1 Pecai David rangdi, "Aika RAMPAUBE Tinggwang kerecaki zieda, Israel ziemne keru recadung teigai kera recabam zieda."

2 Cine David pe kilamedung dage Israel deu ga sangme kelungme de ngngwa gwang ngkwa lulo eh aja kaigai. Pa penuide tangtsukang pang kera nlum beu, tangtsu pang takcai lu eh, Tinggwang kerecaki teilu kerane. 3 David gojaldung ziemne kiriedung ga kikamdung ziemne nah kensipdung tei kerane hegeu kekiee ge pwapeu. Pa hetageu mdet canggai kelak kieege pwapeu, 4 nah cedar tsingbangdung peikap gai kelak swa kekiee de si. (Sidonme nah Tyreme cedar tsinglwa peikap gai kelak kieege David da pung gwang beu.) 5 David rangdi, "A napei Solomon hena zeu reu nah matei nnim mereu, nah RAMPAUBE ziemne kerecaki teigai kera de peu yisüt kecuge maisia, iciu eh cide kideu pelane ga ndu nah hezuyisüt kecuge teilu kerane. Cine Ih ki cide ziemne telei zie." Cine David mania kekiee ge pa tsaidi kemak dwa mtei lu.

6 Pecai pa pe napei Solomon de qulu delwe pecu RAMPAUBE, Israel Tinggwang ziemne kerecaki ge tei lulo aja kaigai. 7 David Solomon dage rangdi, "A napei, RAMPAUBE a Tinggwang zi ziemne Ih kerecaki ge teigai kera a lungning la. 8 Dede RAMPAUBE ada gwang delwe rangdi, ‘Nang hejai kekiee ge teilwa dida nah hereudung kekiee ge regi dida. Nang a zi ziemne kerecaki tei lak, kedanemene nang a dwa gade kideu ga hejai kekiee ge teilwadi delu. 9 Iciuliede, nang mipeina ge de mna luzie pa lungciep kepui nage zie. Ih pecu pe ngauraume pelane kehei leune lamde kemtak peu zie. Kedanemene pe zi Solomon zie, nah Ih pe hegwang tingdau lungciep nah ziune kecu Israel de peu zie. 10 Pa a zi ziemne kerecaki ge tei zie. Pa a napei zie nah Ih pe pei zie. Ih pe kedi ria depeu Israel reu kelungta hegwang teizie.’ 11 Cu, a napei, peu RAMPAUBE de ncu ngngwala lu nah peu ncu n ta teicang kelube tei lulo. Peu ncu RAMPAUBE n Tinggwang kerecaki tei kelube tei lulo, pa nang tei zielie kerang de nzwa. 12 Peu RAMPAUBE de rünne ncu maci nah macet peu kelube tei lulo, iciu eh nang RAMPAUBE n Tinggwang zai mzailu kerane, pa ncu Israel reu hegwang tei kera kepeu dau. 13 Nang magede RAMPAUBE Israelme ziemne Moses dage kai kebeu hezaidung de sünne eh mzai lucai, nang ngkieng luzie. Ngkienglu nah kuulu. Ngngi diso mede helung ceu diso. 14 Cu, pielo, Ih helung kai süt eh RAMPAUBE kerecaki ziemne kecak talent 100,000, rangkanggeu talent million ge, nah hetageu nah hegeu kekiee ge mtei luda. Ih tsing penai tangtsu de si eh mtei luda. Nang ma aidungde pelane reu kaisi maisia reu. 15 Nang heta keteime n da kekiee ge bam: tangtsu kepangme, tangtsu ta keteime, tsingta keteime, nah heciem ta keteime ketsamtsam peigai kelakge bam, 16 kecak, rangkanggeu, hetageu, nah hegeu le heta teilu kebuime bam. Cuhlu eh bata tei mdeu cu, nah RAMPAUBE de peu ncu ngngwala kelube teilu."

17 David Israel muiteume pelane de pe napei Solomon de ngha beulo aja kaigai eh ainzwa ranggai, 18 "RAMPAUBE n Tinggwang ncu ngngwa la nah kehei leune lamde ncu lungciep peuda. Pa cuikui aika lungh kebamme de a ba gage pwa peu dida. Cuikui de RAMPAUBE nah pe mina dwa kangga lungh dida." 19 Cu au RAMPAUBE n Tinggwang de nlung pelane nah n keringria teu eh peei lu. Cuhlu eh RAMPAUBE Tinggwang kemci kerecaki tei cu. Iciu lude nang RAMPAUBE samkakbung nah Tinggwang gu niadung RAMPAUBE zi ziemne kerecaki tei kelu gage keugwang gailu bui.