1 Pecai heriakting dau, hegwangmedung hereu teipet kela tingdau, Joab reugwame de hereu ga nzang pet delwe Ammonme deu ngkapdi. Pa mie delwe Rabbah* namdi de twagwalu. David au Jerusalem ga bamdi. Joab Rabbah namdi de gwaketang delwe cide ngamlu. 2 David penui gwangpei peurwa pe peu gade keu mpet lu, nah pa cide perüt kecak talent ge kebam, nah cika tangtsu pemi kehungdung kebam ngaulu. Peurwa cide David peu gage kailu, nah pa namdi gade hema tuih kelu kekiee ge pwa gwang. 3 Pa namdi ga mina kebamme de ngngwa mpet lu delwe penuide ketang eh peu tsingget, nah hegeu tsingkang, nah mreudung pwa lwe heta tei. David aipau ta de peu Ammon namdidung ga mina pelane de tei. Pecai David nah reugwame pelane Jerusalem ga cailigwang di.

4 Aipau cai, Gezer gade Philistinme de ngngwa hereu tei. Hushahme Sibbekai ne Rephaim leuhme Sippai de teitsetdi, nah Philistinme de ngamdi. 5 Cinzwa eh Philistinme de Gob gade ngngwa hereu tei daige, Jair napei Elhanan Bethlehemme gene Gathme pei Goliath sinabe de teitsetdi, Lahmi ngeitang au paidakme deikim siuge. 6 Cinzwa eh hereu keda ge Gath gade tei, cika mige pera tie süt kecuge peba kenana ga zurang herok nah pepi kenana ga zurang herok bam kecu ge bam. Pa de Rephaim leuh gade lunggwang. 7 Pa Israel reugwame de teilia gai ge, Jonathan David sinabe Shimea napei ne pecu teitsetdi. 8 Mina aidungde Gath ga lungh kebam Rephaim leuh gade lunggwang, nah penuide David nah pe reugwamedung ne teitsetdi.