambanza lia cipango. Kaha ngamba uampuevo uezile kuli ikeye nakuhandeka nguendi, "Nove vene uakele na Yesu uaku Ngalileya."

70 Vuno honi uavianene ku mesho avo voshe nguendi, "Kunjizivuka evi uli nakuhandeka." 71 Kaha omo uayile hambanza lia cikolo, ngamba mukuavo uampuevo uamumuene kaha uahandekele ku vantu vaje vemanene kuje nguendi, "Ou yala uakele hamo na Yesu uaku Nazaleta."

72 Kaha naua uavianene nakulisinga nguendi, "Kunjimuzivuka ou yala."

73 Hanima ya kantsimbu kakandende vaje vantu vemanene kuje vezile nakuhandeka kuli Petulu nguavo, "Cilivene nove naua umo uavo, muomu handekesi yove ikeyo ikujombolola."

74 Ambahoni Petulu uaputukile kuhandeka visingo hali ikeye vavenia nakulisinga nguendi, "Kunjimuzivuka ou yala." Kaha hajevene ndemba uatambekele.

75 Petulu uavulukile vije viahandekele Yesu nguendi, "Ntsimbu kanda ndemba atambeke ukanjiviana lutatu." Kaha uayile hambanza nakulila cikuma.