28 Twenga tutenda kuhimanya yakubhee mu hikubho yoa Annoongo apangana lihengo pamo na bhoa bhabhaapala, mu kwaapekeanga gammbone, nga bhenibhala bhabhatekemwa ligongo lya lihengo lyabhe. 29 Bhenibhala Annoongo bhabhatekwahagula kubhokela kandahi, kabhele jwaatekwabhekanga bhapatange kulandana na Mwana jwabhe, ili abhee abhelehi bha kujemeka pakati ja akaalongo bhajingi. 30 Bhenibhala bhabhakahagulikwa na Annoongo nga bhenabho bhabhatekwamekanga, na bhenibhala bhabhakemite nga bhenabho bhabhakakoondekwa nnoongi jabhe na bhenabho bhakaakonda nnoongi jabhe nga bhenabho bhabhapakutama nabho machobha goa.
Upaliho gwa Annoongo mu Akilisito Ayesu
31 Bahi, tulobhole niki kwa ngani ja gangani? Handa Annoongo akibha upande gwitu, nga aganiki jwaapakombola kutukana? 32 Handa Annoongo jwangaabhilila Mwana jwabhe jwa jika, ila akaabhoa ligongo litu twenga twabhoa. Handa atendite henela, bholi, ngatupekea gammbone goha? 33 Nga aganiki jwaapakwatakia bhenibhala bhandu bhabhahagulikwe na Annoongo? Annoongo mwene nga jwabhakondanga kubhee bhammbone. 34 Aganiki jwaapakunhukumulanga kubhee tulemwite? Jwakwa! Kwa kubhee Akilisito nga jwaajomwike, kabhele akayoka, na jonojwe abhii upande gwa mamulaka kwa Annoongo, kabhele nga jwaatenda kutujopela. 35 Aganiki jwaakombola kutulekania na upaliho gwa Akilisito? Bholi, nga kulaga, au nga hibhini au njala, uwocho gwa ngobho, au kupotekwa, au kujomoka? 36 Handa chiijaandikwe mu Majandiko ga Annoongo,
"Ligongo linu, malilo gatendakutulolea muhi na kilo,
tutenda kupanganwa handa ngondolo jwa kuchenjwa."
37 Nambo, mu hikubho heye yoa, tutendakujangatilwa na Ayesu jwaatupalite. 38 Ndekuhimanya kweli kubhee chakwa chilebhe chichipakombola kutulekania na upaliho gwa Annoongo, ngabha malilo wala umomi, na ngabha akaatumichi bha kunani kwa Annoongo, na ngabha machili gangi ga kunani kwa Annoongo, na ngabha gagabhokela nangocheni, na ngabha gagapakubhokela nnoongi, na ngabha bhabhakweti mamulaka, 39 ngabha gagabhile nnani, na ngabha gagabhile pahi, na ngabha chiumbe chengi choachela ngakombola kulekana na upaliho gwa Annoongo gugubhii mu Kilisito Ayesu Hangwana bhitu.