1 David Israel ga kedime pelane de Jerusalem gage ngngwa gwang ngkwa gailu: heleuhdung gade kedime, hegwangram ga penui gwangpei ta teikela kedime, nah pehai nah pecang reu reugwamaa muibedung, hegwangpei nah pe napeidung mabam nah mahei pelane reu pie keregeime, nah kedimedung nah reugwa kengkiengme, mata tei kecime de si eh. 2 Pecai hegwangpei David cuh saplu eh ranggai, "A kwa kingneilu, a sinamedung nah a rammenadung. RAMPAUBE samkakbung ziemne kerecaki tei kerade a kecet; anui Tinggwang ziemne pidaubam ge, nah Ih cide tei kera mtei luda. 3 Dede Tinggwang a dage rangdi, ‘Nang a zi ziemne kerecaki tei lak, kedanemene nang reugwame ge nah hejai teilwe ham kedine.’ 4 Iciude RAMPAUBE, Israel Tinggwang, acu a paume kelak pelane reu de Israel reu hegwang kelungta tei kera kedetlu. Pa Judah leuh de peu muiteu tei kera kedetlu. Judah leuh gade, nah a pei kelak gade, nah apei napeimedung pelane kakgade, pa acu Israel pelane reu hegwang tei kera kedetlu. 5 RAMPAUBE acu a na mipeina kekiee ge kepeu gade, pa a napei, Solomon de kedetlu, Israel reu hegwang tei eh RAMPAUBE hegwangram bam ga bam kerane. 6 Pa a dage ranggai, ‘N napei Solomon ne a ki nah a kigudung tei zie, kedanemene Ih pecu a na tei kera kedet luda, nah Ih pe pei tei zie. 7 Pa cu nang nzwa eh a zaidung nah a ajadung mzai jüja bam lucai Ih pe hegwangram kelungta bam lu kera tei beuzie.’ 8 Cine cu, anui Tinggwang dwa gade nah RAMPAUBE ziemne ngkwa kebam aide, Israelme pelane miakngau gade, nnui pelane RAMPAUBE nnui Tinggwang ajadung kaikebeu de pelane mzai lu maisia. Aide tei lu iciu eh nnui hangdeu keyi aide gumlu kerane nah nnui cai nnui namedung dage cide peu kelungta mabam pwaleu lu kerane.

9 N ziemne, a napei Solomon, n pei Tinggwang samzai tei lulo nah n mlung pelane teu nah neungga eh pe gwatei lulo. Aide teilu kedanemene RAMPAUBE lungcet leune peeila nah mileune luuneu pelane cibam. Nang peda gwanglu cai, pa ncu luu luzie, dede nang pe dade nreu dicai, pa kelungta ncu gi dizie. 10 RAMPAUBE ncu kerecaki aide pe kemciki tei kerane kedet kelu ci lulo. Ntip lu nah cide teilu."

11 Pecai David pe napei Solomon de kerecaki kigu, kerecaki kidung, mania kibungdung nah nreube kibungdung, helungbe kibungdung, nah kemau ratak ketei bam kebam kibung, mariem de pwabeu. 12 Pa RAMPAUBE ki kigudung nah twakengwa kibungdung pelane, nah Tinggwang ki ga mania kibungdung, nah RAMPAUBE dage tei mci gai kebeu mapeudung de kekai kibungdung, pa riempwa kebam de pecu pwabeu. 13 Pa cingkumedung nah Levimedung penui ta tei kera tadung, nah RAMPAUBE ki ta tei kera nlum kebeu tadung nah maniadung pelane RAMPAUBE ki ga teu heta tei kera zaidung pecu pwabeu. 14 Pa kecak lidung heta ketsamtsam ziemne perüt dai kieege maisiabi kecu, nah rangkanggeu lidung heta ketsamtsam ziemne perüt dai kieege maisiabi kecu ranglia, 15 mitaubung bam nah kecak mitaubung ziemne kecak rüt, kecak li pelane ziemne, kecak rüt mitaubung bam ketket ziemne, rangkanggeu rüt mitaubungbam ketket ziemne, kereca ga mitaubung bam teu heta ketei rehi gade. 16 Pa Tinggwang de reca kebeu tangku kekaibamdung ziemne kecak perüt dai kieege maisiabi ranglia beu, mabam leune ziemne, nah rangkanggeu bam ziemne rangkanggeu perüt daikiee maisiabi ranglia beu. 17 Pa kecak kemci be perüt dai kenzwage teu hegeutia, hekwak nah duibungdung tei ziebi kecu pwapeu. Pa kecak kwakdung ket ziemne perüt daikenzwa ge, nah rangkanggeu kwakdung ket ziemne perüt dai kenzwage ge teu maisiabi kecu ranglia beu. 18 Pa kehengui reca bam ziemne kecak kenci perüt dai kenzwa ge teu maisiabi, nah cherubim RAMPAUBE samkakbung de penai hesiu le gumpwa bam kelade kecak perehi dainzwa ziebi pwapeu. 19 David rangdi, "Ih aidungde pelane kerau ga peu bam luda, RAMPAUBE ne acu tei lulo eh sam kaikebeu nzwa, nah perehi de peu cet ci kelu nzwa."

20 David pe napei Solomon dage rangdi, "Ngkienglu nah kuulu. Bata be tei cuhlu. Ngngi diso mede nlung keherei diso, kedanemene RAMPAUBE Tinggwang, a Tinggwang, ncu ngngwa lalu. Pa ncu gidi lak mede pütdi lak, nang RAMPAUBE kerecaki bata leune teicanglu kemaktane. 21 Ainie, cingkume nah Levime mzidung Tinggwang kerecaki ga heta leune tei kera aika bamda. Penui ncu ngngwala zie, bata tei kecime nah ngha neu kebamme leune de si eh, heta ketei ga ncu ngha kera nah heta tei kerane. Kedimedung nah mina pelane n ajadung mzai kera mtei luda."