1 Hegwangpei David pe hegwangki ga lungh kedi cai, pa caihakecibe Nathan dage ranggai, "Pielo, Ih au cedar tsing le teikelu kiga lungh bam, dede RAMPAUBE samkakbung au paiki kangga bam." 2 Nathan pecai David dage rangdi, "Nang cet kebam de tei lulo, kedanemene Tinggwang ncu ngngwala lu." 3 Dede cipau ziu Tinggwang sam Nathan da gwang eh ranggai, 4 "Mie delwe a kilabe David dage rangbeu lo, ‘RAMPAUBE ainzwa rangzeu: Nang Ih lungh kera ki cide teilak. 5 Kedanemene Ih Israelme de kelilu benai gade henai kecang Ih ki ga lungh melu. Meliene, Ih paiki, kerecaki ga lungh, heni ketsamtsam leu ga. 6 Ih Israelme pelane de ngngwa heni leune ga mbeu mie kecu ga, Ih madaude Ih a minadung de pie rengei kerane kedet kelu Israel muiteudung keheibe dage, "Daitei nnui a ziemne cedar tsing le a ki teibeu meno?"’" de magede rang ni. 7 "Cu iciucai, a kilabe David de rang beulo, ‘Tinggim reugwame reu RAMPAUBE aide rangzeu; Ih ncu tsehei luh ga, meurün kwakela gade ngngwalu, iciu eh nang a mina Israelme reu hegwang teilu kerane. 8 Nang kemie leuga Ih ncu nzangla nah n ngauraumedung de n dwa gade ngam ciau dida, nah Ih n zi kideu ga kendume zidung nzwa teibeu zie. 9 Ih a mina Israelmedung ziemne heni ge mtei beuzie delwe penuide peu cika lungh zie, iciu eh penui penuikatei penui deu ga lunghlu kerane nah kehebwak bam si melu kerane. Mina kesiame penuide teikeherei si lakta, ndaa penui tei kecu nzwa, 10 Ih tutiakme de peu a mina Israelme reu kedi tei zie lie aja kai kebeu tingdau gade penui tei kela de. Pecai Ih n ngauraume pelane de tei ngkap dizie. Cipaureude Ih n dage rangla Ih, RAMPAUBE, ncu ki ge, teibeu zie. 11 Cinzwa eh nang n teilung zie cangdi eh n paume taiga mie kera ting kedi dau, Ih n cai n leuhme de teu cuh beuzie, nah n name hangge ziemne, Ih pe hegwangram tei ngkieng beuzie. 12 Pa acu ki ge teibeu zie, nah Ih pe hegwangbam kelungta tei ngkieng beuzie. 13 Ih pe pei zie nah pa a napei zie. Ih a samkakkelu samsang de pe dade keuteu dilak, Ih Saul n dwa hegwang tei kecube dade keu caili kedi nzwa.✝ 14 Ih pecu a ki reu ga nah a hegwangram ga kelungta peu bam zie, nah pe hegwangbam kelungta bam zie.’"✝ 15 Nathan David de mpau eh pecu sam aidungde pelane paulia beu, nah pa pecu keulia kegai leune ha ranglia beu.

16 Pecai David hegwangpei lütlu delwe RAMPAUBE dwaga ntumlu; pa ranggai "Ih cau no, RAMPAUBE Tinggwang, nah a kilungme dai keteidung ge no, nang acu aikenzwa kecang ga ngngwa gwang beu kera?" 17 Dede n dwa gade aide au makeceu nage, Tinggwang. Nang n kilabe kilungme pecai ketiege kedi teigwang kera rangbeu da, nah lunggwang kera ceheudung keulia beu da, RAMPAUBO Tinggwang. 18 Ih, David n dade daige rang silu laino? Nang n kilabe de de kerüt peu da. Nang n kilabe de tei ndugai beuda. 19 RAMPAUBO, n kilabe ziemne, nah n lungning teicanglu kerane, n bata kedi leune keulia kerane nang kedi aide teigai da. 20 RAMPAUBO, nang nzwa migede gah, nah nang gwale Tinggwang kedage de gah, anui siu bammui kela nzwa. 21 Kedanemene kideu ga n mina Israelme nzwa dai leuh ge bam no? Cidungde, Tinggwang nang ne Egypt gade n mina tei kerane kelikelume, makedi nah miswakegah batadung teigai eh n zi teilu kerane. Egypt gade nang keli teu mpet kelu n minadung dwade nang heleuhdung de gwa gidi. 22 Nang Israelme de kelungta n mina tei luda, nah RAMPAUBO nang penui Tinggwang tei dida. 23 Cu cine, RAMPAUBO, nang n kilabe ziemne nah pe kilungme ziemne sampet kegai de peu kelungta la kelube teilo. Nang kerang de nzwa tei lulo. 24 Peu n zi kelungta di nah bammui kelube tei lulo, iciu lude minadung, "Tinggim reugwame reu RAMPAUBE au Israelme Tinggwang lie," de eh rang zie, nah n kilabe, David, a kedi de ndwa gade sapla luzie. 25 Kedanemene nang, a Tinggwang nang n kilabe dage keu liagai da nang pe ziemne ki ge teibeu zielie kecu. Ciziemne Ih, n kilabe, n dage kiegai kera kekuu ngaulu da. 26 Cu, RAMPAUBO, nang au Tinggwang nah sampet keyi aide n kilabe dage teigai beu da. 27 Cu au n kilabe leuhme de samlam beu kera nang n sui luda, iciu eh cide kelungta n dwaga bam jüja lalu kerane. Nang, RAMPAUBO, cide samlam beuda, nah samlam cide kelungta bam dizie da.