Lilobhe likatendeka mmele
1 Pena kandai tangu hilebhe yoha yangahalakikwa, Lilobhe bhakibha, na jonojwe Lilobhe akibha pamo na Annoongo, na bhena bhakibha Annoongo. 2 Nabhena Lilobhe akibha pamo na Annoongo kubhokela kandai. 3 Kupetela jonojwe hilebhe yoha hikaahalakikwa, kupetela jonojwe Annoongo hakaalakia hilebhe yoa. Chakwa chilebhe chohachela changaahalakilwa pangali bhenabho. 4 Nkati jabhe mukibha na umomi na umomi gonogwe gukibha nhana gwa bhandu. 5 Nhana gonogwe kung’anyima palubhendu, na lono lubhendu gwangakoombola kuguhima gono nhana.
6 Kukibha na mundu jumo jwaakatumwa kubhoka kwa Annoongo, lina lyabhe Ayohana. 7 Jonojwe akahika kwaalobholelanga bhandu ngani ja jono nhana. Bhakahika ili kupetela jonojwe bhandu bhoha bhajoange na kuhobhalela. 8 Ayohana jwangabhee jono nhana, ila akahika kwalobholelanga bhandu ngani ja nhana. 9 Jonojwe nga nhana gwa kweli, nhana guguhika pachilambo, na kwamulikilanga bhandu bhoa. 10 Bahi, Lilobhe lyakibha pachilambo, na hilebhe yoha hikalakikwa kupetela jonojwe, nambo bhandu bha pachilambo bhangaamanya. 11 Bhakahika kwa bhandu bhabhe, nambo bhandu bhabhe bhene bhangampokelanga. 12 Nambo bhenibhala bhabhakaapokela na kwahobhalela, akaapekeanga uwecho gwa kutendeka bhana bha Annoongo, 13 bhenabho bhangatendeka bhana bha Annoongo kwa kubhelekwa na akaabhelehi, wala kwa kupala bhandu, ila kwa kupala kwabhe Annoongo mwene. 14 Na bhena Lilobhe akatendeka mmele, akatama pamo na twenga. Na twenga tugubhweni nng’anyimo gwabhe, na nng’anyimo handa gwa Mwana jwa jika jwaakahika kubhoka kwa Atati, jwaatwelile wema gwa Annoongo na kweli.
15 Ayohana bhakaalobholelanga bhandu ngani jabhe, atendita kweha lilobhe, "Ojojo nga jonijola junakannobholelanga kubhee, ‘Jwahika kuyeto jangu nga akolongwa kupunda nenga, kwakubhee akibha tangu nenga nangabhee.’" 16 Kwa kutongamanika kwabhe twenga twabhoa tupookile wema gwa Annoongo kwa kujimbika muno. 17 Kwakubhee Malagilo gakahika kwa kupetela ndela ja Amusa, nambo wema gwa Annoongo na kweli jiletitwe kupetela Ayesu Kilisito. 18 Jwakwa mundu jwammonite Annoongo. Nambo nga Amwana jikajakwe, jwaatekubhandila kwa Annoongo jonojwe nga jwaatekwatenda Annoongo bhamanyikane.
Amatayo 3:1-2; Amaluko 1:1-8; Aluka 3:1-18