1 Aipaucai David Philistinme de gwaketang delwe penuide ngamlu. Pa Gath nah cide twagwa kebam renamdung Philistinme kangga kebam de gumlu. 2 Pecai pa Moabme de ngamlu, nah Moabme David kangga lunghdi nah heraha pe dage kaidi.

3 Pecai David Zobah hegwangpei Hadadezer de Hamath gade ngamlu, Hadadezer Euphrates Reuki de kejeulu zielie hebeu tei kela dau. 4 David pe dade bagidung cangge, hekwen keteume cang hena, nah hepi reugwamedung cang ngkai de tuilu. David bagi teu keladung hekwendung pi tei telwa ciakdi, dede bagi haige ziemne hekwendung kainzeulu.

5 Damascus ga Aramme Zobah hegwangpei Hadadezer de ngha kera kegwang dau, David Aramme cang ngkai-kena de teitsetti. 6 Pecai David Damascusme deu Aram ga reugwame ramzeukidung teilu, nah Aramme pe kangga lunghdi nah heraha pe dage teugwangbeu di. RAMPAUBE David de pa kemie leu ga ngkieng kelu peu. 7 David Hadadezer kilame da kecak geudung kebam de keulu delwe cidungde Jerusalem ga teugwanglu. 8 Hadadezer namdidung, Tebah penai Kun gade David hetageu kekieege keulu. Pecai aipau hetageu de le pwa Solomon hetageu duibung "Jaaidi," de qu kela de, hetsiadung, nah hetageu lidung teilu.

9 Hamath gwangpei Tou, David, Zobah gwangpei Hadadezer reugwame pelane de ngamlu de lie kecu siulu, 10 nah cine Tou pe napei Hadoram de hegwangpei David de kelum kera nah pecu samlam beu kera langgai. Pa aide tei kegai au David Hadadezer de regi eh pecu ngam kelune, nah Tou ma kekieege Hadadezer de ngngwa hereu keteine. Tou David de ma ketsamtsam kecak, rangkanggeu, nah hetageu le tei keludung kekieege de langgai beu. 11 Hegwangpei David ma aidung RAMPAUBE ziemne keu ntsam lu, rangkanggeu nah kecak: Edom, Moab, Ammonme, Philistinme nah Amalekme leuhme dade teugwang keludung de si eh.

12 Zeruiah napei Abishai Edomme cang kereieheset de Mcai Langkam gade teitsetdi. 13 Pa Edom ga reugwame ramzeuki teilu, nah Edomme pelane David kilame teidi. RAMPAUBE David de pa kemie leuga ngkieng kelu peu.

14 David Israel pelane reu hegwang tei, nah pa pe minadung pelane de kesamsang nah kemzuibe teugwang beu. 15 Zeruiah napei Joab cai reugwame muibe, nah Ahilud napei Jehoshaphat cai kerau kerengeibe. 16 Ahitub napei Zadok nah Abiathar napei Ahimelech cai cingkupei kena, nah Shavsha cai keraube. 17 Jehoiada napei Benaiah cai Kerethitme nah Pelethitme reu kedibe, nah David napeime cai hegwangpei ta ketei ga ditume.