1 Fe inǝ shar ayou Arik atsar me ituk keŋ ndi yi ne amashir anǝ nek vli, ayi glaŋglaŋ ndi karau, ndi agbub are mben yi sɔŋ Arik bǝn Nklu mɔ.

2 Tɛ gbub azǝ atsutsu nkuŋkɔŋ yi ntunɔ. kɔte gar tuk takǝ kuŋkun kɛ nek vli iyi me, idɔ amkpaŋ awur ane yaa ne sɛ, mkpaŋ zhiin ne hwa; fe amgba ma ayi na aneshir abɛ gɔŋmimi tǝ duŋ ba rɛ. 3 Ikinuŋ ndi Arik ne tei anu amimin ba tei na yige nǝ ntunɔ ba. Mben yi sɔŋ Arik bǝn iven Nklu itei yi ne ntunɔ, agɛn amaa atei zekuru. 4 Atei yik ti maa, atei cɛr sak maa ne anuti amen. 5 Ibu ba tei na yime ba, ba tei na wɔb iki laŋ ilu ka ilaŋ arik, te Arik Ŋgɔŋ atei yi ilu kɛ laŋ men, fe atei na Gli aneshir yaŋ klɛtu. Yesɔ anyɛ andanda

6 Ankyak ine shar ayou Arik adim, <<Ilɛ kǝŋe ai ilɛ kɛ zub abɛ tanyɛme nekǝ. Fe Arik Ŋgɔŋ, waŋ ndi anǝk abɛ bla shar amaa Izhu maa, ne shar ine shar amaa abɛ tsar iki yiŋ ndi itei na andanda.>>

7 Yesɔ adi, <<Wɔ!>> <<Me nyɛ andanda! abaŋ ndi azǝ ilɛ kǝ cɛr abɛ shar amuŋ abɛ nyɛr!>>

8 Nga, Yɔɔna, me ne wɔ te na yik iki yiŋɛ bɔbɔk. Ndi ne mne klɛ wɔ te na yik iki yiŋɛ bɔbɔk, mǝne zhaku ne aza ayi ne shar ayou arik ndi ne tsar me iki yiŋɛ, me ne tei zekuru. 9 Ama ne dim, <<Kǝr na amɛ ba! Me yi igen ikpa amin bǝn amunzumin abɛ shar ayou Arik bǝn bɔbɔk abaŋ ndi azǝ ilɛ keŋ ndi ne cɛr kɛ nen mplɛ kǝŋe. Ubɛ zekur Arik!>> 10 Fe adim, <<Kǝr ubǝ su ilɛ kɛ bla iki yi nyɛ ne ti iyir ba, te mkpaŋ ne tǝ gbahir ndi ikiki yiŋɛ bɔbɔk itei na. 11 Ine na zumimin abɛ nak nai, ine na iki mimin abɛ nak nai, ine na iki didik abɛ nak nai, ine tsin tsetser abɛ nak tsǝn tsetser.>> 12 Yesɔ adi, <<Wɔ zhin.>> <<Me nyɛ andanda! Me Gli idǝk te nyɛ, me tei nek kɔte ŋɔwa idǝk maa ne iki yiŋ ndi ne nai. 13 Nga Me yi Alfa bǝn Omega, inǝ kuti bǝn klɛtu.>> 14 Abaŋ ndi ne ŋla iki yi su men atei nyɛr te ne mla ili idɔ kuŋkun kɛ nǝk vli te bɛ na zǝ nkuŋkɔŋ te yir ntun. 15 Ama abaŋ ndi ayi ne igɔŋ abɛm kɛ ntun abɛ na iki mimin bǝn abɛ na ki suyir, abɛ kur bǝn alulum bǝn amba, abɛ ŋlɔk aneshir, abaŋ ndi azǝ kur amkpɔk atukuŋkun, bǝn abɛ timu ne lǝlɛ bǝn na kiki yi mu. 16 <<Nga, Yesɔ, ne shar ne shar amuŋ te abɛ kɔte bla zhin iki yiŋɛ ne Akabaŋkɔŋ. Me yi nga ŋli kɛ Doda; Me yi ncinces yi laŋ amblimblɛ.>> 17 Izhu bǝn iwa yayas adi, <<Nyɛ!>> iwaŋ ndi atei wɔ iki yiŋɛ atei di, <<Nyɛ>> Iwaŋ ndi ihrie teu abɛ nyɛ; te ta amashir ane nek vli ndi me nek, iwaŋ ndi asɔ.

18 Nga, Yɔɔna, mǝne mgbaŋ iwaŋ ndi ne wɔ ilɛ mplɛ ikiki ndi tei na ne ti: inuŋ ate yaŋ kinuŋ nɛ ki yiŋe, Arik atei nyaŋu iyah men iye aganci anǝ bla nǝ mplɛ cɛrǝ. 19 Iwaŋ ndi atei tun ikinuŋ atibe ne lǝlɛ yiŋ ndi ne cɛrǝ ne mli kɛ bla iki yiŋ ndi itei na nen ti, Arik atei tun iki yiŋ ndi yi men ne idɔ kuŋkun kɛ nek ivli bǝn ntun yi iyi tsetser, ndi blai ne mplɛ kɛ cɛr kǝŋe. 20 Iwaŋ ndi ne bla lǝlɛ yiŋɛ adi, <<Iyi amɛ! me nyɛ andanda!>> Ibǝ yi amɛ. Nyɛ Ŋgɔŋ Yesɔ! 21 Ina iki didik ndi ire bǝn Ŋgɔŋ Yesɔ bɛ yi bǝn aneshir bɔbɔk.