1 David cang nah pehai reu reugwa muiteumedung, kedime leune de ngngwa kelunglia gai. 2 David Israel maadi pelane dage rangdi, "Magade nnui kesuizwa lie cai, nah magade aide RAMPAUBE anui Tinggwang dade gwang lie cai, anui sinamedung Israel cuikuidung leune ga lungh kebamme de nah cingkumedung nah Levimedung penui namdidung ga kebamme leune dage samgwamedung langgai golie. Peu penuide anuide ncütlu kera rangbeulu kerane." 3 Anui anui Tinggwang samkakbung de anuida keu cailigwang lugo, kedanemene Saul hegwang ketei tingdau anui pe lungning peeilu melu. 4 Mbau kebam pelane aidung de tei kera kesuisamlu, kedanemene mina pelane dwa gade cidung de petau kedi ziemne. 5 Cine David Israelme pelane de qu hekwalu; Egypt ga Shihor reuki gade gwang Lebo Hamath kecang, Kiriath Jearim gade Tinggwang samkakbung punggwang lu kerane. 6 David nah Israelme pelane Baalah ga mielu, cide Kiriath Jearim, Judahme deu ga bam, Tinggwang samkakbung cika de pung nghang lu kerane, cide RAMPAUBE zi gade qula, RAMPAUBE, cherubim reu ga kebambe. 7 Cine Penui Tinggwang samkakbung de pwa bagi keheci gage kailu. Penui cide Abinadab ki gade pwa mpet lu. Uzzah penai Ahio ne bagi nzangla. 8 David nah Israelme pelane Tinggwang dwa de penui kengkieng pelane teu eh renga bam. Penui au leibung peria keteibe, nsum, ntwai nah teluidung pwa lwe lei tei bam.

9 Penui Kidon hecaipung ga gwang canglu ge, hetumseu kau mie kedine, Uzzah samkakbung herak kera peba hetwa petlu. 10 Iciuge RAMPAUBE Uzzah de perata süt di, nah RAMPAUBE pecu teitset di kedanemene Uzzah samkakbung de gage pe ba kai kedine. Cikade pa Tinggwang dwade tsaidi. 11 RAMPAUBE Uzzah de teitset kedine David perata di. Cipau heni de henai kecang de Perez Uzzah lie qula. 12 Cipau nai David Tinggwang de hingdi. Pa rangdi, "Dainzwa eh Ih Tinggwang samkakbung de ada kilung ga punggwang lu laino?" 13 Cine David samkakbung de David namdi ga punggwang ma, dede Gathme pei Obed Edom ki gage kai pwabam di. 14 Kei cum ge Tinggwang samkakbung de Obed Edom kelak ga pe kiga kai pwa bamdi. RAMPAUBE cine pe kelak nah pe mabam pelane de samlam beu.