1 Fena Myik inarum ngɔŋ imunru rɛ min inǝk ngɔŋ. Iyi ne njunju me wur ben atu amɛ ataŋgba; kɔte nju takɛ iyi ne tu anku, fe kɔte tu takɛ iyi ne sak keŋ ndi ba iyik ngɔŋ kɛ Arik ba. 2 Inarumɔ iyi ndi ici, aza amaa ana yi ndi aza inarum ngɔŋ iye ahwaŋ ben anu amaa ana yi ndi anu akɛ zaki. Idaragon o anǝk inarum ngɔŋɔ iklik maa, ben mben yi sɔŋ maa, ben mgbyamgbyaŋ maa. 3 Itu zhiin ne min kɛ inarumɔ ayi ndi ne taru ngɔŋ, ama mkpaa ma neka rɛ. Igɔŋ mimi bɔbɔk ne vuŋ anu te zǝ inarumɔ. 4 kɔte ŋɔ azekur daragon te nɛ nǝk inarum ngɔŋɔ mgbyamgbyaŋ maa. Azekur inarumɔ menyi, tedi,<<Ŋɔwa ayi ndi inarumɔi? Ŋɔwa atei tsik mgbu ayir bene bɔu?>> 5 Aduŋ inarumɔ ilik tu kɛ te Arik zor, tena duŋu ayi ne mgbyamgbyaŋ kɛ ihwa wur ane yaa. 6 Akɔ zen te Arik mla, ben isak maa, ben amkpa ane yime amaa, ben bɔbɔk abaŋ ndi ayime ne gbarshu. 7 Ne nǝge mkpaŋ kɛ te ikum ben aner abɛ Arik te abɛ li kum ne atu amene, tena nek mgbyamgbyaŋ ne atu aye aŋa, ntun, aŋa ben aner. 8 Bɔbɔk aner abɛ gɔŋmimi atei zǝkurǝ, teduŋ se abaŋ ndi ne mǝne acɛr asak amene te ashe alɔ na gɔŋmimi ne mplɛ cɛr kɛ abɛ yi atsitsir ndi ayi abɛ Ŋklu waŋ ndi ne ŋunu ma. 9 <<Wɔ, fena, iwaŋ ndi ate yi ne atɔŋ! 10 Iwaŋ ndi amene yi neka vuŋ atei ka vuŋu; iwaŋ ndi aneka yi ne ŋun ne anzigba bai lieru ba ai ŋunu. Izhɔ iyiŋɛ iyi vuŋ kpa ben itanyɛme ne ŋa kɛ aner abɛ zǝ Arik.>> 11 Fena Mna yik inarum nuŋ, ndi irurɛ gɔŋmimi. Iyi ne njunju me yaa ndi njunju yi ŋklu, fena ilɛ ndi idaragon. 12 Igli mgbyamgbyaŋ kɛ inarum iyi kuti ne yime maa. Isak gɔŋmimi ne mgbyamgbyaŋ ben aner atsitsir abɛ gɔŋmimi bɔbɔk abɛ azekur inarumɔ, iyiŋ ndi mkpaŋ maa neka rɛ. 13 Inarum ngɔŋ iyi yaa ma nena kiki goŋgɔŋ iyi vuŋ anu; iduŋ ilu rurɛ gbarshu te nyɛ gɔŋmimi ne tu kɔte ŋɔwa. 14 Ankyak iku lɔm aner atsitsir bɔbɔk ndi ayi ne gɔŋmimi ne kiki iyi vuŋ anu iyiŋ ndi nena te bǝ yi amɛ ne ti kɛ inarum yi nek sisik iyi kuti me. Inarumɔ bla ba te abɛ mee izhu iyi ka nek ngɔŋ kɛ inarum iyiŋ ndi anzigba ane tsɔmu azhɔk mkpaŋ ama bane ku ba. 15 Arik ne nek inarum yi nek sisik iyi yaa ma ne duŋǝ fuk ivli ashur izhu yi mee me te bǝ lɛ te ibǝ ŋlɔk bɔbɔk aneshir abaŋ ndi ne kyak zǝ kuu ma. 16 Inarumɔ iduŋ aner, amɔ tsɔtsɔb ben angɔŋgɔŋ, abɛ adudunki ben abɛ yaŋǝ, agɛn ben abaŋ ndi ba yi agɛn ba, ne mgbyamgbyaŋ aduŋ asak ba alǝla ne la ŋɔk kɛ li kɔ ne anuti amene. 17 Inuŋ bai lɛb ba kɔ abɛdi iwa atei baŋa lɛb ne yaŋ ngir ba, watɔ, isak kɛ inarumɔ kɔ icɛre igli sak maa, 18 Iyiŋɛ ai zhɔ iyi hria ayi. Iwaŋ ndi ate yi mgbemgbebɛ atei zhi nkan lɛ iyi bla cɛr iyi inarumɔ, te cɛr blama ai sak kɛ nuŋ. Iblama iyi 666.