1 Coríntios 12

Mmele nga gumo nambo yeega nga hijingi

12 Handa henela mmele chigubhile gumo na gubhii na yeega hijingi, na yeega yeneyo yoa kugutendea mmele gumo, nga chiibhile kwa Akilisito. 13 Ligongo mu Mboomo jonojwe jumo bhoa tukabatichwa mu mmele gumo, handa nga Bhayahudi au bhandu bhanga Bhayaudi, handa nga akaabhanda au bhandu bhabhatekulekelelwa, na twenga twabhoa tukapekewa tung’wee Mboomo jono jumo.

14 Bahi mmele ngabha chiega chimo, bali nga yeega hijingi. 15 Handa lukongono lukalongile, "Kwa kubhee nenga ngabha lubhoko, bahi nenga ngabha mmele," bholi, kulongela henela nga kupakutenda lono lukongono gukotokubhee chiega cha mmele? 16 Handa lichikilo likalongile, "Kwa kubhee nenga ngabha lio, bahi nenga ngabha lya mmele," bholi, kwa kulongela henela lene lichikilo likabhilehopo chiega cha mmele? 17 Handa mmele gwoa kugabhii lio, kujoa kukabhile koji? Na handa mmele gwoa kugabhii lichikilo, mundu akakombwilebholi kunua? 18 Nambo handa chiibhile, Annoongo akahalakia kila chiega pakwe mu mmele handa chibhakapala mweene. 19 Handa yoa hikabhii chiega chimo, mmele gukabhile koji? 20 Ukweli nga kubhee, hibhile yeega hijingi nambo mmele nga gumo.

21 Bahi, lio ngakombola kugulobholela lubhoko, "Ngampala mwenga" wala mutwe ngakombola kugalobholela makongono, "Ngampalanga mwangota." 22 Nambo badala jakwe, yeniyela yeega ya mmele hibhonekana yangali machili, nga hiipalikwa muno, 23 na yeniyela yeega ya mmele hiituibhona yangatopela, nga hiituitopea muno, yeniyela yeega ya mmele yangahalala muno, nga tutendakuitopea muno, 24 penipala yeniyela yeega hiitekubhajila ngapalikwa. Nambo Annoongo aibhekite pamo yeega ya mmele na akaitopea muno yeniyela hiitekupongokewa. 25 Annoongo akatenda henela ili kukotokubhee na mpwilingano mu mmele, bali yeega yoa hitende mahengo kwa kuchikichana. 26 Handa chiega chimo chitendakulala yoa hitendakuhulala pamo na chenecho. Handa chiega chimo chitendakulumbalilwa, bahi yeega yoa hitendakuhachuka pamo na chenecho.

27 Bahi, mwangota mwabhoa nga mmele gwa Akilisito, kila jumo jwinunji nga chiega cha gono mmele.