1 Ngauraume ge Israel de renia cuhdi, nah Israel riak pei kera David lung teigai beu. 2 David Joab dage nah reugwamaa muibedung dage rangdi, "Mie cu, Beersheba gade Dan kecang Israel mina riak pei lo delwe a dage pau dai beulo, iciu eh Ih penui riak cilu kerane." 3 Joab rangdi, "Peu RAMPAUBE de cu kebam swade pe reugwame haige kiege tei ngkie beulo. Dede hegwangpei a mpaubo, penui pelane a mpaube gwa tei la meni? Daitei a mpaube aide tei neu lano? Daitei Israel da kemau teugwang zeu no?" 4 Dede hegwangpei sam Joab teime gailak di. Cine Joab tetdi nah Israel deu pelane ga mie. Pecai pa Jerusalem ga cailigwanglu. 5 Ge Joab reugwame riak pei kelu pelane David dage paubeu. Israel ga kingtie kepwame mina 1,100,000 ge bam. Judah ga rünne reugwame 470,000 ge bam. 6 Dede Levi penai Benjamin de penui kakga pei ncüt ma, kedanemene hegwangpei aja de Joab pesui ta kedine. 7 Tinggwang heta aide tei kedi pesui tadi, cine pa Israel de ketang. 8 David Tinggwang dade rangdi, "Ih aide tei kedine kemau kedi tei dida. Cu n kilabe mau gibeu lo, Ih kemieta ge teidi delu."

9 RAMPAUBE Gad, David caihakecibe dage rangbeu, 10 "Mie David dage ranglo, RAMPAUBE ainzwa rangzeu: Ih ncu makie kecum ge kedet kera peula. Cidung de kakde ket kedetlu.’" 11 Cine Gad David da mie delwe pe dage rangdi, "RAMPAUBE aide rangzeu, ‘Aidungde gade ket kedetlu: 12 mmi kecum herakum zie mi, kei cum n ngauraume ne gwaketang nah penui kingtiedung ne tu luzie mi, mede langcumne RAMPAUBE kingtie zie no, cide cai, hangdeu ga rapia ge, RAMPAUBE gwame de peu Israel deu pelane ngkap gwang kera.’ Ciucai cu, Ih acu lang kegaibe dage daipai samli teugwang beu ziebi cet lulo." 13 Ge David Gad dage rangdi, "Ih au lungrei pui dida! Peu acu mina ba gage swade RAMPAUBE ba gage kaugai lu, kedanemene pe ngaugia tadung au dizu lu." 14 Cine RAMPAUBE Israelme da rapia ge langgai, nah mina cang riakhena tsaidi. 15 Tinggwang tinggimgwame gede Jerusalem ngkapdi kera langgai. Pa cide ngkapdi zie lie kebam dau, RAMPAUBE piegai nah tei keherei zielie kela de gade pe lung nreulu. Ma tei ngkap kebam tinggimgwabe dage pa rangdi, "Mtakdi! Cu n ba keu caili dilu." Cipau tingdau RAMPAUBE tinggimgwabe Jebusme pei Ornan hecaipung ga sap bam. 16 David ngangcuh piegai nah RAMPAUBE tinggimgwabe kideu nah tinggim kakga sapbam eh ngau, pe ba ga kiengtie pwa cuh lwe Jerusalem ngkap kera mteilwe. Ge David nah hangkiamedung, rosopai bahlu eh, keumie penui zu hangdeu ga nkumpung bamdi. 17 David Tinggwang dage rangdi, "Reugwame riak peilo de eh aja kai kebeude Ih ne meni? Ih ne kemauta aide tei dida. Dede meurün aidungde, penui dai tei dino? RAMPAUBO a Tinggwang! Peu n ba a da nah a kelak da kailo, dede n mina da peu rapia gwang diso."

18 Cine RAMPAUBE tinggimgwabe Gad dage aja kaigai, David de peu hang delwe RAMPAUBE ziemne racabam Jebusme pei Ornan hecaipung gage tei lulo de eh David de rangbeu kera. 19 Cine David Gad pecu rang kebeu nzwa hangdi, RAMPAUBE zi gade tei kerane. 20 Ornan hecaipung ga wheat neu kebam dau, pa nreu gwang eh tinggimgwabe de ngau. Pa nah pecu ngngwa pe napei hang mdai penui mbaidi. 21 David Ornan da kegwang dau, Ornan piegai nah David de ngaulu. Pa hecaipung de pütdi delwe David da keumie pe zu hangdeu tung di. 22 Ge David Ornan dage rangdi, "Hecaipung aide acu zwa beulo, ciciu lude Ih RAMPAUBE ziemne recabam ge teigai beulu kerane. Ih pemi pelane peu zie, ciciu eh rapia mina dade keukezia dilu kerane." 23 Ornan David dage rangdi, "Cide ngu nzwa keulu, a mpaubo hegwangpei. Cide keu n dwade petaube teilu. Ainie, Ih ncu ketumseu keru reca ziemne, tsiuneu pak mitei kerane, nah ciu reca tei kerane wheat peu zie; Ih cidung pelane ncu peu zie." 24 Hegwangpei David Ornan dage rangdi, "Lak, Ih pemi kai cangsiaklu eh cide lui luzie. Ih ngu keu delwe RAMPAUBE de cide le keru reca tei beulak, cide a dade pemi gede keu mecai." 25 Cine David kecak shekel hai herok ge* heni ziemne peudi. 26 David cika ge RAMPAUBE ziemne reca bam teilu delwe keru reca nah kekangbau reca teigai beu. Pa RAMPAUBE dage kiegai, ge pa tinggim gade keru recadung recabam gage mi langgai eh pe kekie teibeu. 27 Iciu luge, RAMPAUBE tinggimgwabe de sam kaigai, nah tinggimgwabe pe kiengtie keu caili pebung gage kaidi.

28 David Jebusme pei Ornan caipung gade RAMPAUBE pe kekie tei kebeu ngau luge, cipau tingdau cikade pa ratak tei gaibeu. 29 Cu cipau tingdau, Moses renaamkang gade tei kelu RAMPAUBE kebam paiki, nah recadung keru recabam de, Gibeon reca ni ga bam. 30 Ciciu liede, David Tinggwang puisau kie kera cika mie luma, kedanemene pa RAMPAUBE tinggimgwabe kiengtie de hing kedine.