1 Philistinme Israelme de ngngwa regi di. Israelme pelane Philistinme dwa gade pakdi nah Gilboa Deutu gade kau mie tsaidi. 2 Philistinme Saul nah pe napei de gwaketang mna sütdi. Philistinme ne pe namedung Jonathan, Abinadad, nah Malki-Shua de teitset di. 3 Saul taiga hereu ngking sütdi, nah lakpi kepwame pereu ngamlu, nah penui pecu tei rezam di. 4 Pecai Saul pe reunet pwa kelabe dage rangdi, "N kingtie züt lwe cide a reu gage kui gailo. Meliecai, hegeurum kemakmedung ne gwang lwe acu teikeherei zielu." Dede pe reunet kepwabe de cide tei raudi, kedanemene pa au hing süt kedine. Cine Saul pe kingtie züt lwe cipau reu gage kau mie gaidi. 5 Cidau pe reunet kepwabe Saul tsai kedi ngaulu ge, cinzwa pade pe kingtie reu ga kau zeu eh tsaidi. 6 Cine Saul tsai di, nah pe napei hangcum, ciu eh pe kilungme peciakne ngngwa tsaidi.

7 Israelme langkam kelungh leune penui pak kedi, nah Saul nah pe namedung tsaikap kedi ngau luge, penui penui namdidung pütdi delwe pakdi. Ge Philistinme gwang eh cidungde ga lunghdi. 8 Cinzwa eh pecai benai, Philistinmedung ketsai pau kecung kera gwang kecu dau, Saul nah pe namedung Gilboa Deutu ga kau zeu kebam penui ngaulu. 9 Penui peniadung ralu delwe pe peu nah pe reunetdung keulu. Penui Philistia leune ga samlia keyi de penui gu mamiedung nah minadung dage pung zang kera samgwamedung de langgai. 10 Penui pe reunetdung penui rabe ki gage kailu, nah Dagon kerecaki gage pepeu kezulu. 11 Jabesh Gilead ga mina pelane Philistinme Saul dage tei kedidung siu luge, 12 reugwamedung pelane mie Saul paau nah pe namedung de pwa tetdi nah penui de Jabesh ga ngngwa gwanglu. Penui mhu bang kangga ge penui raadung kungdi, delwe lang henane mmwang bamdi.

13 Cine Saul pa RAMPAUBE dade samsanglu kemakne tsaidi. Pa RAMPAUBE rang kebeudung mzai ma, dede mige ketsaime de ngngwa mpau kelame dade puisau keteu. 14 Pa au RAMPAUBE dade puisau keteu ma, cine RAMPAUBE pecu teitset di, delwe hegwangbam Jesse napei David de peudi.