1 जाहां पेन्टिकास्टोअ✝2:1 लेवी 23:15-21; कायदा 16:9-11 दिही आयू, ताहां तें आखे विश्वासी एकीज जागे टोलवात रोयेते. 2 एक्काइजे जुगोमेहें रोत वोडा वादुउ होस हुहवीइतुज आवाज आयू, आन तिया वाअहीं जिहीं ते बोठेते तो आखो कोअ होंहणों वोल्यो. 3 आन तियांहां आगीइ होस जीब फाटत्लीज आन वेराअत्लीज देखाअयी, आन तिहीं बोठ्ला माहुंउं डिठ आखापोअ आवित बोहीत गोयी. 4 तें बादे पवित्र आत्मा वाअहीं पोआइत गोये आन जेहलीही गोगीइलाआ सेक्ती आत्मे तियांहां आप्यी, तेहें कोइत तें जुदी जुदी बाशा गोगे वोल्ये.

5 जुगोअ निसे आक्खा देसोम रोत आवल्ये राज्या राज्यामेहें बाशा गोगनारे यहुदी भक्ते येरुसालेमोमेहें रोतेते. 6 जेहेलाम ओ आवाज उनाअये, ताहां गोरदी ओत गोयी, आन माअहें बोगलात गोये, काहाके हारेक जोओं ओंज उनाअतोतो के विश्वासी माहें तियांआं बाशामेहें गोगतेहे. 7 तें आखे बोगलाइत विसारोम पोड़ीत कोने वोल्ये, "पाला, गोगतेहे एं आखे ताम गालीलवाले होये! 8 ताहां केहें आपामेर्‍योअ हारेक जोओं आपाआ जिव जिवोअ बाशामेहें उनाअहे? 9 आपू ताम पारथी, मेदी, एलामी, मेसोपोटामिया, यहुदीया, कप्‍पदुकिया, पोन्तुस आन आसिया, 10 आन फ्रूगिया, पंफूलिया, मिसर, लिबिया देस जे कुरेनेए आहने पाहनेए होये. आपामेएं थोड़ेक ताम रोमन वाटहार्‍ये होये, 11 मोन्ज्ये यहुदी आन यहुदीइ विसार माननारे, क्रेतेवाले आन अरबी बी होये. पोन तेबी आपू जिवज्योअ बाशामेहें तियांअरी देवोअ वोडा वोडा कामोअ माग उनाअतेहे" 12 आना तें आखे बोगलाइत गोये आन विसारोम पोड़ीत एकानेकाहा कोने वोल्ये, "ओं की सालु होये?"

13 पोन बिहरे कुहुराइत कोइत कोयो, "एं तोम दाराक्शाआ रोह पीत कोइत साकवाल ओत गोयेहे."

14 तेहेलाम पेत्र तियां ईग्यार प्रेशितोंअरी उबू रोयुन आअड़ीत कोइत कोनु वोल्यू, "ए यहुद्यां आन ए आखा येरुसालेमोमेहें रोनारां, ओं जाईंत ल्या, तुमू कान देत माआं गोठी उनाआ. 15 जेहलोहो तुमू होमजीइतेहे, तेहेलेहे एं माअहें साकवाले कायनाहां; काहाके ओमे तोम वेगर्‍येए नवुज वाजतेहे. 16 पोने, ए तोम ते गोठ होये, जे योएल भविश्यवक्ते कोयीते:

17 "देव कोहे के, सेलवार्‍याअ दिहोमेहें एहलोहो ओवे के,

आंय माआं आत्मा आखा माअहूं पोअ ओली देहीं,

आन तुमाआं पोर्‍या आन तुमाआं पोर्‍यी भविश्यवाणी कोए,

आन तुमाआं जुवान पोर्‍याहां दर्शन जोड़े,

आन तुमाआं डायहांहां होप्ने पोड़े.

18 तियां दिहोमेहें आंय माआं साकऱ्यां पोअ बोईंन माट्योंपोअ बी

माआं आत्मामेहें रोते ओलीहीं,

आन तें भविश्यवाणी कोए.

19 आन आंय उसे जुगोमेहें समत्कार,

आन निसे धरती पोअ वोडे वोडे कामें,

मोन्ज्ये रक्त, आग आन तुमाणाआं वाद्लो देखाड़ीहीं.

20 प्रभुउ वोडा आन महिमावाला दिहोअ आविइलोअ पेल,

दिही कालू पोड़ीत जाय,

आन सांद रक्ताआ होस ओत जाय.

21 ताहरोअ, जों कोडो बी प्रभुउ नाव लेत कोइत प्रार्थना कोए, तों वासाय."

22 "ए माआं इस्राएलवाला, ए गोठी उनाआ! ईसु नासरी एक जोऊं ओतू, जियाआ देवोअहीं रोते ओवीइलाआ पुरावू मोन्ज्ये, तिया वाअहीं वोडे वोडे कामे, समत्कार आन निशाणी देखाड्यी, इंहीं वाअहीं देवे तुमाआं काजे मान्य कोअल्यू पुरावू एहेलुहू तो माटी ओतू, ओं तुमू सोताहा बी जांअतेहे. 23 तियाज ईसुहू, जो देवोअ पेलुज रोत ठरवाअली योजनाअ पुरमाणे तोइत आपाअयू, तुमू तियाहा पापी माअहोंअ आथे क्रुस खांबो पोअ टांगीत कोइत माईंत टाक्यु. 24 पोन देवेज तियाहा मोल्याम रोत जिवतु कोअयू, काहाके ओं ओतीज ने सेकतोतो के मोत तियाहा सोताआ ताबाम मिकीत सेके.✝2:24 मत्तय 28:5,6; मार्क 16:6; लुक 24:5 25 काहाके दाविद तियाआ बाप्तिमेहें कोहे, के

"आंय प्रभुहू कायम माआं सामने देख्युहू:

याअ काजे के तो माआं हाजाड़्या आथोअहें होये, आन आंय केदिहींज ने लोथड़ो.

26 या वाअहीं माआ जिव खुसीम होय आन

माआ जिब खुसी वाअहीं गीगलाअहे;

माआ डिल बी आशामेहें जिवे,*2:26 दिल

27 काहाके तु माआं जिवोहो अधोलोकोम*2:27 निसऱ्यीइ मोतोअ कोल ने रोअहूं देही,

तु ताआ पवित्र सेवकोहो माहणोमेहें ने जिरुहूं देही.

28 तुमे माहूं जिवनोअ वाट देखाड़्यीही;

ताआ हजरी वाअहीं आंय खुस ओत जाहीं."

29 "माआं पाव्हीइला, आंय वेगाअ डाया दाविदोअ बाप्तिम तुमुहूं साती ठोकीत कोहो, के तो तोम मोइत गोयू आन तियाहा डाटीत बी देदू, आन तियाआ माहोंण आज बी आपाआ जागे होय. 30 तो देवोअ भविश्यवक्ता ओतू, आन तियाहा मुंदू ओतू, के देवे शप्पत खादीही: आंय ताआ पारवाड़ी मेहें रोते एका जोओंहों ताआ गादीपोअ बोहाड़ीहीं; 31 तिये ओवनारी गोठीही पेलुज रोत पालित कोइत ख्रिस्ताआ जिवीत उठीइलाअ बाप्तिमेहें भविश्यवाणी कोअयी के,

"तियाआ जिव अधोलोकोम नाहां टाक्यु,

आन नाहां तियाआ तोड़ोहो माहणोमेहें जिरुहूं देदो."

32 याज ईसुहू देवे मोल्याम रोत जिवाड़्यू, जियाआ आमू आखे साक्शीदार होय. 33 एहें कोइत तियाहा देवोअ हाजाड़्या आथो वोल आखा रोत उसो पद जोड़्यो, आन बाह्हापोअ रोत तो पवित्र आत्मा जोड़्यू जियाआ बाप्तिम आथवसन आप्योतो, ते भेट ओली देदीही, जों तुमू पालतेहे आन उनाअतेहे. 34 काहाके दाविद तोम होरगामेहें नाहां गोयू; पोन तो सोताहा कोहे,

"‘प्रभु माआं प्रभुहू कोयो,

माआं हाजाड़्यीइ वोल बोहो,

35 जाअहूं जाआं के आंय ताआ दुस्मोनोहों ताआ गुडाआ निसेए पाट्लू ने बोणावी देंव.’

36 "याअ काजे ओमे इस्राएलोअ बादे माअहें जाईंत लेअहूं जोवे, के ईसुहू जियाहा तुमू क्रुस खांबो पोअ सोढव्यू, तियाहाज देवे प्रभु बी आन ख्रिस्त बी ठरव्युहू."

37 तेहेलाम उनाअनाराआ मोनोहों लागीत गोयो, आन तें पेत्राहा आन बाकी प्रेशितोहों फुसे वोल्ये, "पाही, आमू की कोओमें?"

38 पेत्र तियांहां कोयो, "मोन फिरवा, आन तुमामेएं हारेक जोओं जिवज्योअ पापोअ माफीइ काजे ईसु ख्रिस्ताआ नावसे बाप्तिस्मा लेवा; ताहां तुमुहूं पवित्र आत्माआं दान जोड़े. 39 काहाके ओं आथवसन तुमाअरी आन तुमाआं पोर्‍याआं काजे आन तियां दुर दुर्‍याआ आखा माअहुंउं काजे बी होय, जियांहां प्रभु आपाअ देव तियाआ जागे हादे."

40 तिये वारुज बिहीरी गोठी वाअहीं बी साक्शी आपी-आपीइ समजाड़्यो, के "तुमू यी खाराब जातीइ माअहूं रोत सोताआ जिवोह वासाड़ा." 41 याअकाजे जियां तियाआ वसन स्विकार कोअयो, तियां बाप्तिस्मा लेदो; आन तेदिहींज तीन हाजार माअहें तियांअरी जुड़ात गोये. 42 आन तें प्रेशितों पोअ रोत हिकाइलोअ, आन संगतीम रोअलोअ, आन रोटू मुडीइलोअ, आन प्रार्थना कोइलोअ यामेहेंज रोतेते.

43 ताहां आखे माअहें बित गोये, आन प्रेशितों वाअहीं खुब वोडे वोडे कामें आन समत्कार ओवताते. 44 आखे विश्वास कोअनारे एकठेज रोतेते, आन तियांआं आखी वस्तु गोवांदीमेहें ओती. 45 तें जिव जिवोअ मालधन वेसी वेसीइ जियांआं जेहलीही गरज तेहेंज कोइत वाटीत आपी देतेते. 46 तें दाड़ख्येए एक मोन ओत कोइत मंदिरोम टोलू ओवतेते, आन तियांआं कोओं-कोओं खुसी आन खोरा मोनो वाअहीं रोटू खातेते, 47 आन देवोअ स्तुती कोअतेते, आन आखे माअहें तियांहां पालित खुस ओवतेते: आन जियांहां तारण जोड़तोतो, तियां माअहुंहूं प्रभु तियांमेहें जुड़ी देतुतो.