Ukolo guguhika
18 Henela, ndendakuibhona heye hibhini ya nangocheni kubhee ngabha chilebhe, handa gonigola ukolo gwa Annoongo gugupakuhunukulikwa kwaachitu. 19 Hiyuumbe yoa hitenda kulendela kwa kulokolila muno kupala kulola kuhunukulilwa kwa bhana bha Annoongo, 20 kwa kubhee hiyuumbe yoa hibhekitwe mu kupoganikwa, ngabha handa chiikapalanga yeene, ila hikatendekwa henela handa chibhakapala Annoongo. Hata henela gabhile gakulupalila, 21 kwa kubhee hiyuumbe yeene yoa hipakuokolewa kubhoka mu ubhanda bha ubohu na kupekewa ukolo gwa bhana bha Annoongo. 22 Tuhimanyi kubhee mpaka nangocheni, hiyuumbe yoa hitendakubhobhola kwa hibhini handa ga kuchijogola mwana. 23 Ngabha hiyuumbe jika jabhe hata na twenga twaachinabhene tutubhii na bhena Mboomo ja Annoongo, jwaabhile ngwahupa ja kujemeka ja Annoongo, na twenga kabhele tutendakubhobhola mu mitima jitu, kongo tubhikulendelela tupanganwe bhana bha Annnoongo, na mimele jitu jikombolewe. 24 Kwa kulupalila genago twenga tukombolilwe. Nambo kulupalila konokwe kwanga maana handa tutenda kulola chenichela chitutendakulupalila. Henela nga aganiki jwaakulupalila chenichela chibhachibhona? 25 Handa tutendakulupalila kupata chenichela yakubhee twangachibhona tangu, tutenda kuchilendelela kwa kuimbilila.
26 Hiyoyo, hata handa tweenga tutekupongokewa na machili nambo Mboomo ja Annoongo atendakutujongekea machili penipala patupongokewa na machili kwa kubhee twangahimanya kujopa handa chiipalikwa. Nambo Mboomo mweene atenda kutujopela kwa Annoongo kwa lilobhe lya kiha lyangalobholeka. 27 Annoongo jwaalola mpaka nkati ja mitima ja bhandu, atenda kugamanya gabhaganikia jono Mboomo, kwa kubhee jono Mboomo atenda kwaajopela bhandu bha Annoongo kagulana handa henela chibhapala.