1 Cidau Israelme pelane Hebron ga David da gwang eh rangdi, "Pielo, anui au n teih nah n ra lie. 2 Ndaa pedwa, Saul anui reu hegwang tei kebam dau, nang ne Israel reugwame de teuswa beu. RAMPAUBE n Tinggwang n dage rangdi, ‘Nang a mina Israel meurün kekwabe tei zie, nah nang a mina Israelme reu hegwang tei zie.’" 3 Cine Israel ga hangkiamedung pelane Hebron ga hegwangpei da gwang, nah David RAMPAUBE dwa gade penuide ngngwa samkaklu. Penui David de Israelme reu gwangpei kera keniaklu. Ainzwa eh, RAMPAUBE sam Samuel dage rang kebeu de tei gwang kesanglu.

4 David nah Israelme pelane Jerusalem (cide Jebus) ga miedi. Cu Jebusme, hangdeu cika lungh kebamme cika bam. 5 Jebus ga kelunghme David dade rangdi, "Nang madau de aika lüt gailak." Dede David Zion kengkiengbam de tuilu, nah cide cai, David namdi. 6 David rangdi, "Jebusme de regi raitu kelube de peu muibe nah kedibe tei zie." Cine Joab napei Zeruiah ne gwaketang raitu lu, cine pecu peu reugwamaa reu kedibe teilu. 7 Ge David kengkiengbam de ga lunghdi. Cine penui cide David namdi lie qudi. 8 Pa Millo gade twagwa kebam rieki pelane kecang de namdi tei tegwalu. Joab namdi keda pelane retak dailu. 9 David ngkieng reureu di kedanemene kengkieng RAMPAUBE pecu ngngwa kelane.

10 Aidungde David da kebam muiteumedung, Israelme ziemne, Israelme pelane de ngngwa, pe hegwangram ga ngha kegaime, pecu peu hegwang teilu kerane, RAMPAUBE sam mzai eh. 11 Aidungde David gu mina kengkiengmedung zi: Hachmon leuhme pei Jashobeam, cai kedimedung reu muiteube. Pa piage pe ngei le mina haicum ge de teitset di. 12 Pecai Ahoah pautsame, Eleazar napei Dodo, pa de ngkiengtume hangcum kakga de hangge. 13 Pas Dammim ga pa David de ngngwala nah cikade Philistinme hereu tei kerane ngkwalu, barley luh kebam ga, nah reugwame Philistinmedung dade pakdi. 14 Penui luh sum ga saplu. Penui cide kwa kwaklu nah Philistinme de bi ngkaudi nah RAMPAUBE penuide ngkieng kelu kedige le kelibeu.

15 Cidau muiteumedung camrei gade hangcum tsura ga David taiga nghung, Adullam tsupop ga. Philistinme reugwamaa Rephaim langkam ga ramzeuki tei pwa bam. 16 Cipau ting dau David pe kengkiengbam, tsupop ge ga bam, Philistinmedung Bethlehem ga ge penui ramzeuki tei keludau. 17 David dui teu neu sütdi eh rangdi, "Magade mige acu Bethlehem ga kebam tekwa gade dui sak kera peu liecai, herieki taiga kebam tekwa de gade!" 18 Cine kengkieng mina hangcum aidungde Philistinme reugwame de nia ketang lütlu eh Bethlehem tekwa, herieki ga kebam tekwa gade dui twaklu. Penui dui twaklu delwe cide David da pung gwang beu, dede pa cide sak laklie di. Meliene, pa cide RAMPAUBE dage rui gai beudi. 19 Ciu eh pa rangdi, "Peu madaude acu aikenzwa tei diso! Mina aidungde penui teilung kengngi gage kai kebeume jai Ih sak zieni?" Kedanemene penui penui teilung kengngi ga kai kedine, David cide sak laklie di. Aidungde kengkieng mipei hangcum batadung.

20 Hangcum kakga Joab sinabe Abishai ne muiteu teila. Pa piage mina haicum de ngngwa regi nah penui de teitsetdi. Pa de Hangcum de de ngngwa kemlangme ge di. 21 Penui Hangcum kakgade, pecu herüt peu kiee gwa eh penui reu muiteu teilu, pa penui kakgade ncüt melie de.

22 Jehoiada napei Benaiah au Kabzeel ga reugwa kekuume ge, pa heta kedi teigai. Pa Moabme pei Ariel napei kena de teitsetdi. Pa buising kei kebam ting dau hekwaki ga de hung eh hingho de de teitset di. 23 Pa Egyptme peide de teitset di, mina cipau de cubits mengei hu ge. Egyptme peide pe ngei deikim kenzwa ge bamla, dede pa hetuitie ge rünne pwalwe pe da hung. Pa Egyptme pei ba gade hengei de sütlu, delwe pecu pekatei pe hengei le teitsetdi. 24 Cidung de Jehoiada napei Banaiah kekuu batadung nah pa de mina kengkieng hangcum bau kakga silu. 25 Reugwame camrei de swa de pecu au rüt gwala, dede pecu mina kengkieng hangcum de nzwa rüt canglu ma. Dede David pecu peu pe pumkwame rengei kerane kailu.

26 Mina kengkiengdung cai: Joab sinabe Asahel, Bethlehemme Dodo napei Elhanan. 27 Harorme Shammoth, Pelonme Helez, 28 Tekoame Ikkesh napei Ira, Anathothme Abiezer, 29 Hushahme Sibbekai, Ahoahme llai, 30 Netophathme Maharai, Netophathme Baanah napei Heled, 31 Benjamin deu ga Gibeahme Ribai napei Ithai, Pirathonme Benaiah, 32 Gaash langkamdung gade kegwangbe Hurai, Arbahme Abiel. 33 Bahurumme Azmaveth, Shaalbonme Eliahba, 34 Gizonme Hashem napeidung, Hararme Shagee napei Jonathan, 35 Hararme Sakar napei Ahiam, Ur napei Eliphal, 36 Mekerahme Hepher, Pelonme Ahijah, 37 Carmelme Hezro, Ezbai napei Naarai, 38 Nathan sinabe Joel, Hagri napei Mibhar, 39 Ammonme Zelek, Beerothme Naharai (Zeruiah napei Joab reunet kepwabe), 40 Ithrme Ira, Ithrme Gareb, 41 Hittime Uriah, Ahlai napei Zabad, 42 Reuben leuhme Adina napei Shiza (Reuben leuh de muiteube) nah pecu camrei nzangla, 43 Maacah napei Hanan, nah Mithnme Joshaphat, 44 Ashterahme Uzzia, Aroerme Hotham napei Shama penai Jeiel, 45 Shimri napei Jediael, Joha (pe sinabe Tizme), 46 Mahavahme Eliel, Elnaam napei Jeribai penai Joshaviah, Moabme Ithmah, 47 Eliel, Obed, nah Mezobahme Jaasiel.