1 Hegwangpei David mina pelane ngkwa dage rangdi, "A napei Solomon, Tinggwang ne kedetkelube, hena au reu nah matei mnim mereu, nah heta tei kera de au di ham zeu. Kedanemene kerecaki de au mina ziemne ma dede RAMPAUBE Tinggwang ziemne. 2 Cine a Tinggwang kerecaki ziemne Ih teilu kebui kiee ge mania mteibeu dida. Ih kecak peugai, kecak le tei kerabedung ziemne, rangkanggeu le tei kerabedung ziemne rangkanggeu, hetageu le tei kerabedung ziemne hetageu, hegeu le tei kerabedung ziemne hegeu, nah tsing le tei kerabedung ziemne tsing. Ih tangtsu ketiak kemzaibe de peugai la, tangtsudung kam kerane, tangtsu pegiak ketsamtsam teu mata tei kerane, pemikehung tangtsu leune, nah hengam tsu kekieege. 3 Cu, kedanemene a Tinggwang ki de a sui kecune, Ih akatei a mabam gade kecak nah rangkanggeu cide ziemne peubam. Ih kemci kerecaki ziemne mteibeu kecu pelane peureu liede Ih aide teibam: 4 Ophir gade kecak talent cangcum ge, nah rangkanggeu yitube talent cang hena, kidung tangdeu pwa kamlu kerane. 5 Ih kecak peu dida kecak le tei kerabedung ziemne, nah rangkanggeu le tei kerabedung ziemne rangkanggeu, nah heciem keteime ne heta ketsamdung pelane tei kera ziemne pe netdung. Caudung henai RAMPAUBE de ma peugai neula reu no nah pe da gwangneu no?"

6 Pecai suiyi makai tei beu penui paume kilungme muiteume ne, Israelme leuh muiteumedung, reugwamaa muidung cang nah hai reu kedime, nah hegwangpei kangga kedime ne. 7 Tinggwang ki ta ziemne penui talent cang mengei peu nah kecak daric cang kerei, rangkanggeu talent cang kerei, hetageu talent cang kereieheset, nah hegeu talent 100,000. 8 Tangtsu pemi kehungbe kebamme cidungde RAMPAUBE ki mabamki gage pwa peu, Gershon pautsa gade lungh kegwang Jehiel ne rengei. 9 Minadung penui sui yidi suiyi makai aidungde ziemne, kedanemene penui neungga eh RAMPAUBE de pwa peu kecune. Hegwangpei David liede pe sui yisüt di.

10 Mina pelane ngkwa dwa gade David RAMPAUBE de samlam beu. Pa ranggai, "Peu ncu twa kelube teilo, RAMPAUBE, anui paume Israel Tinggwang, kelungta. 11 RAMPAUBO, kedi, kengkieng, kendu, ngamkelu, nah hecili kecu au ngu lie. Kedanemene tinggim nah kideu ga mapelane ngu. Hegwangram au ngu, RAMPAUBO, nah mapelane reu nang ditube.✝ 12 Mahei nah herüt kenana de n dade gwangla, nah nang mina pelane reu hegwang tei. N ba ga kengkieng nah pumci bam. Nang au mina de tei mdi lu kebui kengkieng nah pumci bam nah keheibe de de kengkieng pwapeu lubui. 13 Cu cine, anui Tinggwang, anui ncu ketwa peula nah n zi kendu de twala. 14 Dede Ih cau no, nah a mina cau no, ma aidungde anui neungga eh pwa peulu kera? Kesang, maleune n dade gwangla, nah anui dai ngu bi ncu pwapeu dai gaila. 15 Kedanemene anui au n dwa gade anui paume nzwa eh langgi kedime nah sangme ge. Anui tingbadung kideu ga au tingkaumie ge nzwa, nah kideu ga lungh bam kera keregui gede gah. 16 RAMPAUBO anui Tinggwang, anui mabam aide pelane hekwa kecu kerecaki ge tei kerane nah n kemci zi de herüt peu kera, cide n dade gwang nah pelane ngu. 17 Ih ci lie, a Tinggwang, nang mina mlung kedakpie kela nah masang kelame de nang n sui kela. A ziemne au, a mlung lungsang eh aidung pelane Ih neungga eh ncu peu ciau dida, nah cu Ih a sui yi eh n mina aika kebamme neungga eh mta mapeu ncu teugwang kebeu de piebam. 18 RAMPAUBE, Abraham, Isaac, nah Israel Tinggwang, anui paume, aide n minadung kecet mlung gage kelungta kai pwa bamlu. Penui mlung teipwa peu n da lalu. 19 A napei Solomon de n aja tei mzailu keneu mlung pwa peulo, n samkakkelu aja, nah ngu hezai rauteu kela, nah ki aide tei kera Ih mapelane riemteu kela de tei lu kera ziemne."

20 David ngkwa pelane dage ranggai, "Cu RAMPAUBE nnui Tinggwang de samlam beu." Ngkwa pelane RAMPAUBE, penui paume Tinggwang de samlam beu, penui keu henamie nah RAMPAUBE de reca nah hegwang dwa de penui henalu.

21 Pecai benai, penui RAMPAUBE dage ratakdung teigai nah pecu keru recadung pwapeu. Penui ketumseu cangge, meurünseu cangge, nah meurünna cangge pwapeu, penui zau recadung de si eh nah ratakdung kekieege Israel pelane ziemne. 22 Cipau nai, penui RAMPAUBE dwa gade penui sui yisüt eh matyei nah sak.

Penui pia pekenabe de Solomon, David napei de peu hegwangpei tei, nah RAMPAUBE kengkieng le pecu penui muiteu tei kerane keniaklu. Penui Zadok de de keniaklu cingkupei tei kerane. 23 Pecai Solomon RAMPAUBE hegwangbam ga ntumlu hegwangpei nzwa pe pei David bam leu eh. Pa keyibe teilu, nah Israelme pelane pe sam mzai. 24 Muiteumedung, nah reugwame pelane, nah Hegwangpei David napeidung, Hegwangpei Solomon dage masang kera sampet gaibeu. 25 RAMPAUBE Solomon de Israelme pelane dwa de twasüt nah pecu Israel ga pe dwa pa madaude hegwang keda de peu kemak kengkieng kedi peugai.

26 Jesse napei David Israelme pelane reu hegwang tei. 27 David Israelme hegwang mmi riakdai ge tei. Pa Hebron ga mmi hena ge, nah Jerusalem ga mmi camreiehkecum ge hegwang teigwang. 28 Teilung ketie, mahei nah herüt teu eh lungh kehega kelucai, pa hecingsüt eh tsaidi. Pe napei Solomon pe bam leulu. 29 Hegwangpei David heta tei keludung de caihakecibe Samuel laisiukwak ga, nah caihakecibe Nathan laisiukwak ga, nah caihakecibe Gad laisiukwak ga rau teula. 30 Cika rauteu kela cai pe hegwang ketei batadung, pa heta tei keludung nah pe dage, Israelme dage, nah kideu keda hegwangramdung pelane dage tei kegaidung.