1 David pekatei pe ziemne David namdi ga kidung teilu. Pa Tinggwang samkakbung ziemne heni ge mteilu nah paiki ge cide ziemne lim lu. 2 Pecai David rangdi, "Levime rünne Tinggwang samkakbung de pwa zie, kedanemene RAMPAUBE ne penuide RAMPAUBE samkakbung pwa kerane nah kelunghta pe gwa tei kerane kedet luda. 3 Pecai David, Israelme pelane de Jerusalem gage qu hekwalu, pa heni mtei pwa kebam gage RAMPAUBE samkakbung de pwa gwang gailu kerane. 4 David Aaron leuhmedung nah Levi leuhmedung de qu hekwa lu. 5 Kohath leuhme gade, muiteube Uriel nah pe kibaume, mipei 120 ge gwang. 6 Merari leuhme gade, muiteube Asaiah nah pe kibaume, mipei 220 gwang. 7 Gershom leuhme gade, muiteube Joel nah pe kibaume, mipei 130 ge gwang. 8 Elizaphan leuhme gade, muiteube Shemaiah nah pe kibaume, mipei 200 ge gwang. 9 Hebron leuhme gade, muiteube Eliel nah pe kibaume, mipei riakheset ge gwang. 10 Uzziel leuhme gade, muiteube Amminadab nah pe kibaume, mipei 112 ge gwang. 11 David cingkupei kena Zadok penai Abiathar, nah Levime Uriel, Asaiah, Joel, Shemaiah, Eliel nah Amminadab penuide qu gai. 12 Pa penui dage rangdi, "Nnui au Levime leuhme muiteudung da. Nnuikatei nnuide nah nnui sinamedung de tei mci lu, iciu eh nnui RAMPAUBE, Israelme Tinggwang samkakbung de Ih cide ziemne mtei pwa kebam heni gage pung gwang gailu kerane. 13 Keraibe pia nnui cide pwa ma. Cide ziemne RAMPAUBE anui Tinggwang anuide mlaidi, kedanemene anui pecu peei nah pesam mzai kemakne." 14 Cine cingkumedung nah Levimedung penuikatei penuide tei mci lu iciu eh RAMPAUBE Israelme Tinggwang samkakbung de pung gwanglu kerane. 15 Cine Levimedung Tinggwang samkakbung de pe pakdung penui hekeutudung reu gage kailwe pwalu, Moses samkai kebeu nzwa, RAMPAUBE sam gade hezai kai kebeudung de mzui eh.

16 David Levime muiteudung de Levimedung de leibung peria keteibe, leibungdung nah ntwaidung, kwa bak eh nah penui sui yi eh leibung kwa eh lei keteime tei kerane nlum gai. 17 Cine Levime Joel napei Heman nah pe siname pei, Berechiah napei Asaph de kedetlu. Penui Merari leuhme gade pe kibaume de de si eh nah Kushaiah napei Ethan de kedetlu. 18 Penuide ngha kera ngngwa kelame penui kibaume cai Zechariah,* Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Eliphelehu, Mikneiah, Obed Edom nah kirie kekwabe Jeiel. 19 Leibung kekwame Heman, Asaph nah Ethan de peu hetageu ntwai kwabak eh kwa kerane kedetlu. 20 Zechariah, Aziel, Shemiramoth, Jehiel, Unni, Eliab, Maaseiah nah Benaiah de, Alamoth ria gade leibung peria keteibedung kwa. 21 Mattithiah, Eliphelehu, Mikneiah, Obed Edom, Jeiel nah Azaziah de, Sheminith ria gade leibungdung teu swa eh kwa kerane kedetlu. 22 Kenaniah, Levime muiteube, leiketeime de pie kerengeibe teigwang kedanemene pa au lei keledeube kecune. 23 Berechiah penai Elkanah becai samkakbung kekwame. 24 Cingkume Shebaniah, Joshaphat, Nethanel, Amasai, Zechariah, Benaiah nah Eliezer becai Tinggwang samkakbung dwa ga teluidung kwa kerame. Obed Edom penai Jehiah cai samkakbung ziemne kekwame.

25 Cine David, Israel hangkiamedung nah pecang reu reugwa muimedung RAMPAUBE samkakbung Obed Edom ki gade pwa mpet kerane penui sui yi eh miedi. 26 Tinggwang Levime RAMPAUBE samkakbung kepwame de ngha kebeune, penui hetumseu hena nah meurünseu hena ratak tei gai. 27 David au langcim pai yitube balu, Levime samkakbung kepwamedung, lei keteimedung, nah Kenaniah, lei ketei muiteube de cinzwa balu. David langcimpai cwatie ge teu eh la. 28 Iciu eh Israelme pelane penui suiyi sahbak eh nah hekiidung, nah teluidung, nah ntwaidung, nah leibung nah leibung peria keteibe kwa eh RAMPAUBE samkakbung pwa nghang lu.

29 Dede RAMPAUBE samkakbung David namdi ga gwang luge, Saul napui Michal hebaki gade pie mpet gai. Pa hegwangpei David helim lim nah renga la kecu ngau. Ge pa pe mlung gade pecu ngkaudi.