Matayo 9

Yesu etemuuti mlage muwe na kumkaa mualeta wa mgiru kuli he kigame

18 Ka madamo Yesu areakhwa echeri yo, wato oto mgiru muwe Myahudi ekalita, ekamgogo Yesu kwa kumaya mamuro ekamba, "Mualeta gho aaga waijiji to. Mira nikugogo tuso uremkeia miheregha kechi nau akhwa mzime." 19 Yesu hawe na vahina kuu vekamliha hu mgiru. 20 Mlage muwe, mrukhao wa kuliwe ni sako he madamo ya miko ikado na minu, ekamliaha Yesu kwa mzungure, ekadoa gomae kuu. 21 Ka mlage eekutotie he swaho kuu ite, "Nikunedoa bi gomae kuu, nineu." 22 Niho, Yesu ekawesia aremuakho, ekamba, "Mualeta, kuo swaho, kudarisha kechi kwakuuti." Ka mlage ekau madamo waka aka. 23 Yesu ekabuu he minda yahu mgiru wa Kiyahudi. Areaakho vazama firimbi na ifyo la vahe vezo, 24 Yesu ekavaba, "Halini ii! Ya mualeta tegae, etebodi bi." Navo vekamsisi kwa kumfwa. 25 Niho ifyo la vahe lireakaawe, Yesu ekabuu hehu minda ekamdara mharegha ka mualeta, nau ekaka. 26 Ka mburi ikaparaa hehu idi ikhabuna.