5 "Kaha omo mulombela, keti mulombele ngue vaka civembulu, muomu vakevo vazanga kuimana nakulombela mu vinjivo via malombelo na mu vitapalo, linga vantu vavamone. Muavusunga njimileka nguange, vanatambula laja vuana vuavo. 6 Vuno honi omo ulombela, ya mu mulili uove, shoka ku cikolo kaha lombela kuli Isho uje ali mu vushueke. Kaha Isho uje amona via mu vushueke akakuhana vuana.
7 "Kaha omo mulombela, keti muhandeke cikuma ngue muje muvakalingila vaje keti Vayunda, muomu vakasinganieka nguavo vakavevua muomu ya mezi avo akuhona seho. 8 Keti mupue ngue vakevo, muomu Ishueni azivuka laja vije vimutonda kanda mumulombe. 9 Lombeleni ngueni,
‘Tatetu uli muilu,
Valemese lizina liove,
10 Vumuene vuove vuije,
Cizango cove vacilinge hano ha mavu, ngue muje vacilinga muilu.
11 Tuhane lelo kulia cetu caha litangua na litangua,
12 Tukonekele ku milonga yetu,
ngue muje yetu tukakonekela vaka kutuvulumuina.
13 Keti ututuamenene mu vieseko,
vuno honi tuohiele ku citozi!’6:13 Mu Vimbimbiliya vikuavo vanahakako na mezi aua nguavo, Muomu vumuene vunapu vuove, na nzili na vumpau, ku miaka yoshe ya yaye. Eua.
14 "Muomu nga mukonekela vantu vaje vanamipihisila, kaha neni naua vakamikonekela kuli Ishueni ua muilu. 15 Vuno honi nga kumukonekela vantu vaje vamipihisila, neni naua Ishueni kakamikonekela ku vipi vieni.