1 हुजताअरीही आखा डाया पुंजारा आन पुडारी ईसुहू माईंत टाकीइलोअ योजना कोअयी. 2 आन तियां तियाहा बेड़ी लागाड़ीत कोइत रोमी राज्यपाल पिलातोअ आथोमेहें होपी देदू.

3 जाहां ईसुहू तोइत आपनारे यहुदे देख्यो के ईसुहू दोशी ठरव्युहू, ताहां तो फासताअयू आन ते तीस सांदीइ रुप्या तियां डाया पुंजारहां आन डायहांआं सामने वापिस लेत गोयू. 4 आन कोयो, "मी एका निर्दुस माट्योहो मोतोअ काजे तोइत आपीत पाप कोअयुहू!"

तियां कोयो, "आमू की कोओमें? तो ताम तुज पालेएमें."

5 ताहां यहुदा मंदिरोमेहें*27:5 मोन्ज्ये पवित्र जागु तियां सांदीइ रुप्याहां टाकी देत् जातु रोयू; आन जात कोइत तिया तियाआज फासी लेत लेदी.

6 मुख्य पुंजारहां पोशा विसीत कोइत कोयो, "ए पोशा दान पेटीमेहें मिकीइलो कायदाआ विरुध्दामेहें होय, काहाके ए रक्ताआ दामोअ पोशा होये." 7 सेलवाआ तियां मानित कोइत तियां पोशाआ पोरदेस वालाहां डाटीइलोअ काजे कुंबारोअ खेत वेसातो लेत लेदो. 8 तियाहाज काजे तिया खेतोहो आज बी "रक्ताआ खेत" कोतेहे.

9 ताहां जो वसन यिर्मया भविश्यवक्ता वाअहीं कोल्यो तोओं पुरो ओवो: "तियां ते तीस सांदीइ रुप्या जे इस्राएलवाला माअहूं तियाआ वोतीइ किंमत ठरव्यीते लेत लेदा.✝27:9 जख 11:12-13; यिर्म 32:6-9 10 आन जेहलोहो प्रभु माहूं आदेश आप्युतो तेहेंज कोइत ते पोशा तियां कुंबारोअ खेत लेअलोअ काजे वापर्‍या."

11 जाहां ईसु रोमन राज्यपालोअ सामने ऊबू रोयू, तेहेलाम तिये राज्यपाले फुशो, "केहें तू यहुद्यांआं राजा होय के?"

ईसु तियाहा कोयो, "तुज कोहे ना." 12 जेहलामेहें मुख्य पुंजारा आन डायहां तियापोअ आरोप लागाड़ताते, तेहेलाम तिये किज उत्तर ने आप्यो.

13 यी गोठीपोअ रोत पिलाते तियाहा कोयो, "केहें तू नाहां उनाअतू के, एं ताआ विरुध्दामेहें केतुहू पुरावू आपतेहे?"

14 पोन ईसु राज्यपालोहो एक बी गोठीइ उत्तर ने आप्यो, ताहां राज्यपाल जास्ती बोगलाअयू.

15 आन वल्हांडण तिवारोअ काजे रोमन राज्यपालोअ ए रीत ओती, के कोड्ला बी एका जेलेमेर्‍याआ आरोपीही माअहोंअ मागणीइं परमाणे सोड़ी देतुतो. 16 तिया जमानामेहें ईसु बरब्बास नावोअ एक नावासी आरोपी तिहीं ओतू. 17 जाहां माअहें टोलू वोल्ये ताहां पिलाते कोयो, "आंय तुमाआं काजे कोडाहा सोडो? बरब्बासोहो के जियाहा ‘ख्रिस्त’ कोतेहे तिया ईसुहू?" 18 तियाहा वारुहूं हाजो मुंदू ओतो के यहुदी आधिकारी ईसुहू तियाआ आथोमेहें होप्युहू काहाके ते आद्राअताते.

19 जाहां पिलात कोर्ठोमेहें बोठुतो तेहेलाम तियाआ लाडी तियाहा एहें कोत कोइत मोकल्यो, "तू तिया निर्दुस माहुंहूं किज मा कोअही, काहाके आज राती होपनामेहें याआ वास्तायी मी खुब दुख वेठ्योहो."

20 मुख्य पुंजारा आन डायहां बरब्बासोहो सोडे तेहें आन ईसुहू माएं तेहें काजे माअहुंहूं उरी सोढ़व्यी. 21 पोन पिलात माअहुंहूं फुशो के, "यां बेनुमेहें रोत कोडाहा सोडो एहेलिही तुमाआं इश्शा होये?"

तियां कोयो, "बरब्बासोहो!"

22 ताहां पिलात तियां माअहुंहूं फुशो, "ताहरुउ जियाहा ‘ख्रिस्त’ कोतेहे तिया ईसुहू की कोओ?"

आखाज तियाहा कोयो, "याहा क्रुस खांबोपोअ सोढ़वा!"

23 पोन पिलाते कोयो, "काहा, ये की गुनू कोअयुहू?"

पोन तें वादार आअड़ी आअड़ीइ कोने वोल्ये, "याहा क्रुस खांबोपोअ सोढ़वा!"

24 जेहेलाम पिलाते देख्यो के कीज नाहां जमती, पोन हालत बिगड़ीइतीज जाहे, ताहां तिये पाईं लेत कोइत माअहोंअ सामने तियाआ आथ तुवया आन कोयो, "या धर्मी माहुंउं खुनोअ जाबाबदार आंय नाहां! ओं तुमाआंज काम होये!"

25 आखा माअहूं कोयो, "याआ मोतोअ जाबाबदारी आमापोअ आन आमाआं पिढीपोअ ओवे!"

26 यी गोठीपोअ रोत पिलात बरब्बासोहो तियांआं काजे सोड़ी देदू, आन ईसुहू सापका देत क्रुस खांबोपोअ सोढवे तेहें काजे तियांआं आथम होपी देदू.

27 ताहां पिलातोअ सैनिकहों ईसुहू राज्यपालोअ राजवाड़ाम लेत गोया, आन आखी तुकड़ी तियाआ शारी वोगेहे टोलू वोल्यी. 28 आन तियाआ आंगड़े काडीत रात्ला रंगोअ आंगड़ो पेवाड़्य. 29 आन काटाआ टोपू गुथीत तियाआ मुन्कापोअ मिक्यू; आन तियाआ हाजाड़्या आथोमेहें डेंगार तोआड़्यी; ताहराअ तियाआ आगाड़ी मांड्या पोड़ीत, "ए यहुद्यांआं राजा जय जयकार!" एहें कोय कोय मोज्या लेना वोल्या. 30 आन तियापोअ थुप्यो; आन ते डेंगार मागीत कोइत मुंडोमेहें देना वोल्या. 31 जाहां ते तियाआ मोज्या लेत लेदी, तेहेलाम तों आंगड़ो काडीत फाशाअ तियाआज आंगड़े पेवाड़्ये, आन तिहीं रोत क्रुस खांबोपोअ सोढ़वीइलोअ काजे लेत गोया.

32 बाअथे जात्ला तेहेलामेहें एक शिमोन नावोअ कुरेनीवालू माटी मिल्यू, तियां सैनिकहों तियाहा ईसुउ क्रुस खांब आखले तेहें काजे जबरजस्ती कोअयी. 33 आन तिया जागापोअ जियाहा गुलगुता मोन्ज्ये मुन्काआ खोबज्यो कोतेहे तिहीं पोता. 34 तिहीं ईसुहू कड़वू रोहो सान्बीत दाराक्शाआ रोहो पिय तेहें आप्यू, पोन तिये ने पिदू.

35 ताहां तियां तियाहा क्रुस खांबोपोअ सोढव्यू; आन सिट्टी टाकीत तियाआ आंगड़े वाटीत लेदे. 36 आन ताहराआ तिहीं बोहीत कोइत पाला वोल्या. 37 आन तियाआ आरोपोअ पाटी, तियाआ मुंडीइ उसीइ वोगेहे लागाड्यी, तियीपोअ ओं लेख्योतो: "ईसु ओ यहुद्याआं राजा होय." 38 ताहां ईसुउरी बेन डाखा एकाहा हाजाड़्यीइ वोगेहे आन एकाहा बांगाड़्यीइ वोगेहे क्रुस खांबोपोअ सोढव्या. 39 आन आवनारे-जानारे मुंड आलवी-आलवीइ ईसुउ निंदा कोअयी. 40 आन एहें कोतेते, "ए मंदिरोहो पाडनारा आन तीन दिहोम बोणावनारा सोताहा तेंव वासाड़! जर तू देवोअ बेटुह्हू ओय ताहां क्रुस खांबोपोअ रोत निसे उतरीत आव!"

41 एहेंज कोइत मुख्य पुंजारा आन कायदाआ मास्तरहों आन डायहां बी मोज्या लेत कोइत कोताते, 42 "ये बिहीराहा वासाड़्ये, पोन सोताहा नाहां वासाड़ीत सेकतु. ओ जर इस्राएलोअ राजा ओय ताहां ओमे क्रुस खांबोपोअ रोत उतरीत आवे, ताहां आमू तियापोअ विश्वास कोअहूं! 43 ये देवोपोअ भरिवसू मिक्युहू आन सोताहा देवोअ बेटुह्हू कोहे. ठीक होय तेहलोहो ओय ताहां देव याहा ओमे वासाड़ेहे के नाहां तों पालता!"

44 एहेंज कोइत डाखा बी जे तियाअरी क्रुस खांबोपोअ टांगात रोयाते, तेबी तियाआ निंदा कोअताते.

45 हिराआ पोअ रोत ते तीन तास जाआं पुरा देसोमेहें आंदारो सेवात गोयो. 46 कमीत कमी तिनेक वाजता जेहें ईसु जोरेबी आअड़ीत कोयो, "एली, एली, लमा शबकतनी?" मोन्ज्ये "ओ माआं देवा, ओ माआं देवा, तुमे माहूं काहा सोड़ी देदू?"

47 जे तिहीं उबा रोया तियां ओं उनाइत तियांम रोत वारुज जोओं कोयो, "ओ ते एलियाहा हाद कोअहे रा!" 48 तियांमेर्‍युउ एक जोओं गुगदीइतूज जात कोइत, सुहांरो लेत कोइत खाटा रोहोमेहें बुडाड़्यो आन डेंगारीइ सुटक्यापोअ मिकीत तियाहा सुगलाड़्यो.

49 पोन थोड़ाक जोओं कोयो, "माताअहूं, एलिया आवित याहा वासाड़ेहे के नाहां पाला ताअहूं!"

50 ताहां ईसु फाशुउ जोरे बी आअड़ीत जिव सोड़ी देदू.

51 ताहां, मंदिरोअ पोड़दू उसे रोत ते निसे जाआं फाटीत बेन भाग ओवा: आन धरती आल्यी आन खड़को जाआं फुटीत गोयो. 52 आन माहणें उगड़ीत गोये, आन वारुज मोल्ये देवोअ माअहें जिवते ओत गोये. 53 आन ईसु मोल्याम रोत जिवीत उठ्यू तिहींइं फाटी तें माहणोम रोत निहींत पवित्र होयरोमेहें गोये, आन वारुज जोओं तियांहां देख्ये.

54 जाहां सेयनिकोअ मुख्य आधिकारी आन तियाआ सेयनिक ईसुउ राखवाली कोअताते, तेहेलाम भुकंप आन जो की बी ओवो तों पालीत जास्तीज बित गोया, आन कोयो, "खोरीज ओ देवोअ बेटुह्हू✝27:54 मत्तय 17:5 ओतू!"

55 तिहीं वारुज बोंईं जे गालीलोमेहें रोत ईसुउ सेवा कोअती तियाअरी आयीते, ते सेटे रोत पालतीते. 56 तियीमेहें मरिया मग्दालिनी आन याकोब आन योसेफोअ आयही, आन जब्दीइ लाडी ओती.

57 हांजेपोअ योसेफ नावोअ अरमितीवालू एक कुन्बी माटी जो ईसुउ सेलू ओतू तो आयू. 58 योसेफे पिलातोअ जागे जात कोइत ईसुउ तोड़ माग्यो. ताहां पिलाते तों तोड़ आपेतेहें आदेश आप्यू. 59 योसेफ तोड़ोहो लेत कोइत तियाहा सोत्राला सादरामेहें गुंउंटायो, 60 आन तियाहा तियाआ नोवा माहणोमेहें मिक्यो, जों तिये खड़कामेहें खुआंण्योतो. तिहीं रोत तिये माहणोअ दोओपोअ वोडू बी डोण होरकावी देत जातू रोयू. 61 मरिया मग्दालिनी आन बिहीरी मरिया नेहें तिहीं माहणोअ सामने बोहीत रोयीते.

62 बिहीरे दिही जो आरामोअ दिही ओतू, मुख्य पुंजारहां आन फरिसी पिलातोहो मिल्या आन कोयो. 63 "मालिख, आमुहूं ओर होये के, तो लबाड़ जिवतुज ओतू तेहेलाम कोयोतो, के ‘आंय तीन दिहोअ फाटी जिवीत उठीहीं.’✝27:63 मत्तय 12:40; 16:21; 17:23; 20:19; लुक 8:2,3 64 ताहरोअ तुमू तीन दिही जाआं माहणोअ राखवाली कोए तेहें काजे आदेश आपा, एहलोहो ने ओवुहूं जोवे के तियाआ सेला आवित कोइत तियाआ तोड़ सोइत लेत जाता रोयेन ताहराआ माअहुंहूं कोना वोले, के ‘तो मोतोमेहें रोत जिवीत उठ्युहू,’ ताहराआ ते आपू पेल्लाआ ठोगाअया तिया रोत सेलवाआ ठोगाअहूं तों जाअखो खाराब ओवे."

65 पिलाते तियांहां कोयो, "जागल्या ताम होय, जावा, तुमाआं मोर्जीइ पुरमाणे राखवाली कोआ."

66 ताहां ते गोयान कबरेपोअ डोण हारीत पाक्को बुजी देदो, आन राखवली कोए तेहें जागल्‍या लागाड़ी देदा.